ಆಧುನಿಕ ವೈದ್ಯಪದ್ಧತಿಯ ಪ್ರಕಾರ, ಇದು ಕೇವಲ ಸಂಧಿಗಳಿಗಷ್ಟೇ ಅಲ್ಲದೆ ಹೃದಯ, ಮೂತ್ರಪಿಂಡ, ಚರ್ಮ, ಕಣ್ಣುಗಳು ಮತ್ತು ಶ್ವಾಸಕೋಶಗಳಲ್ಲೂ ಸಮಸ್ಯೆಯನ್ನು ತರಬಹುದು. ಹಾಗಾಗಿ ಈ ಸಮಸ್ಯೆ ಬರಲು ದೊಡ್ಡ ಕಾರಣ ಎಂದು ಹೇಳಲಾಗುವ ಮಾನಸಿಕ ಒತ್ತಡವನ್ನು ಕಡಿಮೆ ಮಾಡಿಕೊಳ್ಳಬೇಕು. ಹಗಲುನಿದ್ದೆ, ತಂಪು ಪಾನೀಯಗಳು, ಅತಿಯಾದ ಹವಾನಿಯಂತ್ರಕದ ಬಳಕೆ, ಜಂಕ್ಫುಡ್ಗಳ ಸೇವನೆ, ಧೂಮಪಾನ, ಕರಿದ ಪದಾರ್ಥಗಳ ಸೇವನೆಯನ್ನು ಕಡಿಮೆ ಮಾಡಬೇಕು. ಶುಂಠಿ, ಹಿಪ್ಪಲಿ, ಕಾಳುಮೆಣಸು, ಚಕ್ಕೆ (ದಾಲ್ಚಿನ್ನಿ), ಜೀರಿಗೆ, ಲವಂಗ ಮುಂತಾದ ಎಲ್ಲ ರೀತಿಯ ಸಾಂಬಾರಪದಾರ್ಥಗಳನ್ನು ಹೆಚ್ಚಾಗಿ ಸೇವಿಸಬೇಕು. ಅರಿಶಿಣ, ನೆಲ್ಲಿಕಾಯಿ, ಮೂಲಂಗಿ, ನುಗ್ಗೆಸೊಪ್ಪು, ಹಾಗಲಕಾಯಿ, ಇಂಗು, ಬಾರ್ಲಿ, ಹುರುಳಿಗಳಂತಹ ಸುಲಭವಾಗಿ ಜೀರ್ಣವಾಗುವ ಮತ್ತು ಉಷ್ಣಗುಣವಿರುವ ಆಹಾರಗಳು ಹೆಚ್ಚು ಪ್ರಯೋಜನಕಾರಿ. ಆಮವಾತದ ಪ್ರಾರಂಭಾವಸ್ಥೆಯಲ್ಲಿ ಅಂದರೆ ಜ್ವರ ಬಂದು ಗಂಟುಗಳಲ್ಲಿ ನೋವು, ಬಿಗಿತ ಉಂಟಾಗಲು ಪ್ರಾರಂಭವಾದಾಗ ಎರಡೆರಡು ಗ್ರಾಂ ಅಮೃತಬಳ್ಳಿ, ಶುಂಠಿ, ಹಿಪ್ಪಲಿ ಮತ್ತು ಜೀರಿಗೆಗಳನ್ನು ಹಾಕಿ ನಾಲ್ಕು ಲೋಟ ನೀರಿನಲ್ಲಿ ಕುದಿಸಿ ಒಂದು ಲೋಟಕ್ಕೆ ಇಳಿಸಿ ಖಾಲಿ ಹೊಟ್ಟೆಯಲ್ಲಿ ಕುಡಿಯಬೇಕು.
