ಕಾನ್ಪುರ ಪೊಲೀಸ್ ಹತ್ಯೆ ಪ್ರಕರಣ; ತನಿಖೆ ನಡೆದಷ್ಟೂ ಪೊಲೀಸರೇ ಸಿಕ್ಕಿಬೀಳುತ್ತಿದ್ದಾರೆ...!

ಕಾನ್ಪುರ: ಇಲ್ಲಿನ 8 ಪೊಲೀಸರ ಹತ್ಯೆ ಪ್ರಕರಣದ ತನಿಖೆ ಚುರುಕಾಗಿ ಸಾಗುತ್ತಿದ್ದು, ನಿನ್ನೆ ಪೊಲೀಸರು ಪ್ರಮುಖ ಆರೋಪಿ, ಗ್ಯಾಂಗ್​ಸ್ಟರ್​ ವಿಕಾಸ್​ ದುಬೆಯ ಸಹಚರ ದಯಾ ಶಂಕರ್​ ಅಗ್ನಿಹೋತ್ರಿಯನ್ನು ಬಂಧಿಸಿ, ವಿಚಾರಣೆಗೆ ಒಳಪಡಿಸಿದ್ದಾರೆ.

ವಿಕಾಸ್​ ದುಬೆಗೆ ಪೊಲೀಸ್​ ವಲಯದಲ್ಲೇ ಹಲವು ಜನರ ಹಿಂಬಾಲಕರು ಇದ್ದಾರೆ. ಬಂಧನದ ಮಾಹಿತಿಯನ್ನು ಚೌಬೆಪುರ ಪೊಲೀಸ್ ಠಾಣೆಯಿಂದಲೇ ಕರೆ ಮಾಡಿ ತಿಳಿಸಲಾಗಿತ್ತು. ಹಾಗಾಗಿ ಮೊದಲೇ ವಿಕಾಸ್​ ದುಬೆ ತನ್ನ ಜನರನ್ನು, ಮಾರಕಾಸ್ತ್ರಗಳನ್ನು ಸಿದ್ಧಪಡಿಸಿದ್ದ ಎಂದು ಅಗ್ನಹೋತ್ರಿ ತಿಳಿಸಿದ್ದ.

ಇದೀಗ ಈ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮೂವರು ಪೊಲೀಸ್ ಸಿಬ್ಬಂದಿಯನ್ನು ಅಮಾನತು ಮಾಡಲಾಗಿದೆ. ಇಬ್ಬರು ಸಬ್​ ಇನ್ಸ್​ಪೆಕ್ಟರ್​ಗಳು ಹಾಗೂ ಓರ್ವ ಪೇದೆಯನ್ನು ಸಸ್ಪೆಂಡ್​ ಮಾಡಿ ಆದೇಶ ಹೊರಡಿಸಲಾಗಿದೆ. ಸಬ್​ ಇನ್ಸ್​​ಪೆಕ್ಟರ್​​ಗಳಾದ ಕನ್ವರ್​ಪಾಲ್​, ಕೃಷ್ಣಕುಮಾರ್​ ಶರ್ಮಾ ಮತ್ತು ಪೇದೆ ರಾಜೀವ್​ ಎಂಬುವರನ್ನು ಕರ್ತವ್ಯ ಲೋಪದ ಆರೋಪದಡಿ ಅಮಾನತು ಮಾಡಲಾಗಿದೆ. ವಿಚಾರಣೆಯನ್ನೂ ಪ್ರಾರಂಭಿಸಲಾಗಿದೆ ಎಂದು ಕಾನ್ಪುರ ಎಸ್​ಎಸ್​ಪಿ ದಿನೇಶ್​ ಕುಮಾರ್​ ತಿಳಿಸಿದ್ದಾರೆ. ಇದನ್ನೂ ಓದಿ: ಎಂಟು ಪೊಲೀಸರನ್ನು ಕೊಂದ ವಿಕಾಸ್​ ದುಬೆಯದ್ದು ಮನೆಯಲ್ಲ, ಮದ್ದುಗುಂಡಿನ ಕಾರ್ಖಾನೆ; ಇಡೀ ಪ್ರದೇಶ ಸ್ಫೋಟಕ್ಕೆ ಸಂಚು

8 ಪೊಲೀಸರ ಹತ್ಯೆ ಪ್ರಕರಣದ ವಿಚಾರಣೆಯಲ್ಲಿ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಸ್ವತಃ ಗಮನಹರಿಸುತ್ತಿದ್ದಾರೆ. ಈಗಾಗಲೇ ಚೌಬೇಪುರ ಠಾಣಾಧಿಕಾರಿ ವಿನಯ್​ ತಿವಾರಿ ಎಂಬುವರನ್ನು ಅಮಾನತು ಮಾಡಿ, ವಿಚಾರಣೆಗೆ ಒಳಪಡಿಸಲಾಗಿದೆ. ಈ ಪೊಲೀಸ್​ ಎನ್​ಕೌಂಟರ್​ ಪ್ರಕರಣವನ್ನು ಬಗೆದಷ್ಟೂ ಪೊಲೀಸ್​ ಸಿಬ್ಬಂದಿಯ ಕಾಲಬುಡಕ್ಕೇ ಬರುತ್ತಿದೆ. ಅದಿನ್ನೆಷ್ಟು ಜನರ ಕೈವಾಡ ಇದೆಯೋ ಎಂಬ ಅನುಮಾನ ವ್ಯಕ್ತವಾಗಿದೆ. (ಏಜೆನ್ಸೀಸ್​)

https://www.vijayavani.net/kill-my-son-in-encounter-for-police-deaths-says-gangster-vikas-dubeys-mother/