ಪ್ರತಿದಿನ ಹುರಿಗಡಲೆ ತಿಂದ್ರೆ ಏನಾಗುತ್ತೆ ಗೊತ್ತಾ? ದೇಹಕ್ಕೆ ಎಷ್ಟು ಲಾಭ | Benefits of eating Roasted Gram

Benefits of string beans: ಬೆಳಗಿನ ಉಪಾಹಾರದಲ್ಲಿ, ಸಂಜೆ ಟೀ ಜೊತೆ, ಸ್ನ್ಯಾಕ್ಸ್‌ ಆಗಿ ಹುರಿಗಡಲೆ ತಿನ್ನುವ ಅಭ್ಯಾಸ ಹಲವರಿಗಿರುತ್ತೆ. ರುಚಿಗೆ ಮಾತ್ರವಲ್ಲದೆ ಪೌಷ್ಟಿಕಾಂಶದ ದೃಷ್ಟಿಯಿಂದಲೂ ಹುರಿಗಡಲೆ ಉತ್ತಮ ಆಹಾರ. ಕಡಲೆಕಾಳಿನಲ್ಲಿ ಪ್ರೋಟೀನ್, ಆಹಾರದ ನಾರಿನಂಶ, ಕಬ್ಬಿಣ, ಫೋಲೇಟ್ ಸೇರಿದಂತೆ ಹಲವು ಪೋಷಕಾಂಶಗಳು ಇರುತ್ತವೆ.

ಹುರಿಗಡಲೆ ಆರೋಗ್ಯಕ್ಕೆ ಹಲವು ಲಾಭಗಳನ್ನು ನೀಡುತ್ತದೆ. ಇದನ್ನು ಹಾಗೆಯೇ ತಿನ್ನಬಹುದು ಅಥವಾ ಬೆಲ್ಲದ ಜೊತೆ ಸೇರಿಸಿ ಚಿಕ್ಕಿ, ಉಂಡೆ ಮಾಡಿಕೊಂಡು ನಿಯಮಿತವಾಗಿ ಸವಿಯಬಹುದು. ಬೆಲ್ಲದಲ್ಲಿರುವ ಕಬ್ಬಿಣ ಮತ್ತು ಕಾರ್ಬೋಹೈಡ್ರೇಟ್‌ಗಳು ದೇಹಕ್ಕೆ ಶಕ್ತಿ ನೀಡುತ್ತವೆ. ಹೀಗಾಗಿ ಹುರಿಗಡಲೆ ಮತ್ತು ಬೆಲ್ಲದ ಕಾಂಬಿನೇಷನ್ ರುಚಿಯ ಜತೆಗೆ ಆರೋಗ್ಯಕ್ಕೂ ಒಳ್ಳೆಯದು

ಹುರಿಗಡಲೆಯಲ್ಲಿ ಉತ್ತಮ ಪ್ರಮಾಣದ ಫೈಬರ್ ಇರುವುದರಿಂದ ಜೀರ್ಣಕ್ರಿಯೆ ಸರಾಗವಾಗಲು ಸಹಾಯ ಮಾಡಬಹುದು. ಫೈಬರ್ ಕರುಳಿನ ಚಲನೆಯನ್ನು ಉತ್ತಮಗೊಳಿಸುವುದರಿಂದ ಮಲಬದ್ಧತೆ ಸಮಸ್ಯೆ ಇರುವವರಿಗೆ ಆಹಾರದ ಭಾಗವಾಗಿ ಉಪಯುಕ್ತವಾಗಬಹುದು.

ಹುರಿಗಡಲೆಯಲ್ಲಿರುವ ಪ್ರೋಟೀನ್ ಮತ್ತು ಫೈಬರ್ ಜೀರ್ಣವಾಗಲು ಸಮಯ ತೆಗೆದುಕೊಳ್ಳುತ್ತವೆ. ಇದರಿಂದ ಹೊಟ್ಟೆ ತುಂಬಿದ ಅನುಭವ ಹೆಚ್ಚು ಸಮಯ ಇರಬಹುದು. ಹಾಗಾಗಿ ಪದೇಪದೇ ತಿಂಡಿ ತಿನ್ನುವ ಅಭ್ಯಾಸ ಕಡಿಮೆಯಾಗಲು ಮತ್ತು ತೂಕ ನಿಯಂತ್ರಿಸಲು ಸಹಾಯವಾಗಬಹುದು.

ಮಾಂಸಾಹಾರ ತಿನ್ನದವರಿಗೆ ಕಡಲೆ ಉತ್ತಮ ಸಸ್ಯಜನ್ಯ ಪ್ರೋಟೀನ್ ಆಗಿದೆ. ಬೇಯಿಸಿದ ಒಂದು ಕಪ್‌ ಕಡಲೆಯಲ್ಲಿ ಸುಮಾರು 14.5 ಗ್ರಾಂ ಪ್ರೋಟೀನ್ ದೊರೆಯುತ್ತದೆ ಎಂದು ಹಾರ್ವರ್ಡ್ ಹೆಲ್ತ್ ತಿಳಿಸಿದೆ. ರಕ್ತದಲ್ಲಿನ ಸಕ್ಕರೆ ಏರಿಕೆ ಪ್ರಮಾಣವನ್ನು ನಿಧಾನಗೊಳಿಸಲು ನೆರವಾಗುತ್ತೆ.

ಕಡಲೆ ಮತ್ತು ಇತರ ಕಾಳುಗಳಲ್ಲಿ ಫೈಬರ್ ಹಾಗೂ ನಿಧಾನವಾಗಿ ಜೀರ್ಣವಾಗುವ ಕಾರ್ಬೋಹೈಡ್ರೇಟ್‌ಗಳು ಇರುವುದರಿಂದ ಊಟದ ನಂತರ ರಕ್ತದಲ್ಲಿನ ಸಕ್ಕರೆ ವೇಗವಾಗಿ ಏರದಂತೆ ಸಹಾಯ ಮಾಡಬಹುದು. ಆದರೆ ಹುರಿಗಡಲೆ ತಿಂದರೆ ಮಧುಮೇಹ ಗುಣವಾಗುತ್ತದೆ ಎನ್ನುವುದು ಸರಿಯಲ್ಲ. ಮಧುಮೇಹ ಇರುವವರು ತಮ್ಮ ಆಹಾರ ಪ್ರಮಾಣವನ್ನು ವೈದ್ಯರು ಅಥವಾ ಆಹಾರ ತಜ್ಞರ ಸಲಹೆಯಂತೆ ನಿರ್ಧರಿಸುವುದು ಉತ್ತಮ.

ಕಡಲೆಯಲ್ಲಿರುವ ಫೈಬರ್ ಹಾಗೂ ಸಸ್ಯಜನ್ಯ ಪೋಷಕಾಂಶಗಳು ಕೊಲೆಸ್ಟ್ರಾಲ್ ಮತ್ತು ಹೃದಯದ ಆರೋಗ್ಯದ ಮೇಲೆ ಉತ್ತಮ ಪರಿಣಾಮ ಬೀರುತ್ತವೆ. ನಿಯಮಿತವಾಗಿ ಕಾಳುಗಳನ್ನು ಒಳಗೊಂಡ ಸಮತೋಲಿತ ಆಹಾರ ಸೇವಿಸುವುದು ಹೃದಯದ ಆರೋಗ್ಯಕ್ಕೆ ಸಹಾಯಕವಾಗಬಹುದು.

ಕಡಲೆಯಲ್ಲಿ ಕಬ್ಬಿಣ, ಫೋಲೇಟ್, ಮ್ಯಾಗ್ನೀಷಿಯಂ, ಫಾಸ್ಫರಸ್ ಸೇರಿ ಹಲವು ಪೋಷಕಾಂಶಗಳಿವೆ. ಇವು ದೇಹದ ವಿವಿಧ ಕಾರ್ಯಗಳಿಗೆ ಅಗತ್ಯವಾಗಿವೆ. ಆದರೆ ಕೇವಲ ಹುರಿಗಡಲೆಯನ್ನು ತಿಂದರೆ ರಕ್ತಹೀನತೆ ಅಥವಾ ಯಾವುದೇ ಪೌಷ್ಟಿಕಾಂಶದ ಕೊರತೆ ಸಂಪೂರ್ಣವಾಗಿ ನಿವಾರಣೆಯಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.

ಹುರಿಗಡಲೆ ಪ್ರೋಟೀನ್, ಕಬ್ಬಿಣ, ಫೋಲೇಟ್ ಸೇರಿದಂತೆ ಹಲವು ಪೋಷಕಾಂಶಗಳನ್ನು ಒದಗಿಸುವ ಆರೋಗ್ಯಕರ ಆಹಾರ. ಆದರೆ ಇದನ್ನು ತಿಂದರೆ ಪುರುಷತ್ವ ಹೆಚ್ಚುತ್ತದೆ, ವೀರ್ಯಾಣುಗಳ ಸಂಖ್ಯೆ ಹೆಚ್ಚುತ್ತದೆ ಅಥವಾ ಲೈಂಗಿಕ ಸಮಸ್ಯೆಗಳು ದೂರವಾಗುತ್ತವೆ ಎಂಬುದಕ್ಕೆ ಸಾಕಷ್ಟು ವೈಜ್ಞಾನಿಕ ಪುರಾವೆಗಳಿಲ್ಲ. ಇಂತಹ ಸಮಸ್ಯೆಗಳಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.

ಹುರಿಗಡಲೆ ಆರೋಗ್ಯಕರ ಆಹಾರವಾದರೂ ಅತಿಯಾಗಿ ತಿನ್ನುವುದು ಒಳ್ಳೆಯದಲ್ಲ. ಒಂದು ಸಣ್ಣ ಹಿಡಿಯಷ್ಟು ಪ್ರಮಾಣವನ್ನು ಸ್ನ್ಯಾಕ್ಸ್‌ ಆಗಿ ಸೇವಿಸುವುದು ಸಾಮಾನ್ಯವಾಗಿ ಸಾಕಾಗಬಹುದು. ಜೊತೆಗೆ ಹಣ್ಣು, ತರಕಾರಿ, ಧಾನ್ಯಗಳು, ಬೇಳೆ-ಕಾಳುಗಳು ಸೇರಿದಂತೆ ವಿವಿಧ ಆಹಾರಗಳನ್ನು ಒಳಗೊಂಡ ಸಮತೋಲಿತ ಆಹಾರ ಸೇವಿಸುವುದು ಮುಖ್ಯ.

ಒಟ್ಟಾರೆ ಹುರಿಗಡಲೆ ರುಚಿಯ ಜತೆಗೆ ಪ್ರೋಟೀನ್ ಮತ್ತು ಫೈಬರ್‌ನ ಮೂಲವಾಗಿದೆ. ಜೀರ್ಣಕ್ರಿಯೆ, ಹೊಟ್ಟೆ ತುಂಬಿದ ಅನುಭವ ಮತ್ತು ತೂಕ ನಿರ್ವಹಣೆಗೆ ಇದು ಸಹಾಯ ಮಾಡಬಹುದು. ಆದರೆ ಯಾವುದೇ ಒಂದು ಆಹಾರವೇ ಎಲ್ಲ ಆರೋಗ್ಯ ಸಮಸ್ಯೆಗಳಿಗೆ ಪರಿಹಾರವಲ್ಲ. ಮಿತ ಪ್ರಮಾಣದಲ್ಲಿ, ಸಮತೋಲಿತ ಆಹಾರದ ಭಾಗವಾಗಿ ಹುರಿಗಡಲೆ ಸೇವಿಸುವುದೇ ಉತ್ತಮ,(ಏಜೆನ್ಸೀಸ್​).