ಕಮ್ಯಾಂಡೋ ವೇಷ ಧರಿಸಿ ಐಎಸ್​ಐಗೆ ಸೇನೆ ಮಾಹಿತಿ ಕಳಿಸ್ತಿದ್ದ! ಬೆಂಗಳೂರಲ್ಲಿ ಬಟ್ಟೆ ವ್ಯಾಪಾರ ಮಾಡ್ತಿದ್ದ!

ಬೆಂಗಳೂರು: ಆರ್ಮಿ ಕಮ್ಯಾಂಡೊ ವೇಷ ಧರಿಸಿ ರಾಜಸ್ಥಾನದ ಬಾರ್ಮೆರ್​​ ಮಿಲಿಟರಿ ಸ್ಟೇಷನ್ನಿನ ಮಾಹಿತಿಗಳನ್ನು ಪಾಕಿಸ್ತಾನದ ಐಎಸ್​ಐ ಅಧಿಕಾರಿಗಳಿಗೆ ರವಾನಿಸುತ್ತಿದ್ದ ಯುವಕನನ್ನು ಮಿಲಿಟರಿ ಗುಪ್ತಚರ ವಿಭಾಗದ ದಕ್ಷಿಣ ಕಮಾಂಡೊ ತಂಡ ಹಾಗೂ ಬೆಂಗಳೂರು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ. ಬೆಂಗಳೂರಿನಲ್ಲಿ ಬಟ್ಟೆ ವ್ಯಾಪಾರಿಯಾಗಿ ಕೆಲಸ ಮಾಡಿಕೊಂಡಿದ್ದ ಜಿತೇಂದರ್​ ಸಿಂಗ್​ ಎಂಬುವವನು ಬಂಧಿತ ಆರೋಪಿ.

ಬೆಂಗಳೂರಿನ ಕಾಟನ್​​ಪೇಟೆಯ ಜಾಲಿ ಮಹೊಲ್ಲಾದಲ್ಲಿ ಬಟ್ಟೆ ವ್ಯಾಪಾರಿಯಾಗಿ ಕೆಲಸ ಮಾಡುತ್ತಿದ್ದ ಆರೋಪಿ ಜಿತೇಂದರ್​ ಸಿಂಗ್​ ಮೂಲತಃ ರಾಜಸ್ಥಾನದ ಬಾರ್ಮೆರ್​​ನವನು. ಈತ ಪಾಕಿಸ್ತಾನದ ISI ಅಧಿಕಾರಿಯ ಜೊತೆ ಸಂಪರ್ಕ ಹೊಂದಿದ್ದ. ವಾಟ್ಸ್ ಆಪ್ ವಿಡಿಯೋ, ಮೆಸೆಜ್ ಮತ್ತು ಕಾಲ್ ಮುಖಾಂತರ ಬಾರ್ಮೆರ್ ಮಿಲಿಟರಿ ಸ್ಟೇಷನ್​​ ಮತ್ತು ಮಿಲಿಟರಿ ವಾಹನಗಳ ಓಡಾಟದ ಬಗ್ಗೆ ಮಾಹಿತಿ ರವಾನಿಸುತ್ತಿದ್ದ. ಆರ್ಮಿಗೆ ಸಂಬಂಧಿಸಿದ ಮತ್ತು ಬಾರ್ಮೆರ್​ನ ಅಂತರಾಷ್ಟ್ರೀಯ ಗಡಿ ಪ್ರದೇಶದ ಫೋಟೊಗಳನ್ನು ಕಳುಹಿಸಿದ್ದ ಎಂದು ಸಿಸಿಬಿ ಜಂಟಿ ಆಯುಕ್ತ ಸಂದೀಪ್ ಪಾಟೀಲ್ ಹೇಳಿದ್ದಾರೆ.

ಇದನ್ನೂ ಓದಿ: ನೈಋತ್ಯ ರೈಲ್ವೆ ವತಿಯಿಂದ ನಿರುದ್ಯೋಗಿ ಯುವಕರಿಗೆ ಉಚಿತ ವೃತ್ತಿ ತರಬೇತಿ

ಮಿಲಿಟರಿ ಇಂಟಲಿಜೆನ್ಸ್ ಮಾಹಿತಿ ಮೇರೆಗೆ ನಡೆದ ಕಾರ್ಯಾಚರಣೆಯಲ್ಲಿ ಆರೋಪಿ ಸಿಂಗ್​​, ಆರ್ಮಿ ಕಮ್ಯಾಂಡೊ ಯುನಿಫಾರ್ಮ್ ಧರಿಸಿಕೊಂಡು, ತಾನೂ ಕಮಾಂಡೊ ಅಂತ ಗುರುತಿಸಿಕೊಂಡು ಆಪರೇಟ್ ಮಾಡುತ್ತಿದ್ದ ಎಂಬುದು ಬೆಳಕಿಗೆ ಬಂದಿದೆ. ಫೇಸ್​​ಬುಕ್​ನಲ್ಲಿ ಪರಿಚಯವಾಗಿದ್ದ ಯುವತಿಯೊಬ್ಬಳ ಬೇಡಿಕೆ ಮೇರೆಗೆ ಮಿಲಿಟರಿ ಮಾಹಿತಿ ಒದಗಿಸಿದ್ದ ಎನ್ನಲಾದ ಸಿಂಗ್​, ಕಳೆದ 2 ತಿಂಗಳ ಹಿಂದಷ್ಟೇ ಬೆಂಗಳೂರಿಗೆ ಬಂದಿದ್ದ ಎನ್ನಲಾಗಿದೆ. ಇದೀಗ ಸಿಂಗ್​ನನ್ನು ಬಂಧಿಸಿರುವ ಸಿಸಿಬಿ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

https://www.vijayavani.net/punjabs-16th-cm-charanjit-singh-sworn-in-two-deputy-cms/

https://www.vijayavani.net/sonu-sood-breaks-his-silence-about-it-survey-and-allegations/