ಟಿ20 ವಿಶ್ವಕಪ್​ ಮುಗಿದ ಬಳಿಕ ಪೂರ್ಣಗೊಳ್ಳಲಿದೆ ಐಪಿಎಲ್​ 14ನೇ ಆವೃತ್ತಿ?

ನವದೆಹಲಿ: ಕರೊನಾದಿಂದಾಗಿ ದಿಢೀರ್​ ಸ್ಥಗಿತಗೊಂಡಿರುವ ಐಪಿಎಲ್​ 14ನೇ ಆವೃತ್ತಿಯನ್ನು ಅಕ್ಟೋಬರ್​-ನವೆಂಬರ್​ನಲ್ಲಿ ಟಿ20 ವಿಶ್ವಕಪ್​ ನಡೆದ ಬಳಿಕ ಪೂರ್ಣಗೊಳಿಸುವ ಸಾಧ್ಯತೆ ಕಾಣಿಸಿದೆ. ಆ ವೇಳೆಗೆ ಟಿ20 ವಿಶ್ವಕಪ್​ಗಾಗಿ ವಿದೇಶಿ ಕ್ರಿಕೆಟಿಗರೂ ಭಾರತಕ್ಕೆ ಆಗಮಿಸಲಿರುವ ಕಾರಣ ಅವರನ್ನು ಬಳಿಕ ಐಪಿಎಲ್​ನಲ್ಲೂ ಆಡುವಂತೆ ಮನವೊಲಿಸುವುದು ಸುಲಭ ಎಂದು ಬಿಸಿಸಿಐ ವಲಯದಲ್ಲಿ ಅಭಿಪ್ರಾಯ ವ್ಯಕ್ತವಾಗಿದೆ.

ಐಪಿಎಲ್​ 14ನೇ ಆವೃತ್ತಿ 29 ಪಂದ್ಯಗಳು ನಡೆದ ಬಳಿಕ ಸ್ಥಗಿತಗೊಂಡಿದ್ದು, ಇನ್ನೂ 31 ಪಂದ್ಯಗಳು ಬಾಕಿ ಉಳಿದಿವೆ. ಇವುಗಳನ್ನು ಪೂರ್ಣಗೊಳಿಸಲು ಕನಿಷ್ಠ 4 ವಾರಗಳ ಕಾಲಾವಕಾಶ ಅಗತ್ಯವಾಗಿದೆ. ಭಾರತದ ಅಂತಾರಾಷ್ಟ್ರೀಯ ಕ್ರಿಕೆಟ್​ ವೇಳಾಪಟ್ಟಿಯನ್ನು ಗಮನಿಸಿದಾಗ ಈ ಸಮಯವನ್ನು ಹೊಂದಿಕೆ ಮಾಡುವುದು ಕೂಡ ಕಠಿಣವೆನಿಸಿದೆ. ಇದಕ್ಕಾಗಿ ಡಿಸೆಂಬರ್​ನಲ್ಲಿ ನಿಗದಿಯಾಗಿರುವ ಪ್ರವಾಸಿ ನ್ಯೂಜಿಲೆಂಡ್​ ವಿರುದ್ಧದ ತವರಿನ ಸರಣಿಯ ವೇಳಾಪಟ್ಟಿಯನ್ನು ಸ್ವಲ್ಪ ಬದಲಾವಣೆ ಮಾಡಬೇಕಾಗುತ್ತದೆ.

ಇದನ್ನೂ ಓದಿ: ಕರೊನಾದಿಂದ ಸಂಕಷ್ಟದಲ್ಲಿರುವವರಿಗೆ ಪಠಾಣ್​ ಕ್ರಿಕೆಟ್​ ಅಕಾಡೆಮಿಯಿಂದ ನೆರವು 

ಟಿ20 ವಿಶ್ವಕಪ್​ ನವೆಂಬರ್​ 15ರಂದು ಮುಕ್ತಾಯಗೊಳ್ಳಲಿದ್ದು, ಬಳಿಕ ಐಪಿಎಲ್​ ಆಯೋಜನೆಗೆ ಹೆಚ್ಚಿನ ಅವಕಾಶವಿದೆ. ಆ ವೇಳೆಗೆ ಭಾರತದಲ್ಲಿ ಕರೊನಾ ಪರಿಸ್ಥಿತಿಯೂ ಸುಧಾರಿಸುವ ನಿರೀಕ್ಷೆ ಇದೆ. ಅಲ್ಲದೆ ದೇಶದ ಬಹುತೇಕ ಜನರಿಗೆ ಲಸಿಕೀಕರಣ ಆ ಸಮಯಕ್ಕೆ ಪೂರ್ಣಗೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಭಾರತ ತಂಡದ 2021ರ ಕ್ರಿಕೆಟ್​ ವೇಳಾಪಟ್ಟಿ:

ಜೂನ್​ 18-22: ನ್ಯೂಜಿಲೆಂಡ್​ ವಿರುದ್ಧ ಇಂಗ್ಲೆಂಡ್​ನ ಸೌಥಾಂಪ್ಟನ್​ನಲ್ಲಿ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಫೈನಲ್​.

ಜುಲೈ-ಸೆಪ್ಟೆಂಬರ್​: ಇಂಗ್ಲೆಂಡ್​ನಲ್ಲಿ 5 ಪಂದ್ಯಗಳ ಟೆಸ್ಟ್​ ಸರಣಿ.

ಅಕ್ಟೋಬರ್​: ಭಾರತದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 3 ಏಕದಿನ, 3 ಟಿ20 ಪಂದ್ಯ.

ಅಕ್ಟೋಬರ್​-ನವೆಂಬರ್​: ಭಾರತದಲ್ಲಿ ಐಸಿಸಿ ಟಿ20 ವಿಶ್ವಕಪ್​.

ನವೆಂಬರ್​-ಡಿಸೆಂಬರ್​: ಭಾರತದಲ್ಲಿ ನ್ಯೂಜಿಲೆಂಡ್​ ವಿರುದ್ಧ 2 ಟೆಸ್ಟ್​, 3 ಟಿ20 ಪಂದ್ಯ.

ಡಿಸೆಂಬರ್​: ದಕ್ಷಿಣ ಆಫ್ರಿಕಾದಲ್ಲಿ 3 ಟೆಸ್ಟ್​, 3 ಟಿ20.

https://www.vijayavani.net/ambulance-stopped-for-ipl-convoy-to-pass-in-ahmedabad/