ಇಂಡಿಯನ್ ಈಸ್ ಬ್ಯಾಕ್: ಸೇನಾಪತಿಗೆ ಚಿತ್ರರಂಗದ ದಿಗ್ಗಜರಿಂದ ಸ್ವಾಗತ!

ಬೆಂಗಳೂರು: 'ಇಂಡಿಯನ್ ಈಸ್ ಬ್ಯಾಕ್​..' ಹೀಗೆಂದು ಸೇನಾಪತಿಗೆ ಇಂದು ಚಿತ್ರರಂಗದ ದಿಗ್ಗಜರು ಸ್ವಾಗತ ಕೋರಿ ಬರಮಾಡಿಕೊಂಡಿದ್ದಾರೆ. ಕನ್ನಡ ಮಾತ್ರವಲ್ಲದೆ, ಬಾಲಿವುಡ್, ಕಾಲಿವುಡ್​, ಟಾಲಿವುಡ್​, ಮಾಲಿವುಡ್​ನ ಸಿನಿದಿಗ್ಗಜರು ಸೇನಾಪತಿಗಾಗಿ ಕೈಜೋಡಿಸಿದ್ದಾರೆ.

ಅರ್ಥಾತ್, ತಮಿಳಿನ ಖ್ಯಾತ ನಿರ್ದೇಶಕ ಎಸ್. ಶಂಕರ್ ನಿರ್ದೇಶನದ ಬಹುನಿರೀಕ್ಷಿತ ಸಿನಿಮಾ 'ಇಂಡಿಯನ್ 2' ಫಸ್ಟ್​ ಗ್ಲಿಂಪ್ಸ್​ಗೆ ಇಂದು ವಿವಿಧ ಭಾಷೆಗಳ ಸಿನಿಮಾ ಸ್ಟಾರ್​ಗಳಿಂದ ಭರ್ಜರಿ ಸ್ವಾಗತ ಹಾಗೂ ಪ್ರತಿಕ್ರಿಯೆ ಸಿಕ್ಕಿದೆ. ನಟ ಕಮಲ ಹಾಸನ್ ಸೇನಾಪತಿಯ ಪಾತ್ರದಲ್ಲಿ ಹೇಗೆಲ್ಲ ಹೋರಾಡುತ್ತಾರೆ ಎನ್ನುವುದನ್ನು ಈ ಸೀಕ್ವೆಲ್​ನಲ್ಲಿ ಕಟ್ಟಿಕೊಡಲಾಗಿದೆ.

'ಇಂಡಿಯನ್ 2' ಚಿತ್ರ 1996ರಲ್ಲಿ ಮೂಡಿಬಂದ 'ಇಂಡಿಯನ್‌'ನ ಮುಂದುವರಿದ ಭಾಗ. ನಟ ಕಮಲ ಹಾಸನ್ ಈ ಚಿತ್ರದಲ್ಲಿ ಸೇನಾಪತಿ ಪಾತ್ರದಲ್ಲಿ ಮಿಂಚಿದ್ದರು. ಅದರ ಮುಂದುವರಿದ ಭಾಗವಾಗಿರುವ ಇಂಡಿಯನ್-2 ಇಂಟ್ರೋ ವೀಡಿಯೋ ಇಂದು ಐದು ಭಾಷೆಗಳಲ್ಲಿ ಬಿಡುಗಡೆಯಾಗಿದೆ.

ನಟ ಕಿಚ್ಚ ಸುದೀಪ್ ಕನ್ನಡ, ಸೂಪರ್​ಸ್ಟಾರ್ ರಜಿನಿಕಾಂತ್ ತಮಿಳು, ನಟ ಆಮಿರ್ ಖಾನ್ ಹಿಂದಿ, ನಿರ್ದೇಶಕ ರಾಜಮೌಳಿ ತೆಲುಗು ಮತ್ತು ನಟ ಮೋಹನ್​ ಲಾಲ್​ ಮಲಯಾಳಂ ವಿಡಿಯೋ ಬಿಡುಗಡೆ ಮಾಡಿದ್ದಾರೆ. ಇವರೆಲ್ಲರೂ ಇಂಡಿಯನ್ ಈಸ್ ಬ್ಯಾಕ್ ಎಂಬ ಒಕ್ಕಣಿಕೆಯೊಂದಿಗೆ ತಮ್ಮ ಸೋಷಿಯಲ್ ಮೀಡಿಯಾ ಖಾತೆಗಳಲ್ಲಿ ವಿಡಿಯೋ ಹಂಚಿಕೊಂಡಿದ್ದಾರೆ.

ಈ ಚಿತ್ರದಲ್ಲಿ ಸಿದ್ಧಾರ್ಥ್, ಕಾಜಲ್ ಅಗರ್​​ವಾಲ್​, ರಾಕುಲ್ ಪ್ರೀತ್ ಸಿಂಗ್, ಪ್ರಿಯಾ ಭವಾನಿ ಶಂಕರ್, ಕಾಳಿದಾಸ್ ಜಯರಾಮ್, ಗುಲ್ಶನ್ ಗ್ರೋವರ್, ನೆಡುಮುಡಿ ವೇಣು, ವಿವೇಕ್, ಸಮುದ್ರಖನಿ, ಬಾಬಿ ಸಿಂಹ, ಗುರು ಸೋಮಸುಂದರಂ, ದೆಹಲಿ ಗಣೇಶ್, ಜಯಪ್ರಕಾಶ್, ಮನೋಬಾಲಾ, ವೆನ್ನೆಲ ಕಿಶೋರ್, ದೀಪಾ ಶಂಕರ್ ತೆರೆ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರಕ್ಕೆ ಅನಿರುದ್ಧ್ ರವಿಚಂದರ್ ಸಂಗೀತ, ರವಿವರ್ಮನ್ ಮತ್ತು ರತ್ನವೇಲು ಅವರ ಸಿನಿಮಾಟೋಗ್ರಫಿ ಮತ್ತು ಎ. ಶ್ರೀಕರ್ ಪ್ರಸಾದ್ ಅವರ ಎಡಿಟಿಂಗ್ ಇರಲಿದೆ.

https://www.vijayavani.net/major-action-to-curb-film-piracy-as-industry-faces-losses-of-rs-20000-crore-annually-due-to-piracy

https://www.vijayavani.net/failed-romantic-relationship-not-ground-for-rape-case-is-settled-law-delhi-hc