ಸಿಸಿಎಲ್​ 2024: ಕಿಚ್ಚನ ಮೋಜಿನ ಕ್ಷಣಗಳಿಗೆ ಫ್ಯಾನ್ಸ್​ ಫಿದಾ! ಶಾರ್ಜಾದಲ್ಲಿ ರಾರಾಜಿಸಿದ ಕನ್ನಡ ಬಾವುಟ

ದುಬೈ/ಬೆಂಗಳೂರು: ನಟ ಕಿಚ್ಚ ಸುದೀಪ್​ "ಮ್ಯಾಕ್ಸ್​" ಚಿತ್ರದ ಶೂಟಿಂಗ್​ನಿಂದ ಬಿಡುವು ಪಡೆದುಕೊಂಡು ಸದ್ಯ ಸೆಲೆಬ್ರಿಟಿ ಕ್ರಿಕೆಟ್​ ಲೀಗ್​ (ಸಿಸಿಎಲ್​)ನಲ್ಲಿ ಬಿಜಿಯಾಗಿದ್ದಾರೆ. ನಿನ್ನೆ ಶಾರ್ಜಾ ಕ್ರಿಕೆಟ್​ ಮೈದಾನದಲ್ಲಿ ನಡೆದ ತಮ್ಮ ತಂಡದ ಮೊದಲ ಪಂದ್ಯದಲ್ಲಿ ಮುಂಬೈ ಹೀರೋಸ್​ ವಿರುದ್ಧ ಅದ್ಭುತ ಗೆಲುವು ದಾಖಲಿಸಿರುವ ಖುಷಿಯಲ್ಲಿ ಕರ್ನಾಟಕ ಬುಲ್ಡೋಜರ್ಸ್​ ತಂಡವಿದೆ. ಇದರ ನಡುವೆ ನಟ ಸುದೀಪ್​ ಅವರ ವಿಶೇಷ ಹಾಗೂ ಮೋಜಿನ ಕ್ಷಣಗಳ ವಿಡಿಯೋ ತುಣುಕು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ಅಭಿಮಾನಿಗಳ ಮನ ಸೆಳೆದಿದೆ.

ಮೊದಲ ಪಂದ್ಯವನ್ನು 38 ರನ್​ಗಳ ಅಂತರದಿಂದ ಕರ್ನಾಟಕ ಬುಲ್ಡೋಜರ್ಸ್​ ಗೆದ್ದುಕೊಂಡಿದೆ. ಮೊದಲು ಬ್ಯಾಟ್​ ಮಾಡಿ ಕಿಚ್ಚನ ತಂದೆ ಮೊದಲ ಇನ್ನಿಂಗ್ಸನ್​ನ 10 ಓವರ್​ಗಳಲ್ಲಿ 9 ವಿಕೆಟ್​ ನಷ್ಟಕ್ಕೆ 70 ರನ್​ ಕಲೆಹಾಕಿರು. ಗುರಿ ಬೆನ್ನತ್ತಿದ ಮುಂಬೈ ಹೀರೋಸ್​ 10 ಓವರ್​ಗಳಲ್ಲಿ 3 ವಿಕೆಟ್​ ನಷ್ಟಕ್ಕೆ 76 ರನ್​ ಕಲೆಹಾಕುವ ಮೂಲಕ 6 ರನ್​ಗಳ ಮುನ್ನಡೆ ಸಾಧಿಸಿತು. ಬಳಿಕ ಎರಡನೇ ಇನ್ನಿಂಗ್ಸ್​ ಆರಂಭಿಸಿದ ಕರ್ನಾಟಕ ಬುಲ್ಡೋಜರ್ಸ್​ 3 ವಿಕೆಟ್​ ನಷ್ಟಕ್ಕೆ 10 ಓವರ್​ಗಳಲ್ಲಿ 129 ರನ್​ ಕಲೆಹಾಕಿತು. ಗುರಿಬೆನ್ನತ್ತಿದ ಮುಂಬೈ 10 ಓವರ್​ಗಳಲ್ಲಿ 8 ವಿಕೆಟ್​ ನಷ್ಟಕ್ಕೆ 85 ರನ್​ ಕಲೆಹಾಕಿತು. ಅಂತಿಮವಾಗಿ 38 ರನ್​ಗಳ ಅಂತರದಿಂದ ಸೋಲುಂಡಿತು.

ಇಡೀ ಪಂದ್ಯದ ಸಾಕಷ್ಟು ವಿಶೇಷ ಕ್ಷಣಗಳಿಗೆ ಸಾಕ್ಷಿಯಾಯಿತು. ಅದರಲ್ಲೂ ನಟ ಸುದೀಪ್​ ಎಲ್ಲ ಫೇವರಿಟ್​ ಆದರು. ಅಲ್ಲದೆ, ತಮ್ಮ ಮೋಜಿನ ಆಟದಿಂದಲೇ ಟ್ವಿಟರ್​ನಲ್ಲಿ ಟ್ರೆಂಡ್​ ಸಹ ಆದರು. ಚಪ್ಪಾಳೆ ತಟ್ಟಿ ಕುಣಿದುಕುಪ್ಪಳಿಸುವ ಮೂಲಕ ತಂಡವನ್ನು ಹುರಿದುಂಬಿಸಿದರು. ಅಲ್ಲದೆ, ಗೆಲುವಿನ ಖುಷಿಯಲ್ಲಿ ಡಗೌಟ್​ನಲ್ಲಿ ಕಿರುಚಾಡಿ ಸಂಭ್ರಮಿಸುವ ಮೂಲಕ ಕ್ರಿಕೆಟ್​ ಮೇಲಿನ ತಮ್ಮ ಅಭಿಮಾನ ಎಂಥದ್ದು ಎಂದು ತೋರಿಸಿದರು. ಡೈವ್​ ಹೊಡೆದ ಫೀಲ್ಡಿಂಗ್​ ಮಾಡುವ ಮೂಲಕವೂ ಸುದೀಪ್​ ಅಭಿಮಾನಿಗಳ ಗಮನ ಸೆಳೆದರು. ಯುಎಇ ಮೈದಾನದಲ್ಲಿ ಕನ್ನಡದ ಬಾವುಟ ಹಾರಿಸುವ ಮೂಲಕ ಮತ್ತೊಮ್ಮೆ ಕನ್ನಡ ಪ್ರೇಮವನ್ನು ಮೆರೆದರು.

ಬಾಲಿವುಡ್​ ಸುಲ್ತಾನ್​ ಸಲ್ಮಾನ್​ ಖಾನ್ ಜತೆಗಿನ ಕಿಚ್ಚ ಸುದೀಪ್​ ಒಡೆನಾಟ ನಿಮಗೆಲ್ಲ ತಿಳಿದೇ ಇದೆ. ಸಿಸಿಎಲ್​ ಉದ್ಘಾಟನೆ ವೇಳೆ ಸಲ್ಮಾನ್​ ಖಾನ್​ ಮತ್ತು ಕಿಚ್ಚ ಪರಸ್ಪರ ಅಪ್ಪಿಕೊಳ್ಳುವ ಮೂಲಕ ಆತ್ಮೀಯತೆ ಮೆರೆದರು. ಇನ್ನೂ ನಟಿ ಜೆನಿಲಿಯಾ ಡಿಸೋಜ ಹಾಗೂ ರಿತೇಶ್ ದೇಶಮುಖ್ ದಂಪತಿ ಹಾಗೂ ಕಿಚ್ಚ ಸುದೀಪ್​ ನಡುವೆ ಒಳ್ಳೆಯ ಬಾಂದವ್ಯ ಇರುವುದು ನಿಮಗೆಲ್ಲರಿಗೂ ತಿಳಿದಿದೆ. ಸಿಸಿಎಲ್​ ವೇಳೆಯೂ ಇದು ಸಾಬೀತಾಯಿತು. ಕಿಚ್ಚನ್ನು ನೋಡಿದ ಜನಿಲಿಯಾ ಓಡಿ ಬಂದು ಅಪ್ಪಿಕೊಂಡರು. ಬಳಿಕ ಇಬ್ಬರು ಕ್ಯಾಮೆರಾಗೆ ಪೋಸ್​ ನೀಡಿದರು.

ಶಾರ್ಜಾದಲ್ಲಿ ಕನ್ನಡದ ಬಾವುಟ ರಾರಾಜಿಸಿದ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ಅನಿವಾಸಿ ಕನ್ನಡಿಗರು ಪಂದ್ಯವನ್ನು ಕಣ್ತುಂಬಿಕೊಳ್ಳುವ ಮೂಲಕ ಕಿಚ್ಚನ ತಂಡಕ್ಕೆ ಬೆಂಬಲ ನೀಡಿದರು. ಇದೇ ಸಂದರ್ಭದಲ್ಲಿ ಕಿಚ್ಚ, ಕನ್ನಡಿಗರತ್ತ ಕೈಬೀಸುವ ಮೂಲಕ ತಮ್ಮ ಪ್ರೀತಿಯನ್ನು ವ್ಯಕ್ತಪಡಿಸಿದರು. ಹೀಗೆ ಸಾಕಷ್ಟು ಕ್ಷಣಗಳಿಗೆ ಸಿಸಿಎಲ್​ ಸಾಕ್ಷಿಯಾಯಿತು.

https://www.vijayavani.net/this-is-a-craze-that-only-rcb-players-can-get-viral-video

https://www.vijayavani.net/prashanth-neel-vs-shah-rukh-khan-interesting-contest