ಪೋಷಕರ ಪಾತ್ರವೇನು..?
ಮಕ್ಕಳು ಅತಿಯಾಗಿ ಫೋನ್ ಬಳಸಲು ಪೋಷಕರು ಸಹ ಕಾರಣರಾಗಿದ್ದಾರೆ. ತಮ್ಮ ಕೆಲಸದ ಒತ್ತಡವನ್ನು ಕಡಿಮೆ ಮಾಡಿಕೊಳ್ಳಲು, ಮಕ್ಕಳು ಗಲಾಟೆ ಮಾಡದಿರಲಿ ಎಂಬ ಕಾರಣಕ್ಕೆ ಮತ್ತು ಅವರಿಗೆ ಬೇಗನೆ ಊಟ ಮಾಡಿಸಲು ಫೋನ್ ಕೈಗೆ ನೀಡುತ್ತಾರೆ. ಮತ್ತೊಂದೆಡೆ, ಮಕ್ಕಳು ತಮ್ಮ ಸುತ್ತಮುತ್ತಲಿನ ಹಿರಿಯರನ್ನು ನೋಡಿಯೇ ಪ್ರತಿಯೊಂದನ್ನೂ ಕಲಿಯುತ್ತಾರೆ. ಪೋಷಕರೇ ಇಡೀ ದಿನ ಫೋನ್ನಲ್ಲಿ ಮುಳುಗಿದ್ದಾಗ, ಮಕ್ಕಳು ಕೂಡ ಅದನ್ನೇ ಅನುಕರಿಸುತ್ತಾರೆ. ಮಕ್ಕಳಿಗೆ ಸೂಕ್ತ ಸಮಯ ನೀಡದೆ, ಅವರೊಂದಿಗೆ ಮಾತನಾಡದೆ ಅಥವಾ ಹೊರಾಂಗಣ ಆಟಗಳಿಗೆ ಪ್ರೋತ್ಸಾಹ ನೀಡದೆ ಫೋನ್ ನೀಡುವ ಮೂಲಕ ಪೋಷಕರೇ ಈ ಸಮಸ್ಯೆಗೆ ನೇರ ಹೊಣೆಯಾಗುತ್ತಾರೆ.
ಯಾವ ಪರಿಣಾಮ ಉಂಟುಮಾಡುತ್ತಿದೆ?
ಮಕ್ಕಳ ಬಾಲ್ಯ ಹೀಗೆಯೇ ಡಿಜಿಟಲ್ ಪರದೆಯೊಳಗೆ ಬಂಧಿಯಾಗುತ್ತಾ ಹೋದರೆ, ಮುಂದಿನ ಪೀಳಿಗೆಯು ನೈಜ ಭಾವನೆಗಳಿಲ್ಲದ ಯಂತ್ರಗಳಂತೆ ಬೆಳೆಯುವ ಅಪಾಯವಿದೆ. ಆಟದ ಮೈದಾನದಲ್ಲಿ ಸಿಗಬೇಕಿದ್ದ ದೈಹಿಕ ಶ್ರಮ, ಸೋಲು-ಗೆಲುವನ್ನು ಸಮನಾಗಿ ಸ್ವೀಕರಿಸುವ ಮನೋಭಾವ ಹಾಗೂ ಗೆಳೆಯರೊಂದಿಗಿನ ಸಹೋದರತ್ವದ ಭಾವನೆ ಎಲ್ಲವೂ ಮೆರೆಯಾಗಿ ಫೋನ್ ಸಿಗದಿದ್ದಾಗ ತೀವ್ರ ಹಠ ಮಾಡುವುದು, ಕೋಪಗೊಳ್ಳುವುದು ಮತ್ತು ಓದಿನಲ್ಲಿ ಏಕಾಗ್ರತೆ ಕಳೆದುಕೊಳ್ಳುವುದು ಸಾಮಾನ್ಯವಾಗುತ್ತಿದೆ. ಮೊಬೈಲ್ ಬಳಕೆ ಮಕ್ಕಳ ಶೈಕ್ಷಣಿಕ ಸಾಧನೆಯನ್ನು ಕುಗ್ಗಿಸುವುದಷ್ಟೇ ಅಲ್ಲದೆ, ಅವರನ್ನು ಸೈಬರ್ ಅಪಾಯಗಳು ಹಾಗೂ ಗೇಮಿಂಗ್ ದಾಸ್ಯಕ್ಕೆ ತಳ್ಳಿ ಅವರ ಭವಿಷ್ಯವನ್ನು ಹಾಳುಮಾಡುತ್ತಿದೆ.
ಫೋನ್ ಅಭ್ಯಾಸ ಹೇಗೆ ಕಡಿಮೆ ಮಾಡಬೇಕು?
ಪೋಷಕರು ಒಂದೇ ಬಾರಿಗೆ ಮಕ್ಕಳಿಂದ ಫೋನ್ ಕಸಿದುಕೊಳ್ಳಬೇಡಿ. ಅದು ಅವರ ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ. ಆದ್ದರಿಂದಲೇ ಮೊದಲು ನೀವು ಫೋನ್ ಬಳಕೆಯನ್ನು ಕಡಿಮೆ ಮಾಡಿ. ಊಟದ ಸಮಯ, ಮಲಗುವ ಕೋಣೆ ಮತ್ತು ರಾತ್ರಿ ಮಲಗುವ ಮುನ್ನ ಫೋನ್ ಬಳಕೆಯನ್ನು ಸಂಪೂರ್ಣವಾಗಿ ನಿಷೇಧಿಸಿ, ಆ ಸಮಯವನ್ನು ಕುಟುಂಬದೊಂದಿಗೆ ಕಳೆಯಲು ಮೀಸಲಿಡಿ. ಪ್ರತಿದಿನ ಸಂಜೆ ಮಕ್ಕಳನ್ನು ಹೊರಾಂಗಣ ಆಟಗಳಿಗೆ, ಸೈಕಲ್ ತುಳಿಯಲು ಅಥವಾ ನೆರೆಹೊರೆಯ ಮಕ್ಕಳ ಜೊತೆ ಬೆರೆಯಲು ಪ್ರೋತ್ಸಾಹಿಸುವುದು ಅತ್ಯಗತ್ಯ.
