ಉಡುಪಿಯಲ್ಲಿ ಗುಂಪುಗಳ ನಡುವೆ ಡೆಡ್ಲಿ ಗ್ಯಾಂಗ್​ವಾರ್​; ಭಯಾನಕ ವಿಡಿಯೋ ವೈರಲ್​

ಉಡುಪಿ: ಶಾಂತಿ ಸೌಹಾರ್ದತೆಗೆ ಹೆಸರುವಾಸಿಯಾಗಿರುವ ಉಡುಪಿಯಲ್ಲಿ ಪುಂಡ-ಪೋಕರಿಗಳ ಗುಂಪೊಂದು ನಡು ರಸ್ತೆಯಲ್ಲೇ ಬಡಿದಾಡಿಕೊಂಡಿದ್ದು, ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ. ಮೇ 18ರಂದು ಘಟನೆ ನಡೆದಿದ್ದು, ಗ್ಯಾಂಗ್​ವಾರ್​ನ ಭಯಾನಕ ವಿಡಿಯೋ ನೋಡಿ ಜನರು ಭಯಬಿದ್ದಿದ್ದಾರೆ.

ಪ್ರಕರಣ ಸಂಬಂಧ ಪೊಲೀಸರು ಮೂವರನ್ನು ವಶಕ್ಕೆ ಪಡೆದಿದ್ದು, ಬಂಧಿತರಿಂದ 2 ಸ್ವಿಫ್ಟ್​ ಕಾರು, ತಲವಾರ್ ಹಾಗೂ ಡ್ರ್ಯಾಗರ್​ಅನ್ನು ವಶಕ್ಕೆ ಪಡೆದಿದ್ದಾರೆ. ಉಡುಪಿ ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮೇ 18ರಂದು ಘಟನೆ ನಡೆದಿದ್ದು, ಯಾವ ಸಿನಿಮಾ ದೃಶ್ಯಕ್ಕೂ ಕಡಿಮೆ ಇಲ್ಲ ಎಂಬಂತೆ ಎರಡು ತಂಡಗಳು ಹೊಡೆದಾಡಿಕೊಂಡಿವೆ. ಬಿಳಿ ಮತ್ತು ಕಪ್ಪು ಬಣ್ಣದ ಕಾರ್‌ಗಳಲ್ಲಿ ಇದ್ದ ಎರಡು ತಂಡಗಳು ರಸ್ತೆ ಮಧ್ಯದಲ್ಲಿ ಜಗಳ ಮಾಡಿಕೊಂಡಿದ್ದು, ಈ ವೇಳೆ ಗಲಾಟೆ ತಾರಕಕ್ಕೇರಿ ಕಾರ್‌ನಿಂದ ಇನ್ನೊಂದು ಕಾರ್‌ಗೆ ಒಂದು ತಂಡ ಗುದ್ದಿದೆ. ಆಗ ವಿರೋಧಿ ಗ್ಯಾಂಗ್‌ನ ಒಬ್ಬ ಸದಸ್ಯ ಮತ್ತೊಂದು ತಂಡದ ಮೇಲೆ ತಲವಾರ್ ಬೀಸಿದ್ದಾನೆ. ಆತ ಬೀಸಿದ ತಲವಾರ್ ಏಟು ಕಾರ್‌ಗೆ ಬಿದ್ದು ಕಾರ್ ಗಾಜು ಪುಡಿ ಪುಡಿಯಾಗಿದೆ.

ಇದನ್ನೂ ಓದಿ: ಛತ್ರಿ ಹಿಡಿದು ಚಾಲಕನ ಬಸ್​ ಸವಾರಿ; NWKRTC ಕೊಟ್ಟ ಸ್ಪಷ್ಟನೆ ಹೀಗಿದೆ

ಈ ವೇಳೆ ಸಿಟ್ಟಿಗೆದ್ದ ಆ ಗ್ಯಾಂಗ್‌ ಕಾರ್‌ನ್ನು ಮುಂದಕ್ಕೆ ಚಲಾಯಿಸಿ ವಾಪಸ್ ಬಂದು ಮತ್ತೆ ವಿರೋಧಿ ಗ್ಯಾಂಗ್‌ನ ಕಾರ್‌ಗೆ ಗುದ್ದಿದೆ. ಅಷ್ಟೇ ಅಲ್ಲದೇ ವೇಗವಾಗಿ ಕಾರ್ ಚಲಾಯಿಸಿ ಆ ಗ್ಯಾಂಗ್‌ನ ಸದಸ್ಯನೊಬ್ಬನ ಮೇಲೆ ಕಾರ್ ಹರಿಸಿದ್ದಾರೆ. ಕಾರ್ ಹರಿಸಿದ ವೇಗಕ್ಕೆ ಆತ ಅಲ್ಲೇ ಪ್ರಜ್ಞೆ ತಪ್ಪಿ ಬಿದ್ದಿದ್ದಾನೆ. ಇದೀಗ ಈ ಗ್ಯಾಂಗ್​ವಾರ್‌ನ ವಿಡಿಯೋ ವೈರಲ್ ಆಗಿದ್ದು, ಉಡುಪಿ ನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡುರಸ್ತೆಯಲ್ಲಿ ತಲವಾರು ಹಿಡಿದು ಹೊಡೆದಾಟ ನಡೆಸಿದ ಘಟನೆ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ರಾಜ್ಯದಲ್ಲಿ ಕಾನೂನು ಸುವ್ಯವಸ್ಥೆ ಕುರಿತಾದ ಪ್ರಶ್ನೆಗಳು ಉದ್ಭವಿಸಿದೆ.

ಸುದ್ದಿ ಮೂಲಗಳ ಪ್ರಕಾರ ಕಾರು ಮಾರಾಟಕ್ಕೆ ಸಂಬಂಧಿಸಿದಂತೆ ಈ ಗ್ಯಾಂಗ್ ವಾರ್ ನಡೆದಿದೆ ಎನ್ನಲಾಗಿದ್ದು, ಗರುಡ ಎಂಬ ಹೆಸರಿನ ಮುಸ್ಲಿಂ ಸಮುದಾಯಕ್ಕೆ ಸೇರಿದ ಎರಡು ಗ್ಯಾಂಗ್‌ಗಳ ನಡುವೆ ಈ ಗ್ಯಾಂಗ್ ವಾರ್ ನಡೆದಿದೆ ಎಂದು ತಿಳಿದು ಬಂದಿದೆ. ಪ್ರಕರಣ ದಾಖಲಿಸಿಕೊಂಡಿರುವ ಉಡುಪಿ ಪೊಲೀಸರು ಮೂವರನ್ನು ವಶಕ್ಕೆ ಪಡೆದಿದ್ದಾರೆ. ಉಳಿದವರಿಗೆ ಹುಡುಕಾಟ ನಡೆಸುತ್ತಿದ್ದಾರೆ.

https://www.vijayavani.net/cm-siddaramaiah-reacts-regarding-lock-up-death-case

https://www.vijayavani.net/thats-where-we-lost-sanju-samson-pinpoints-reason-after-rrs-yet-another-playoffs-heart-break