Pahalgam Terrorists Attack : ಮಂಗಳವಾರ (ಏಪ್ರಿಲ್ 22) ಕಾಶ್ಮೀರದ ಪಹಲ್ಗಾಮ್ ಪ್ರದೇಶದಲ್ಲಿ ಪವಾಸಿಗರ ಮೇಲೆ ನಡೆದ ಉಗ್ರರ ದಾಳಿಯಲ್ಲಿ ಭಯೋತ್ಪಾದನೆಯ ತವರು ಪಾಕಿಸ್ತಾನದ ಕೈವಾಡ ಇರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಪಾಕ್ ವಿರುದ್ಧ ಐದಂಶದ ಕಠಿಣ ಕ್ರಮಗಳನ್ನು ತೆಗೆದುಕೊಂಡಿದೆ. ಅದರಲ್ಲಿ 1960 ರಿಂದ ಉಭಯ ದೇಶಗಳ ನಡುವೆ ಬಲವಾಗಿ ಉಳಿದಿರುವ ಸಿಂಧೂ ನದಿ ಒಲ ಒಪ್ಪಂದ (ಐಡಬ್ಲ್ಯೂಟಿ) ಸ್ಥಗಿತಗೊಳಿಸುವುದೂ ಸೇರಿದೆ. ಇದೊಂದು ದಿಟ್ಟ ನಿರ್ಧಾರವೆಂದೇ ಹೇಳಬಹುದು.
ನೆರೆಯ ಪಾಕಿಸ್ತಾನ, ತನ್ನ ಗಡಿಯಾಚೆಗಿನ ಭಯೋತ್ಪಾದನೆಗೆ ಬೆಂಬಲ ನೀಡುವುದನ್ನು ಸಂಪೂರ್ಣ ತ್ಯಜಿಸುವವರೆಗೆ ತಕ್ಷಣದಿಂದ ಜಾರಿಗೆ ಬರುವಂತೆ 1960ರ ಸಿಂಧೂ ನದಿ ಜಲ ಒಪ್ಪಂದವನ್ನು ಸ್ಥಗಿತಗೊಳಿಸಲಾಗುತ್ತದೆ ಎಂದು ವಿದೇಶಾಂಗ ಕಾರ್ಯದರ್ಶಿ ವಿಕ್ರಮ್ ಮಿಶ್ರಿ ಬುಧವಾರ (ಏಪ್ರಿಲ್ 23) ಸಂಜೆ ಹೇಳಿದ್ದಾರೆ.
ಆದರೆ, ಸಿಂಧೂ ಜಲ ಒಪ್ಪಂದ ಸ್ಥಗಿತಗೊಳಿಸಲು ಕೆಲ ಕಾನೂನು ತೊಡಕುಗಳು ಸಹ ಇವೆ ಎಂಬುದನ್ನು ಮರೆಯುವಂತಿಲ್ಲ. ಏಕೆಂದರೆ, 2019ರಲ್ಲಿ ಪುಲ್ವಾಮಾ ಮತ್ತು 2016 ರಲ್ಲಿ ಉರಿಯಲ್ಲಿ ನಡೆದ ದಾಳಿಗಳ ಬಳಿಕವೂ ಪಾಕಿಸ್ತಾನಕ್ಕೆ ಸಿಂಧೂ ನದಿ ನೀರನ್ನು ನಿಲ್ಲಿಸುವ ಬೇಡಿಕೆಗಳು ಬಂದಿತ್ತು. ಆದರೆ, ಅದು ಕಾರ್ಯರೂಪಕ್ಕೆ ಬರಲಿಲ್ಲ. 18 ಸೈನಿಕರನ್ನು ಬಲಿತೆಗೆದುಕೊಂಡ ಉರಿ ದಾಳಿಯ ನಂತರ, ಪ್ರಧಾನಿ ನರೇಂದ್ರ ಮೋದಿ, ಸಿಂಧೂ ಜಲ ಒಪ್ಪಂದ ಸಭೆಯಲ್ಲಿ “ರಕ್ತ ಮತ್ತು ನೀರು ಒಂದೇ ಸಮಯದಲ್ಲಿ ಒಟ್ಟಿಗೆ ಹರಿಯಲು ಸಾಧ್ಯವಿಲ್ಲ” ಎಂದು ಹೇಳಿದ್ದರು.
ಭಾರತ ಈಗ ಒಪ್ಪಂದವನ್ನು ತಡೆಹಿಡಿದಿರುವುದರಿಂದ ಕೇಂದ್ರ ಸರ್ಕಾರಕ್ಕೆ ಹಲವಾರು ಆಯ್ಕೆಗಳಿವೆ. ಪಶ್ಚಿಮ ನದಿಗಳಾದ ಸಿಂಧೂ, ಝೀಲಂ ಮತ್ತು ಚೆನಾಬ್‌ಗಳಲ್ಲಿ ನೀರು ಸಂಗ್ರಹವನ್ನು ಸೃಷ್ಟಿಸುವುದರಿಂದ ಹಿಡಿದು ನೀರಿನ ಹರಿವಿನ ದತ್ತಾಂಶ ಹಂಚಿಕೆಯನ್ನು ನಿಲ್ಲಿಸುವವರೆಗೆ, ಸಿಂಧೂ ನದಿ ವ್ಯವಸ್ಥೆಯ ಮೇಲೆಯೇ ಹೆಚ್ಚು ಅವಲಂಬಿತವಾಗಿರುವ ಪಾಕಿಸ್ತಾನಕ್ಕೆ ಇದರ ಪರಿಣಾಮಗಳು ತುಂಬಾ ಹಾನಿಕಾರಕವಾಗಬಹುದು.
ಇಂತಹ ಸಂಕಷ್ಟದ ಸಂದರ್ಭಗಳಲ್ಲಿ, ಪಾಕಿಸ್ತಾನಕ್ಕೆ ನಿಜವಾಗಿಯೂ ಯಾವ ಆಯ್ಕೆಗಳಿವೆ? ಒಪ್ಪಂದವನ್ನು ತಡೆಹಿಡಿದಿರುವನ್ನು ಖಂಡಿಸಿ, ನೀರಿಗಾಗಿ ಪಾಕ್ ಯಾವ ಕ್ರಮ ತೆಗೆದುಕೊಳ್ಳಬಹುದು ಎಂಬ ಪ್ರಶ್ನೆ ಇದೆ.
ಅಂದಹಾಗೆ ಈ ಒಪ್ಪಂದವೂ ವಿಶ್ವ ಬ್ಯಾಂಕ್ ಮಧ್ಯಸ್ಥಿಕೆಯಲ್ಲಿ ನಡೆದಿದ್ದು, ವಿಶ್ವಸಂಸ್ಥೆಯ ನ್ಯಾಯಾಂಗ ಅಂಗವಾದ ಅಂತಾರಾಷ್ಟ್ರೀಯ ನ್ಯಾಯಾಲಯ (ICJ) ಮಧ್ಯಪ್ರವೇಶಿಸಬಹುದೆಂದು ಉಲ್ಲೇಖಿಸದಿದ್ದರೂ, ಈ ಒಪ್ಪಂದದ ಇತ್ಯರ್ಥಕ್ಕೆ ಮೂರು ಹಂತದ ಪರಿಹಾರ ಕಾರ್ಯವಿಧಾನವನ್ನು ವಿಶ್ವ ಬ್ಯಾಂಕ್ ಸ್ಥಾಪಿಸಿದೆ. ಮೂರು ಹಂತದ ಕಾರ್ಯವಿಧಾನದ ಪ್ರಕಾರ, ಉಭಯ ದೇಶಗಳ ಆಯುಕ್ತರನ್ನು ಒಳಗೊಂಡ ಶಾಶ್ವತ ಸಿಂಧೂ ಆಯೋಗ (ಪಿಐಸಿ), ಎರಡು ರಾಷ್ಟ್ರಗಳ ನಡುವಿನ ನೀರು ಹಂಚಿಕೆಯಿಂದ ಉಂಟಾಗುವ ವಿವಾದಗಳನ್ನು ಪರಿಹರಿಸುವ ಆರಂಭಿಕ ಹಂತವಾಗಿದೆ.
ಆದಾಗ್ಯೂ, ಪಿಐಸಿ ಈ ಸಮಸ್ಯೆಯನ್ನು ಪರಿಹರಿಸಲು ವಿಫಲವಾದರೆ, ಅದನ್ನು ಇತ್ತೀಚಿನ ಕಿಶೆಂಗಂಗಾ ಮತ್ತು ರಾಟ್ಲೆ ಜಲವಿದ್ಯುತ್ ಯೋಜನೆಗಳ ಕುರಿತು ಭಾರತ ಮತ್ತು ಪಾಕಿಸ್ತಾನದ ನಡುವಿನ ವಿವಾದಗಳಂತೆಯೇ ವಿಶ್ವಬ್ಯಾಂಕ್ ನೇಮಿಸಿದ ತಟಸ್ಥ ತಜ್ಞರ ಅಂಗಳಕ್ಕೆ ತಲುಪಿಸಲಾಗುತ್ತದೆ. ಆ ಸಂದರ್ಭದಲ್ಲಿ ತಟಸ್ಥ ತಜ್ಞರು ನವದೆಹಲಿಯ ನಿಲುವನ್ನು ಬೆಂಬಲಿಸಿದರೆ, ಅದು ಭಾರತಕ್ಕೆ ಸ್ವಾಗತಾರ್ಹ ನಿರ್ಧಾರವಾಗಲಿದೆ. ಒಂದು ವೇಳೆ ಬೆಂಬಲ ನೀಡದಿದ್ದರೆ ಪಾಕ್ ಮತ್ತು ಭಾರತದ ನಡುವಿನ ವಿವಾದ ಹಾಗೇ ಮುಂದುವರಿಯಲಿದೆ.
ಅಂತಿಮವಾಗಿ, ಈ ವಿವಾದವನ್ನು IXನೇ ವಿಧಿಯ ನಿಬಂಧನೆಗಳ ಅಡಿಯಲ್ಲಿ ಹೇಗ್‌ನಲ್ಲಿರುವ ಶಾಶ್ವತ ನ್ಯಾಯಾಲಯದ ಮಧ್ಯಸ್ಥಿಕೆ (PCA)ಗೆ ಕೊಂಡೊಯ್ಯಬಹುದು. ಕಿಶೆಂಗಂಗಾ ಮತ್ತು ರಾಟ್ಲೆ ಜಲವಿದ್ಯುತ್ ಯೋಜನೆಗಳ ಇತ್ತೀಚಿನ ವಿವಾದದಲ್ಲಿ ಪಾಕಿಸ್ತಾನವು ತಟಸ್ಥ ತಜ್ಞರ ಬದಲಿಗೆ PCA ಅನ್ನು ಸಂಪರ್ಕಿಸಲು ಬಯಸಿತು.
ಭಾರತ ಈ ಒಪ್ಪಂದದಿಂದ ಹೊರಬರಬಹುದೇ?
ಆಗಿನ ಭಾರತದ ಪ್ರಧಾನಿ ಜವಾಹರಲಾಲ್ ನೆಹರು ಮತ್ತು ಪಾಕಿಸ್ತಾನದ ಪ್ರಧಾನಿ ಜನರಲ್ ಅಯೂಬ್ ಖಾನ್ ನಡುವೆ ಸಹಿ ಹಾಕಲಾದ ಜಲ ಒಪ್ಪಂದದ ಪ್ರಕಾರ, ಭಾರತವಾಗಲಿ ಅಥವಾ ಪಾಕಿಸ್ತಾನವಾಗಲಿ ಏಕಪಕ್ಷೀಯವಾಗಿ ಒಪ್ಪಂದವನ್ನು ರದ್ದುಗೊಳಿಸಲು ಸಾಧ್ಯವಿಲ್ಲ ಅಥವಾ ಎರಡೂ ದೇಶಗಳು ಈ ಒಪ್ಪಂದವನ್ನು ಕೈಬಿಡಲು ಸಾಧ್ಯವಿಲ್ಲ. ಏಕೆಂದರೆ, ಈ ಒಪ್ಪಂದದ ನಿಬಂಧನೆಗಳು ಅಥವಾ ಪ್ಯಾರಾಗ್ರಾಫ್ (3) ನಿಬಂಧನೆಗಳ ಅಡಿಯಲ್ಲಿ ಮಾರ್ಪಡಿಸಲಾದ ಒಪ್ಪಂದದ ಪ್ರಕಾರ, ಎರಡು ಸರ್ಕಾರಗಳ ನಡುವೆ ಒಂದು ಉದ್ದೇಶಕ್ಕಾಗಿ ತೀರ್ಮಾನಿಸಲಾದ ಮತ್ತು ಸೂಕ್ತವಾಗಿ ಅಂಗೀಕರಿಸಲ್ಪಟ್ಟ ಈ ಒಪ್ಪಂದವೂ ಮುಕ್ತಾಯಗೊಳ್ಳುವವರೆಗೆ ಜಾರಿಯಲ್ಲಿರುತ್ತವೆ ಎಂದು ಸಿಂಧೂ ಜಲ ಒಪ್ಪಂದದ ಆರ್ಟಿಕಲ್ XII ಹೇಳುತ್ತದೆ.
ಭಾರತವು ಒಪ್ಪಂದವನ್ನು ರದ್ದುಗೊಳಿಸಲು ಬಯಸುವ ಸನ್ನಿವೇಶದಲ್ಲಿ, ಎರಡು ಸಾರ್ವಭೌಮ ರಾಷ್ಟ್ರಗಳ ನಡುವಿನ ಒಪ್ಪಂದಗಳ ರಚನೆ, ನಿಯಂತ್ರಣ ಮತ್ತು ಮುಕ್ತಾಯವನ್ನು ನಿಯಂತ್ರಿಸುವ ಒಪ್ಪಂದಗಳ ಕಾನೂನಿನ ಕುರಿತಾದ 1969ರ ವಿಯೆನ್ನಾ ಸಮಾವೇಶವು ಇಲ್ಲಿ ಕಾರ್ಯರೂಪಕ್ಕೆ ಬರುತ್ತದೆ. ಭಾರತವು ವಿಯೆನ್ನಾ ಸಮಾವೇಶಕ್ಕೆ ಸಹಿ ಹಾಕಿಲ್ಲ. ಆದಾಗ್ಯೂ, ಭಾರತವು ಸಂಬಂಧಿತ ವಿಭಾಗಗಳಿಂದ ಮಾರ್ಗದರ್ಶನವನ್ನು ಪಡೆಯುತ್ತದೆ.
ಸಿಂಧೂ ನದಿ ಜಲ ಒಪ್ಪಂದ ಪ್ರಕಾರ, ಯಾವುದೇ ಪಕ್ಷವು ಒಪ್ಪಂದದಿಂದ ಏಕಪಕ್ಷೀಯವಾಗಿ ಹೊರಬರಲು ಸಾಧ್ಯವಿಲ್ಲ ಅಥವಾ ನೀರಿನ ಹರಿವನ್ನು ಸಂಪೂರ್ಣವಾಗಿ ನಿಲ್ಲಿಸಲು ಸಾಧ್ಯವಿಲ್ಲ. ಆದಾಗ್ಯೂ, ಈ ಒಪ್ಪಂದದ ಆರ್ಟಿಕಲ್ 3ರ ಅಡಿಯಲ್ಲಿನ ನಿಬಂಧನೆಗಳ ಮೂಲಕ ಭಾರತವು ನೀರಿನ ಹರಿವನ್ನು ಕಡಿಮೆ ಮಾಡಬಹುದು. ಈ ಕ್ರಮವನ್ನು ಇತರ ಅಪ್ಸ್ಟ್ರೀಮ್ ನೆರೆಯ ರಾಷ್ಟ್ರಗಳು ಅಳವಡಿಸಿಕೊಂಡರೆ ಕಳವಳಕಾರಿಯಾಗಬಹುದು. ಆದರೆ, ಭಾರತದ ನೆಲದಲ್ಲಿ ಪದೇ ಪದೇ ನಡೆಯುತ್ತಿರುವ ದಾಳಿಗಳ ವಿರುದ್ಧ ಇದು ಅಗತ್ಯವಾದ ಪ್ರತೀಕಾರವೆಂದು ಪರಿಗಣಿಸಲಾಗಿದೆ. (ಏಜೆನ್ಸೀಸ್)
ಈ 3 ನಕ್ಷತ್ರಗಳಲ್ಲಿ ಜನಿಸಿದವರು ಕರುಣಾಮಯಿಗಳು… ಯಾರಿಗೂ ನೋವು ಮಾಡುವುದಿಲ್ಲವಂತೆ! Birth Stars
ಭಾರತ ಏನಾದರೂ ನಮ್ಮ ಮೇಲೆ ದಾಳಿ ಮಾಡಿದರೆ… ಪಾಕ್ ಮಾಜಿ ಸಚಿವನಿಂದ ಸ್ಫೋಟಕ ಹೇಳಿಕೆ! Pahalgam Terrorists Attack
