ಸುಶಾಂತ್​ಗೆ ಬಕೆಟ್​ ಹಿಡಿಯುವುದು ಗೊತ್ತಿರಲಿಲ್ಲ ... ಅದಕ್ಕೆ ಹೀಗಾಯ್ತು ಅಂತಾರೆ ಕಂಗನಾ

ಸುಶಾಂತ್​ ಸಿಂಗ್​ ರಜಪೂತ್​ ಆತ್ಮಹತ್ಯೆ ಮಾಡಿಕೊಂಡ ದಿನದಿಂದ ಅವರ ಪರವಾಗಿ ಗಟ್ಟಿಯಾಗಿ ನಿಂತವರು ಕಂಗನಾ ರಣಾವತ್​. ಬಾಲಿವುಡ್​ನಲ್ಲಿ ನೆಪೋಟಿಸಂ (ಸ್ವಜನಪಕ್ಷಪಾತ) ಹೇಗೆ ಕೆಲಸ ಮಾಡುತ್ತಿದೆ ಮತ್ತು ಸುಶಾಂತ್​ ಅದಕ್ಕೆ ಹೇಗೆ ಬಲಿಯಾದರು ಎಂಬುದನ್ನು ಅವರು ಪದೇಪದೇ ಆರೋಪ ಮಾಡುತ್ತಾ ಬಂದಿದ್ದಾರೆ. ಒಂದೊಮ್ಮೆ ತಮ್ಮ ಮಾತುಗಳನ್ನು ಪ್ರೂವ್​ ಮಾಡುವುದಕ್ಕೆ ಸಾಧ್ಯವಾಗದಿದ್ದರೆ, ಆಗ ಸರ್ಕಾರ ಕೊಟ್ಟಿರುವ ಪದ್ಮಶ್ರೀ ಪ್ರಶಸ್ತಿಯನ್ನು ವಾಪಸ್ಸು ಮಾಡುವುದಾಗಿ ಅವರು ಹೇಳಿಕೊಂಡಿದ್ದು ಗೊತ್ತೇ ಇದೆ.

ಈಗ ಕಂಗನಾ ಇದೇ ವಿಷಯವಾಗಿ ಇನ್ನಷ್ಟು ಮಾತನಾಡಿದ್ದಾರೆ. ಆದಿತ್ಯ ಮತ್ತು ಕರಣ್​ ಇಬ್ಬರೂ ಜತೆಗೂಡಿ, ಸುಶಾಂತ್​ ಅವರನ್ನು ಹಾಳು ಮಾಡಿದರು ಎಂದು ಹೇಳಿದ್ದಾರೆ. ಸುಶಾಂತ್​ಗೆ ಬಕೆಟ್​ ಹಿಡಿಯುವುದಕ್ಕೆ ಬರುತ್ತಿರಲಿಲ್ಲ, ಹಾಗಾಗಿ ಕೊನೆಗೆ ಆತ್ಮಹತ್ಯೆ ಮಾಡಿಕೊಳ್ಳಬೇಕಾಯಿತು ಎಂದು ಸಹ ಹೇಳಿದ್ದಾರೆ.

ಇದನ್ನೂ ಓದಿ: ನನಗೆ ಕೆಲಸ ಇಲ್ಲ ಅಂತ ಯಾರು ಹೇಳಿದ್ದು? ಕಂಗನಾಗೆ ತಾಪ್ಸಿ ತರಾಟೆ

'ಸುಶಾಂತ್​ ಅವರಿಗೆ ಒಂದಿಷ್ಟು ಚಿತ್ರಗಳನ್ನು ಕೊಟ್ಟು ಕಾಂಟ್ರಾಕ್ಟ್​ ಸೈನ್​ ಮಾಡಿಸಿಕೊಂಡವರು ಆದಿತ್ಯ ಚೋಪ್ರಾ. ಹಾಗೆ ಸೈನ್​ ಮಾಡಿದ್ದರಿಂದ, ಬೇರೆ ಚಿತ್ರಗಳಲ್ಲೂ ಸುಶಾಂತ್​ಗೆ ಕೆಲಸ ಮಾಡುವುದಕ್ಕೆ ಸಾಧ್ಯವಾಗಲಿಲ್ಲ. ಸಂಜಯ್​ ಲೀಲಾ ಬನ್ಸಾಲಿ ನಿರ್ದೇಶನದ 'ರಾಮ್​-ಲೀಲಾ' ಮತ್ತು 'ಬಾಜಿರಾವ್ ಮಸ್ತಾನಿ' ಚಿತ್ರದಲ್ಲಿ ಸುಶಾಂತ್​ ನಟಿಸಬೇಕಿತ್ತು. ಆದರೆ, ಕಾಂಟ್ರಾಕ್ಟ್​ ಇದ್ದುದರಿಂದ ನಟಿಸುವುದಕ್ಕೆ ಸಾಧ್ಯವಾಗಲಿಲ್ಲ. ಕೊನೆಗೆ ಆ ಅವಕಾಶ ರಣವೀರ್​ಗೆ ಹೋಯಿತು' ಎಂದಿದ್ದಾರೆ ಕಂಗನಾ.

'ಯಾಕೆ ಸುಶಾಂತ್​ಗೆ ಅಂಥದ್ದೊಂದು ಅಂತ್ಯ ಎದುರಾಯಿತು ಎಂದರೆ, ಅವರಿಗೆ ಬಕೆಟ್​ ಹಿಡಿಯುವುದಕ್ಕೆ ಬರುವುದಿಲ್ಲ. ಆದೇ ಕಾರಣಕ್ಕೆ ಅವರನ್ನು ಹಾಳು ಮಾಡಿದರು. ಕೊನೆಗೆ ಆದಿತ್ಯ ಚೋಪ್ರಾ ಸಹವಾಸವೇ ಬೇಡ ಎಂದು ದೂರವಿದ್ದ ಸುಶಾಂತ್​, 'ಧೋನಿ' ಚಿತ್ರ ಮಾಡಿದರು. ಆ ಚಿತ್ರ ಅವರಿಗೆ ದೊಡ್ಡ ಯಶಸ್ಸು ತಂದುಕೊಟ್ಟಿತು. ಈ ಸಂದರ್ಭದಲ್ಲಿ ಎಂಟ್ರಿ ಕೊಟ್ಟವರು ಆದಿತ್ಯನ ಹಳೆಯ ದೋಸ್ತ್​ ಕರಣ್​ ಜೋಹರ್​. ಅವರು ಸುಶಾಂತ್​ ಜತೆಗೆ 'ಡ್ರೈವ್​' ಎನ್ನುವ ಸಿನಿಮಾ ಮಾಡುವ ಮೂಲಕ ಇನ್ನಷ್ಟು ಹಾಳು ಮಾಡಿದರು' ಎಂದು ಆರೋಪಿಸಿದ್ದಾರೆ ಕಂಗನಾ.

ಇದನ್ನೂ ಓದಿ: ‘ಜೊತೆ ಜೊತೆಯಲಿ’ ಧಾರಾವಾಹಿ ನಿರ್ದೇಶಕ ಆರೂರು ಜಗದೀಶ್ ಮಣಿಪಾಲ್ ಆಸ್ಪತ್ರೆಗೆ ದಾಖಲು

'ಡ್ರೈವ್​' ಚಿತ್ರವನ್ನು ಕರಣ್ ಯಾಕೆ ಬಿಡುಗಡೆ ಮಾಡಲಿಲ್ಲ ಎಂದು ಪ್ರಶ್ನಿಸಿರುವ ಕಂಗನಾ?, 'ಕರಣ್​ ಜೋಹರ್​ಗೆ ಒಂದು ಸಿನಿಮಾ ಬಿಡುಗಡೆ ಮಾಡುವುದಕ್ಕೆ ಸಾಧ್ಯವಿಲ್ಲವಾ? ಸುಶಾಂತ್​ ಅಭಿನಯದಲ್ಲಿ ಒಂದು ಸಿನಿಮಾ ನಿರ್ಮಾಣ ಮಾಡಿ, ಅದನ್ನು ಮೂರು ವರ್ಷ ಬಿಡುಗಡೆ ಮಾಡದೆ, ಸುಶಾಂತ್​ ಒಬ್ಬ ಫ್ಲಾಪ್​ ಸ್ಟಾರ್​ ಎಂದು ಬಿಂಬಿಸಿಬಿಟ್ಟರು ಕರಣ್​. ಈ ವಿಷಯದಲ್ಲಿ ನಾನು ಚರ್ಚೆಗೆ ಸಿದ್ಧ. ವಿತರಕರು ಮತ್ತು ನಿರ್ಮಾಪಕರು ಬರಲಿ. ಸುಶಾಂತ್​ಗಿದ್ದ ಮಾರುಕಟ್ಟೆಯ ಬಗ್ಗೆ ಎಲ್ಲಿ ಬೇಕಾದರೂ ಮಾತನಾಡುತ್ತೇನೆ' ಎಂದು ಸವಾಲು ಹಾಕಿದ್ದಾರೆ ಕಂಗನಾ.

'ಇದರಿಂದ ಕೊನೆಗೂ 'ಡ್ರೈವ್​' ಚಿತ್ರ ಬಿಡುಗಡೆಯಾಗಲೇ ಇಲ್ಲ. ಓಟಿಟಿಯಲ್ಲಿ ಬಿಡುಗಡೆಯಾಗಿ ಮಾಯವಾಗಿ ಹೋಯಿತು. ಅಷ್ಟರಲ್ಲಿ ಸುಶಾಂತ್​ ಒಬ್ಬ ಫ್ಲಾಪ್​ ನಟ ಎಂದು ಬಿಂಬಿಸಲಾಗಿತ್ತು. ಇದರಿಂದ ಸುಶಾಂತ್​ ಅವರ ಕೆರಿಯರ್​ಗೆ ಸಾಕಷ್ಟು ಪೆಟ್ಟು ಬಿತ್ತು. ಕೊನೆಗೆ ಬೇಸರದಿಂದ ಸುಶಾಂತ್​ ಆತ್ಮಹತ್ಯೆ ಮಾಡಿಕೊಂಡರು. ಬಹಳ ವ್ಯವಸ್ಥಿತವಾಗಿ ಅವರನ್ನು ಮುಗಿಸಲಾಯಿತು' ಎಂದು ಕಂಗನಾ ಹೇಳಿಕೊಂಡಿದ್ದಾರೆ.

https://www.vijayavani.net/kangana-accuses-alia-bhatt-of-shamelessly-accepting-the-award/