ಮೇಕಪ್ ತೆಗೆಯದೆ ಹಾಗೇ ಮಲಗುತ್ತೀರಾ? ಬೆಳಗಾಗುವಷ್ಟರಲ್ಲಿ ಚರ್ಮದ ಮೇಲೆ ಏನಾಗಿರುತ್ತೆ ಗೊತ್ತಾ? ಇಲ್ಲಿದೆ ಉಪಯುಕ್ತ ಮಾಹಿತಿ...Makeup

Makeup : ದಿನವಿಡೀ ಮೇಕಪ್ ಹಾಕಿಕೊಂಡು ರಾತ್ರಿ ಅದನ್ನು ತೆಗೆಯದೆ ಮಲಗುವ ಅಭ್ಯಾಸ ನಿಮಗೂ ಇದೆಯೇ? ಒಂದು ರಾತ್ರಿ ತಾನೇ ಏನೂ ಆಗುವುದಿಲ್ಲ ಎಂದು ನಿರ್ಲಕ್ಷ್ಯ ಮಾಡಬೇಡಿ. ಪದೇಪದೆ ಹೀಗೆ ಮಾಡುವುದರಿಂದ ಮೊಡವೆ ಕಾಣಿಸಿಕೊಳ್ಳುವುದು, ರಂಧ್ರಗಳು ಮುಚ್ಚಿಕೊಳ್ಳುವುದು ಸೇರಿದಂತೆ ಚರ್ಮದ ಹಲವು ಸಮಸ್ಯೆಗಳು ಎದುರಾಗುತ್ತವೆ.

ಮೇಕಪ್ ಪ್ರತಿಯೊಬ್ಬರ ಮುಖದ ಅಂದವನ್ನು ಹೆಚ್ಚಿಸುವುದರಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಪಾರ್ಟಿ, ಮದುವೆ, ಕಾರ್ಯಕ್ರಮ ಅಥವಾ ದಿನನಿತ್ಯದ ಕೆಲಸಕ್ಕೆ ಹೋಗುವಾಗ ಹಲವರು ಮೇಕಪ್ ಬಳಸುತ್ತಾರೆ. ಆದರೆ ಬೆಳಗ್ಗೆಯಿಂದ ಸಂಜೆಯವರೆಗೆ ಮುಖದ ಮೇಲೆ ಇರುವ ಮೇಕಪ್ ಅನ್ನು ರಾತ್ರಿ ಹಾಗೆಯೇ ಬಿಟ್ಟು ಮಲಗುವುದು ಚರ್ಮದ ಆರೈಕೆಯ ವಿಷಯದಲ್ಲಿ ಒಳ್ಳೆಯ ಅಭ್ಯಾಸವಲ್ಲ. ಇದರಿಂದ ಹಲವಾರು ರೀತಿಯಾದ ತೊಂದರೆಯನ್ನು ಎದುರಿದಬೇಕಾಗುತ್ತದೆ.

ದಿನವಿಡೀ ಮುಖದ ಮೇಲೆ ಮೇಕಪ್ ಇರುವುದರ ಜೊತೆಗೆ ಬೆವರು, ಹೊರಗಿನ ಧೂಳು, ಚರ್ಮದ ನೈಸರ್ಗಿಕ ಎಣ್ಣೆ ಮತ್ತು ಪರಿಸರದಲ್ಲಿರುವ ಸೂಕ್ಷ್ಮ ಕಣಗಳು ಕೂಡ ಮುಖವನ್ನು ಸೇರಿಕೊಳ್ಳುತ್ತವೆ. ರಾತ್ರಿ ಮಲಗುವ ಮುನ್ನ ಇವೆಲ್ಲವನ್ನೂ ಸರಿಯಾಗಿ ಸ್ವಚ್ಛಗೊಳಿಸದಿದ್ದರೆ ಚರ್ಮದ ಮೇಲೆ ಅವು ಹಾಗೆಯೇ ಉಳಿದುಕೊಳ್ಳುತ್ತವೆ.

ರಂಧ್ರಗಳು ಮುಚ್ಚಿಕೊಳ್ಳುವ ಸಾಧ್ಯತೆ

ಚರ್ಮದಿಂದ ಹೊರಬರುವ ನೈಸರ್ಗಿಕ ಎಣ್ಣೆ, ಸತ್ತ ಚರ್ಮಕೋಶಗಳು ಮತ್ತು ಮೇಕಪ್‌ನ ಕೆಲವು ಅಂಶಗಳು ಒಟ್ಟಾಗಿ ಸೇರಿಕೊಂಡಾಗ ಚರ್ಮದ ರಂಧ್ರಗಳು ಮುಚ್ಚಿಕೊಳ್ಳುವ ಸಾಧ್ಯತೆ ಇರುತ್ತದೆ. ಇದರಿಂದ ಬ್ಲ್ಯಾಕ್‌ಹೆಡ್ಸ್, ವೈಟ್‌ಹೆಡ್ಸ್ ಮತ್ತು ಮೊಡವೆಗಳು ಕಾಣಿಸಿಕೊಳ್ಳಬಹುದು. ವಿಶೇಷವಾಗಿ ಈಗಾಗಲೇ ಮೊಡವೆ ಉಂಟಾಗುವ ಪ್ರವೃತ್ತಿ ಇರುವವರಲ್ಲಿ ಈ ಸಮಸ್ಯೆ ಹೆಚ್ಚು ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ. ಅಷ್ಟೆ ಅಲ್ಲದೆ ಪ್ರತಿದಿನ ಬಳಸುವ ಮೇಕಪಪ್​ನಲ್ಲಿ ನಮಗೆ ಗೊತ್ತಿಲ್ಲದ ಹಲವಾರು ರಾಸಾಯನಿಕಗಳು ಇರುತ್ತವೆ ಇದರಿಂದಲೂ ಕೂಡಾ ಚರ್ಮಕ್ಕೆ ಹಾನಿ ಉಂಟಾಗುತ್ತದೆ. ಆದ್ದರಿಂದ ರಾತ್ರಿ ಮಲಗುವ ಮುನ್ನ ಮುಖವನ್ನು ಸ್ವಚ್ಛಗೊಳಿಸುವುದು ಮುಖ್ಯ.

ಚರ್ಮದಲ್ಲಿ ತುರಿಕೆ, ಉರಿ ಕಾಣಿಸಿಕೊಳ್ಳಬಹುದು

ಪ್ರತಿಯೊಬ್ಬರ ಚರ್ಮದ ಸ್ವಭಾವ ಒಂದೇ ರೀತಿಯಾಗಿರುವುದಿಲ್ಲ. ಕೆಲವರಿಗೆ ಕೆಲವು ಮೇಕಪ್ ಉತ್ಪನ್ನಗಳು ಹೊಂದಿಕೆಯಾಗದೇ ಇರಬಹುದು. ಅಂತಹ ಉತ್ಪನ್ನಗಳನ್ನು ದೀರ್ಘಕಾಲ ಮುಖದ ಮೇಲೆ ಇಟ್ಟುಕೊಂಡರೆ ಕೆಂಪಾಗುವುದು, ತುರಿಕೆ, ಉರಿ ಅಥವಾ ಚರ್ಮ ಊದುವಿಕೆ ಕಾಣಿಸಿಕೊಳ್ಳಬಹುದು. ಒಂದು ಉತ್ಪನ್ನ ಬಳಸಿದ ನಂತರ ಪದೇಪದೆ ಇಂತಹ ಸಮಸ್ಯೆ ಕಂಡುಬಂದರೆ ಅದನ್ನು ಮುಂದುವರಿಸುವ ಬದಲು ತಜ್ಞರ ಸಲಹೆ ಪಡೆಯುವುದು ಉತ್ತಮ.

ಕಣ್ಣಿನ ಮೇಕಪ್ ಅನ್ನು ಮರೆಯಬೇಡಿ

ಮುಖದ ಮೇಕಪ್‌ಗಿಂತ ಕಣ್ಣಿನ ಸುತ್ತ ಬಳಸುವ ಮಸ್ಕಾರಾ, ಐಲೈನರ್ ಮತ್ತು ಇತರ ಉತ್ಪನ್ನಗಳ ವಿಚಾರದಲ್ಲಿ ಹೆಚ್ಚು ಎಚ್ಚರಿಕೆ ಅಗತ್ಯ. ಅವುಗಳನ್ನು ತೆಗೆದುಹಾಕದೆ ಮಲಗಿದರೆ ಮೇಕಪ್‌ನ ಸಣ್ಣ ಕಣಗಳು ಕಣ್ಣಿಗೆ ಹೋಗಿ ಕಿರಿಕಿರಿ ಉಂಟುಮಾಡಬಹುದು. ಇದರಿಂದ ಕಣ್ಣುಗಳು ಕೂಡಾ ಕೆಂಪಾಗುತ್ತವೆ. ಕಣ್ಣಿನ ಸುತ್ತಲಿನ ಚರ್ಮ ಬಹಳ ಸೂಕ್ಷ್ಮವಾಗಿರುವುದರಿಂದ ಮೇಕಪ್ ತೆಗೆಯುವಾಗ ಬಲವಾಗಿ ಉಜ್ಜುವುದು ಕೂಡ ಸರಿಯಲ್ಲ. ನಿಧಾನವಾಗಿ ಸ್ವಚ್ಛಗೊಳಿಸುವುದು ಉತ್ತಮ. ಕಣ್ಣಿನ ಸುತ್ತಲಿನ ಮೇಕಪ್​ ಅನ್ನು ಸಾಮಾನ್ಯವಾಗಿ ಕೊಬ್ಬರಿ ಎಣ್ಣೆ ಹಾಗೂ ಹತ್ತಿ ಬಳಸಿ ತೆಗೆಯುವುದರಿಂದ ಯಾವುದೇ ರೀತಿಯ ತೊಂದರೆ ಉಂಟಾಗುವುದಿಲ್ಲ ಹಾಗೂ ಇದರಿಂದ ಕಣ್ಣನ್ನು ತಂಪಾಗಿಸಿಕೊಳ್ಳಲು ಸಹಾಯ ಮಾಡುತ್ತದೆ.

ರಾತ್ರಿ ಮೇಕಪ್ ತೆಗೆದುಹಾಕುವುದು ಏಕೆ ಮುಖ್ಯ?

ಮಲಗುವ ಮುನ್ನ ಮೇಕಪ್ ತೆಗೆದುಹಾಕುವುದರಿಂದ ಮುಖದ ಮೇಲಿರುವ ಮೇಕಪ್, ಬೆವರು ಮತ್ತು ದಿನವಿಡೀ ಜಮೆಯಾಗಿರುವ ಕೊಳೆಯನ್ನು ಸ್ವಚ್ಛಗೊಳಿಸಲು ಸಾಧ್ಯವಾಗುತ್ತದೆ. ನಂತರ ಚರ್ಮಕ್ಕೆ ಹೊಂದುವ ಫೇಸ್​ವಾಶ್ ಬಳಸಿ ಮುಖ ತೊಳೆಯಬೇಕು. ಅಗತ್ಯವಿದ್ದರೆ ತೇವಾಂಶ ಕಾಪಾಡುವ ಉತ್ಪನ್ನ ಬಳಸಬಹುದು. ಮೇಕಪ್ ತೆಗೆಯಲು ಬಳಸುವ ಉತ್ಪನ್ನವೂ ಚರ್ಮಕ್ಕೆ ಹೊಂದಿಕೆಯಾಗಬೇಕು. ಕಣ್ಣು ಅಥವಾ ಮುಖದ ಮೇಲೆ ತುಂಬಾ ಬಲವಾಗಿ ಉಜ್ಜುವುದನ್ನು ತಪ್ಪಿಸುವುದು ಮುಖ್ಯ.

ಒಂದು ರಾತ್ರಿ ಮರೆತರೆ ಏನಾಗುತ್ತದೆ?

ಒಂದು ದಿನ ದಣಿವಿನಿಂದ ಮೇಕಪ್ ತೆಗೆಯದೆ ಮಲಗಿದರೆ ತಕ್ಷಣವೇ ದೊಡ್ಡ ಸಮಸ್ಯೆ ಉಂಟಾಗುತ್ತದೆ ಎಂದು ಹೇಳಲಾಗುವುದಿಲ್ಲ. ಆದರೆ, ಇದನ್ನೇ ಪದೇಪದೆ ಮಾಡುವ ಅಭ್ಯಾಸ ಬೆಳೆಸಿಕೊಂಡರೆ ಚರ್ಮದ ಸಮಸ್ಯೆ ಹೆಚ್ಚಾಗುವ ಸಾಧ್ಯತೆ ಇದೆ. ಹೀಗಾಗಿ ಮೇಕಪ್ ಬಳಸುವುವಾಗ ಭಯಪಡುವ ಅಗತ್ಯವಿಲ್ಲ. ಮೇಕಪ್ ಹಾಕಿಕೊಳ್ಳುವುದು ಎಷ್ಟು ಮುಖ್ಯವೋ, ದಿನದ ಕೊನೆಯಲ್ಲಿ ಅದನ್ನು ಸರಿಯಾಗಿ ತೆಗೆದುಹಾಕುವುದೂ ಅಷ್ಟೇ ಮುಖ್ಯ. ಮಲಗುವ ಮುನ್ನ ಕೆಲವೇ ನಿಮಿಷಗಳನ್ನು ಚರ್ಮದ ಸ್ವಚ್ಛತೆಗೆ ಮೀಸಲಿಟ್ಟರೆ ಹಲವಾರು ಸಮಸ್ಯೆಗಳನ್ನು ತಪ್ಪಿಸಿಕೊಳ್ಳಲು ಸಹಾಯವಾಗಬಹುದು.

ಹೊಸ ಮೇಕಪ್ ಅಥವಾ ಚರ್ಮದ ಆರೈಕೆ ಉತ್ಪನ್ನ ಬಳಸಿದ ನಂತರ ನಿರಂತರವಾಗಿ ತುರಿಕೆ, ಉರಿ, ಊತ ಅಥವಾ ತೀವ್ರ ಕಿರಿಕಿರಿ ಕಂಡುಬಂದರೆ ಬಳಕೆ ನಿಲ್ಲಿಸಿ ಚರ್ಮ ತಜ್ಞರನ್ನು ಸಂಪರ್ಕಿಸುವುದು ಉತ್ತಮ.