ಮಹಾ ಗೃಹಮಂತ್ರಿಯಾಗಿದ್ದ ಅನಿಲ್​​ ದೇಶ್​​ಮುಖ್​ ಹೆಸರಲ್ಲಿ ಲುಕ್​ ಔಟ್​ ನೋಟೀಸ್

ನವದೆಹಲಿ: ಮಹಾರಾಷ್ಟ್ರದ ಮಾಜಿ ಗೃಹ ಮಂತ್ರಿ ಅನಿಲ್​ ದೇಶಮುಖ್​ ಹೆಸರಲ್ಲಿ ಆರ್ಥಿಕ ಅಪರಾಧಗಳ ತನಿಖೆ ನಡೆಸುವ ಎನ್​ಫೋರ್ಸ್​ಮೆಂಟ್​ ಡೈರೆಕ್ಟೊರೇಟ್​(ಇಡಿ) ಲುಕ್​ ಔಟ್​ ನೋಟೀಸ್​ ಹೊರಡಿಸಿದೆ. ಹಲವು ಸಮನ್ಸ್​ಗಳಿಗೆ ದೇಶಮುಖ್​ ಸೂಕ್ತವಾಗಿ ಸ್ಪಂದಿಸದೆ ಇರುವ ಹಿನ್ನೆಲೆಯಲ್ಲಿ, ಅವರು ದೇಶ ಬಿಟ್ಟು ಹೋಗುವುದನ್ನು ತಡೆಯಲು ಈ ನೋಟೀಸ್​ ಜಾರಿಮಾಡಲಾಗಿದೆ ಎನ್ನಲಾಗಿದೆ.

ರಾಷ್ಟ್ರವಾದಿ ಕಾಂಗ್ರೆಸ್ ಪಕ್ಷ(ಎನ್​ಸಿಪಿ)ದ ನಾಯಕರಾದ ದೇಶ್​ಮುಖ್​ ವಿರುದ್ಧ ಸುಮಾರು 100 ಕೋಟಿ ರೂಪಾಯಿಗಳ ಅಕ್ರಮ ಹಣ ವರ್ಗಾವಣೆ(ಮನಿ ಲಾಂಡರಿಂಗ್)​ ಆರೋಪದ ತನಿಖೆಯನ್ನು ಇಡಿ ಕೈಗೆತ್ತಿಕೊಂಡಿದೆ. ವಿಚಾರಣೆಗಾಗಿ ಹಾಜರಾಗಲು ಅವರಿಗೆ ಹಲವು ಸಮನ್ಸ್​ ಜಾರಿಗೊಳಿಸಿದ್ದರೂ ಈವರೆಗೆ ಭೌತಿಕ ಹಾಜರಾತಿ ನೀಡಿಲ್ಲ. ಸುಪ್ರೀಂ ಕೋರ್ಟ್​ನಲ್ಲಿ ಈ ಬಗ್ಗೆ ತಾವು ಸಲ್ಲಿಸಿರುವ ಮೇಲ್ಮನವಿಯ ವಿಚಾರಣೆ ಮುಗಿಯುವವರೆಗೆ ಇಡಿ ಮುಂದೆ ಬರುವುದಿಲ್ಲವೆಂದು ಹೇಳಿರುವ ದೆಶ್​ಮುಖ್​, ಯಾವುದೇ ಎಲೆಕ್ಟ್ರಾನಿಕ್ ಮಾಧ್ಯಮದ ಮೂಲಕ ತಮ್ಮ ಹೇಳಿಕೆ ದಾಖಲಿಸಲು ಸಿದ್ಧರಿರುವುದಾಗಿಯೂ ಹೇಳಿದ್ದಾರೆ ಎನ್ನಲಾಗಿದೆ.

ಇದನ್ನೂ ಓದಿ: ಇಳಿದ ಕರೊನಾ ಸಾವುಗಳ ಸಂಖ್ಯೆ… 38,948 ಹೊಸ ಪ್ರಕರಣಗಳು

ಮಾಜಿ ಸಚಿವರಿಗೆ ಸುಪ್ರೀಂ ಕೋರ್ಟ್​ ಈವರೆಗೆ ಯಾವುದೇ ಮಧ್ಯಂತರ ಪರಿಹಾರ ನೀಡಿಲ್ಲ. ಮತ್ತೊಂದೆಡೆ, ದೇಶ್​ಮುಖ್​ರ ಸಹಾಯಕ ಕುಂದನ್​ ಶಿಂದೆ ಮತ್ತು ಆಪ್ತ ಕಾರ್ಯದರ್ಶಿ ಸಂಜೀವ್ ಪಾಲಂದ್​ರನ್ನು ಬಂಧಿಸಿರುವ ಇಡಿ, ಅವರ ವಿರುದ್ಧ ಅದಾಗಲೇ ಮನಿ ಲಾಂಡರಿಂಗ್​ನಲ್ಲಿ ಸಹಾಯ ಮಾಡಿರುವುದಾಗಿ ಚಾರ್ಜ್​ಶೀಟ್​ ಸಲ್ಲಿಸಿದೆ. ಇದೇ ಸೆಪ್ಟೆಂಬರ್ 3 ರಂದು ದೇಶ್​ಮುಖ್​ರ ವಕೀಲರ ತಂಡದ ಸದಸ್ಯ ಆನಂದ್​ ದಾಗಾ ಅವರನ್ನು ತನಿಖೆಯ ಮೇಲೆ ಪ್ರಭಾವ ಬೀರಲು ಪ್ರಯತ್ನಿಸುತ್ತಿರುವ ಆರೋಪದ ಮೇಲೆ ಸಿಬಿಐ ಬಂಧಿಸಿದೆ.

ಮಹಾರಾಷ್ಟ್ರದ ಗೃಹ ಮಂತ್ರಿಯಾಗಿ ಅಧಿಕಾರದಲ್ಲಿದ್ದಾಗ ಕೆಲವು ಪೊಲೀಸ್​ ಅಧಿಕಾರಿಗಳ ಮೂಲಕ ಮುಂಬೈನ ಬಾರ್​ಗಳಿಂದ ಕೋಟ್ಯಂತರ ರೂ.ಗಳನ್ನು ವಸೂಲಿ ಮಾಡಿರುವುದಾಗಿ ದೇಶ್​ಮುಖ್​ ಮೇಲೆ ಆರೋಪ ಎದ್ದಿತ್ತು. ಈ ನಿಟ್ಟಿನಲ್ಲಿ ಸಿಬಿಐ ಏಪ್ರಿಲ್​ 21 ಕ್ಕೆ ಎಫ್​ಐಆರ್​ ದಾಖಲಿಸಿದ ನಂತರ, ಇಡಿ, ಪ್ರಕರಣ ದಾಖಲಿಸಿ ತನಿಖೆ ನಡೆಸುತ್ತಿದೆ. (ಏಜೆನ್ಸೀಸ್)

https://www.vijayavani.net/ganeshotsava-guidelines/

https://www.vijayavani.net/furious-over-javed-aktars-remarks-bjp-spokesman-asks-him-to-apologise/

https://www.vijayavani.net/karnataka-stands-6th-in-fully-vaccinated-states-know-how-many-got-both-doses/