ನಿಜಾರ್ಥದಲ್ಲಿ ಮನುಷ್ಯನಿಗೆ ಅಹಂಕಾರವೇ ನಿಜವಾದ ಶತ್ರು. ಎಲ್ಲವೂ ನನ್ನಿಂದಲೇ ಆಯಿತು, ನಾನಿಲ್ಲದಿದ್ದರೆ ನಡೆಯುವುದಿಲ್ಲ ಎಂಬ ಭಾವನೆ ವಿವೇಕಿಯಾದವನಿಗೆ ಉಚಿತವಲ್ಲ. ಅದಕ್ಕೆಂದೇ ಡಿವಿಜಿಯವರು, ‘ಭೂಮಿಯಿಂದ ಬೀಜ ಮೊಳಕೆಯೊಡೆದು ಪದರ ಸೀಳಿ ಹೊರಗೆ ಬರುವಾಗ ಯಾವುದೇ ಅಬ್ಬರವಿಲ್ಲದೆ ಚಿಗುರುತ್ತದೆ. ಮರದಲ್ಲಿ ಕಾಯಿಯೊಂದು ಹಣ್ಣಾಗುವಾಗ ಯಾವ ಆರ್ಭಟವನ್ನೂ ಮಾಡಿ ಹೇಳುವುದಿಲ್ಲ. ಸೂರ್ಯ ಚಂದ್ರರು ಬೆಳಕನ್ನು ನೀಡುವಾಗ ಅವರದೊಂದೂ ಸದ್ದಿಲ್ಲ. ಆದರೆ ನೀನು ಮಾತ್ರ ಅಲ್ಪ ಕಾರ್ಯ ಮಾಡಿ, ಏನೋ ಮಹಾ ಸಾಧನೆ ಮಾಡಿದೆನೆಂದು ಬೀಗುತ್ತಿರುವೆ. ಈ ರೀತಿಯಾದ ಭಾವವನ್ನು ತೊರೆದು, ನಿನ್ನ ತುಟಿಗಳನ್ನು ಹೊಲಿದುಕೊ’ ಎಂದು ಮಂಕುತಿಮ್ಮನ ಕಗ್ಗದಲ್ಲಿ ಕಿವಿಮಾತು ಹೇಳಿದ್ದಾರೆ. ಹಣ, ಸಂಪತ್ತು, ಕೀರ್ತಿ, ಆಯಸ್ಸು ಎಲ್ಲವೂ ಇಲ್ಲಿ ಕ್ಷಣಿಕ. ಯಾವುದೂ ಇಲ್ಲಿ ಶಾಶ್ವತವಲ್ಲ ಎಂಬುದನ್ನು ತಿಳಿದುಕೊಂಡವರು ಸಾರ್ಥಕ ಜೀವನದ ಹಾದಿಯಲ್ಲಿ ಸಾಗಬಹುದು.
