ಟೀಮ್ ಇಂಡಿಯಾ ಕೋಚ್​ ಹುದ್ದೆಯಿಂದ ನಿರ್ಗಮಿಸಿದ ರೀತಿಗೆ ಅನಿಲ್​ ಕುಂಬ್ಳೆ ಬೇಸರ

ಬೆಂಗಳೂರು: ಭಾರತೀಯ ಕ್ರಿಕೆಟ್​ ಇತಿಹಾಸ ಕಂಡ ಯಶಸ್ವಿ ಬೌಲರ್​ ಎನಿಸಿರುವ ಸ್ಪಿನ್​ ದಿಗ್ಗಜ ಅನಿಲ್​ ಕುಂಬ್ಳೆ, ನಾಯಕರಾಗಿ ಉತ್ತಮ ನಿರ್ವಹಣೆ ತೋರಿದ್ದರು. ಬಳಿಕ ಭಾರತ ತಂಡದ ಮುಖ್ಯ ಕೋಚ್​ ಆಗಿಯೂ ಒಂದು ವರ್ಷ ಕಾಲ ಕಾರ್ಯನಿರ್ವಹಿಸಿದ್ದರು. ಈ ಅವಧಿಯ ಬಗ್ಗೆ ತಮಗೆ ಯಾವುದೇ ವಿಷಾದವಿಲ್ಲ ಎಂದಿರುವ ಕನ್ನಡಿಗ ಅನಿಲ್​ ಕುಂಬ್ಳೆ, ಹುದ್ದೆಯಿಂದ ತಾವು ನಿರ್ಗಮಿಸಿದ ರೀತಿಯ ಬಗ್ಗೆ ಮಾತ್ರ ಬೇಸರ ಹೊಂದಿದ್ದಾರೆ.

ಆ ಒಂದು ವರ್ಷದಲ್ಲಿ ನಾವು ಉತ್ತಮ ನಿರ್ವಹಣೆಯನ್ನೇ ತೋರಿದ್ದೆವು. ತಂಡದ ಯಶಸ್ಸಿಗೆ ಕೆಲ ಕೊಡುಗೆಗಳನ್ನು ನೀಡಿದ ಬಗ್ಗೆ ನನಗೆ ತುಂಬ ಖುಷಿ ಇದೆ. ಆ ಬಗ್ಗೆ ಯಾವುದೇ ವಿಷಾದಗಳಿಲ್ಲ. ಆ ಬಳಿಕ ನಾನು ಅಲ್ಲಿಂದ ಮುಂದಕ್ಕೆ ಹೋಗಲು ಖುಷಿಯಿಂದಲೇ ಸಿದ್ಧವಾಗಿದ್ದೆ. ಹುದ್ದೆಯಿಂದ ನನ್ನ ನಿರ್ಗಮನ ಉತ್ತಮವಾಗಿರಬಹುದಾಗಿತ್ತು. ಆದರೆ ಅದನ್ನೂ ಓಕೆ ಎನ್ನುವೆ. ಕೋಚ್​ ಆಗಿ ಯಾವಾಗ ಹುದ್ದೆಯಿಂದ ನಿರ್ಗಮಿಸಬೇಕು ಎಂಬ ಬಗ್ಗೆ ತಿಳಿದಿರಬೇಕು ಎಂದು ಅನಿಲ್​ ಕುಂಬ್ಳೆ ಅವರು ಜಿಂಬಾಬ್ವೆಯ ಮಾಜಿ ಕ್ರಿಕೆಟಿಗ ಪೊಮ್ಮಿ ಎಂಬಾಗ್ವಾ ಜತೆಗಿನ ಆನ್​ಲೈನ್​ ಮಾತುಕತೆಯ ವೇಳೆ ಹೇಳಿದ್ದಾರೆ.

ಇದನ್ನೂ ಓದಿ: ಶ್ರೀಲಂಕಾ ಕ್ರಿಕೆಟ್​ ಆಟಗಾರ್ತಿ ವೀರಕ್ಕೋಡಿ ವಿದಾಯ

49 ವರ್ಷದ ಅನಿಲ್​ ಕುಂಬ್ಳೆ 2017ರ ಚಾಂಪಿಯನ್ಸ್​ ಟ್ರೋಫಿ ಫೈನಲ್​ ಸೋಲಿನ ಬಳಿಕ ಕೋಚ್ ಹುದ್ದೆಯಿಂದ ಕೆಳಗಿಳಿದಿದ್ದರು. ಪಾಕಿಸ್ತಾನ ವಿರುದ್ಧ ಕಂಡ ಈ ಸೋಲಿಗಿಂತ ನಾಯಕ ವಿರಾಟ್​ ಕೊಹ್ಲಿ ಜತೆಗಿನ ಭಿನ್ನಾಭಿಪ್ರಾಯ ಅವರ ನಿರ್ಗಮನಕ್ಕೆ ಪ್ರಮುಖ ಕಾರಣವಾಗಿತ್ತು. ವಿರಾಟ್​ ಕೊಹ್ಲಿ ಆಗ ಕುಂಬ್ಳೆ ವಿರುದ್ಧ ಬಹಿರಂಗವಾಗಿ ಬಂಡಾಯವೆದ್ದಿದ್ದರು ಮತ್ತು ಅವರು ಹುದ್ದೆಯಲ್ಲಿ ಮುಂದುವರಿಯುವುದಕ್ಕೆ ಬಲವಾದ ವಿರೋಧ ವ್ಯಕ್ತಪಡಿಸಿದ್ದರು.

ಭಾರತ ತಂಡದ ಕೋಚ್​ ಹುದ್ದೆಯನ್ನು ಅಲಂಕರಿಸಿದ್ದ ಖುಷಿ ನನಗಿದೆ. ಭಾರತ ತಂಡದೊಂದಿಗೆ ನಾನು ಕಳೆದ ಆ ಒಂದು ವರ್ಷ ನಿಜಕ್ಕೂ ಅಮೋಘವಾಗಿತ್ತು. ಭಾರತ ತಂಡದ ಪರ ಮೈದಾನದಲ್ಲಿ ಉತ್ತಮ ನಿರ್ವಹಣೆ ತೋರಿದ ಬಳಿಕ ಮತ್ತೊಮ್ಮೆ ತಂಡದ ಡ್ರೆಸ್ಸಿಂಗ್ ರೂಂಗೆ ಮರಳಿದ್ದು ನಿಜಕ್ಕೂ ಶ್ರೇಷ್ಠ ಅನುಭವ ಎಂದು ಭಾರತ ಪರ 132 ಟೆಸ್ಟ್​ಗಳಲ್ಲಿ 619 ವಿಕೆಟ್​ ಮತ್ತು 271 ಏಕದಿನ ಪಂದ್ಯಗಳಲ್ಲಿ 337 ವಿಕೆಟ್​ ಕಬಳಿಸಿರುವ ಕುಂಬ್ಳೆ ಹೇಳಿದ್ದಾರೆ. ಕುಂಬ್ಳೆ ಕೋಚ್​ ಆಗಿದ್ದ ಒಂದು ವರ್ಷ ಅವಧಿಯಲ್ಲಿ ಭಾರತ ತಂಡ ಟೆಸ್ಟ್​ ಕ್ರಿಕೆಟ್​ನಲ್ಲಿ ಸಂಪೂರ್ಣ ಪ್ರಾಬಲ್ಯ ಸಾಧಿಸಿತ್ತು. ಭಾರತ ತಂಡ ಆ ಅವಧಿಯಲ್ಲಿ ಆಡಿದ 17 ಟೆಸ್ಟ್​ಗಳಲ್ಲಿ ಕೇವಲ 1ರಲ್ಲಿ ಸೋಲು ಕಂಡಿತ್ತು.

ಇದನ್ನೂ ಓದಿ: ಎಂಎಸ್​ಡಿ ಎಂದರೆ ಧೋನಿ ಅಲ್ಲ, ಹೊಸ ಅರ್ಥ ನೀಡಿದ್ದಾರೆ ಪೊಲೀಸರು!

ಕುಂಬ್ಳೆ ಅವರು ಈಗ ಕಿಂಗ್ಸ್​ ಇಲೆವೆನ್​ ಪಂಜಾಬ್​ ತಂಡದ ಮುಖ್ಯ ತರಬೇತುದಾರರಾಗಿದ್ದು, ಮುಂಬರುವ ಐಪಿಎಲ್​ ಟೂರ್ನಿಯ ವೇಳೆ ಮತ್ತೆ ಕೋಚ್​ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ಇವರ ತಂಡಕ್ಕೆ ಕನ್ನಡಿಗ ಕೆಎಲ್​ ರಾಹುಲ್​ ನಾಯಕರಾಗಿದ್ದು, ಮಯಾಂಕ್​ ಅಗರ್ವಾಲ್​, ಕರುಣ್​ ನಾಯರ್​, ಕೆ. ಗೌತಮ್​ ಸಹಿತ ಕರ್ನಾಟಕದ ಪ್ರಮುಖ ಆಟಗಾರರೂ ಈ ತಂಡದಲ್ಲಿದ್ದಾರೆ.

https://www.vijayavani.net/anil-kumbles-son-mayas-is-fond-of-living-in-the-forest/