ಅಂದಹಾಗೆ ಆ ಅದೃಷ್ಟವಂತನ ಹೆಸರು ಜೋಶುವಾ ಹುಟಗಲುಂಗ್. ಈತ ಇಂಡೋನೇಷ್ಯಾದ ಕೊಲಾಂಗ್ ನಿವಾಸಿ. ಈ ಘಟನೆ ನಡೆದಿದ್ದು 2020ರಲ್ಲಿ. ಹುಟಗಲುಂಗ್ ಮನೆಯ ಹೊರಗೆ ಕೆಲಸ ಮಾಡುತ್ತಿದ್ದಾಗ, ಅವರ ಲಿವಿಂಗ್ ರೂಮ್ ಬಳಿ ಉಲ್ಕಾಶಿಲೆಯ ಒಂದು ಭಾಗ ಬಿದ್ದಿತು. ಅದು ಎಷ್ಟು ವೇಗವಾಗಿ ನೆಲಕ್ಕೆ ಅಪ್ಪಳಿಸಿತು ಅಂದರೆ, ಮನೆಯ ಛಾವಣಿಯನ್ನು ಸೀಳಿಕೊಂಡು ನೆಲಕ್ಕೆ ಬಿದ್ದ ರಭಸಕ್ಕೆ ಆ ಜಾಗದಲ್ಲಿ 15 ಸೆಂ.ಮೀ ಆಳದ ಕುಳಿ ರೂಪುಗೊಂಡಿತು. ಅದನ್ನು ನೋಡಿ ಹುಟಗಲುಂಗ್ ಒಂದು ಕ್ಷಣ ಆಘಾತಕ್ಕೆ ಒಳಗಾದರು. ಏನಿದು ನಿಗೂಢ ವಸ್ತು ಎಂಬ ಯೋಚನೆ ಮಾಡತೊಡಗಿದರು. ತನಿಖೆ ನಡೆಸಿದಾಗ ಅದೊಂದು ಉಲ್ಕಾಶಿಲೆಯಾಗಿದ್ದು, 4.5 ಶತಕೋಟಿ ವರ್ಷಗಳಷ್ಟು ಹಳೆಯದು ಎಂಬುದು ಗೊತ್ತಾಯಿತು. ಆ ಉಲ್ಕಾಶಿಲೆಯ ಭಾಗ 2.1 ಕೆಜಿ ತೂಕವಿತ್ತು. ಅತ್ಯಂತ ಅಚ್ಚರಿಯ ಸಂಗತಿ ಎಂದರೆ ಆ ಉಲ್ಕಾಶಿಲೆ ತುಣುಕು ಬರೋಬ್ಬರಿ 14 ಕೋಟಿ ರೂಪಾಯಿ ಬೆಲೆ ಬಾಳುತ್ತಿತ್ತು.
