ನಾನೇ ಭಾರತದ ಫೀಲ್ಡಿಂಗ್ ಕೋಚ್... ಟೀಮ್ ಇಂಡಿಯಾ ಕಾಲೆಳೆದ ಮೈಕೆಲ್ ವಾನ್​ಗೆ ಫ್ಯಾನ್ಸ್​ ತಿರುಗೇಟು! IND vs ENG

IND vs ENG :  ಕಳಪೆ ಫೀಲ್ಡಿಂಗ್ ಮತ್ತು ಕೊನೇ ದಿನದ ನೀರಸ ಬೌಲಿಂಗ್ ದಾಳಿಯಿಂದಾಗಿ, ಭಾರತ ತಂಡ ಮೊದಲ 4 ದಿನಗಳಲ್ಲಿ ಪ್ರದರ್ಶಿಸಿದ್ದ ಅಮೋಘ ಬ್ಯಾಟಿಂಗ್ ನಿರ್ವಹಣೆ ವ್ಯರ್ಥಗೊಂಡಿದೆ. ಅತಿಥೇಯ ಇಂಗ್ಲೆಂಡ್​ಗೆ ಬೃಹತ್ ಗುರಿ ನೀಡಿದರೂ, ಅದನ್ನು ರಕ್ಷಿಸಿಕೊಳ್ಳುವಲ್ಲಿ ವಿಫಲವಾದ ಭಾರತ ತಂಡ ಅಂಡರ್‌ಸನ್-ತೆಂಡುಲ್ಕರ್ ಟ್ರೋಫಿಯ ಮೊದಲ ಪಂದ್ಯದಲ್ಲಿ 5 ವಿಕೆಟ್‌ಗಳಿಂದ ಪರಾಭವಗೊಂಡಿದೆ.

ಇಂಗ್ಲೆಂಡ್ ಆರಂಭಿಕ ಬೆನ್ ಡಕೆಟ್ (149 ರನ್, 170 ಎಸೆತ 21 ಬೌಂಡರಿ, 1 ಸಿಕ್ಸರ್​) ಭರ್ಜರಿ ಶತಕದ ಹೋರಾಟ ಭಾರತದ ಗೆಲುವು ಕಸಿಯಿತು. ಈ ಮೂಲಕ 5 ಪಂದ್ಯಗಳ ಸರಣಿಯಲ್ಲಿ ಟೀಮ್ ಇಂಡಿಯಾ 0-1 ಹಿನ್ನಡೆ ಕಂಡಿದೆ. ಇದರಿಂದ ಶುಭಮಾನ್ ಗಿಲ್ ನಾಯಕತ್ವದ ಮೊದಲ ಪಂದ್ಯದಲ್ಲಿ ಭಾರತ ನಿರಾಸೆ ಅನುಭವಿಸಿದಂತಾಗಿದೆ.

ಸುಲಭವಾಗಿ ಗೆಲ್ಲಬಹುದಾಗಿದ್ದ ಪಂದ್ಯವನ್ನು ಟೀಮ್​ ಇಂಡಿಯಾ ಕೈಚೆಲ್ಲಿತು. ಇದಕ್ಕೆ ಪ್ರಮುಖ ಕಾರಣ ಏನೆಂದರೆ, ಫೀಲ್ಡಿಂಗ್ ವೈಫಲ್ಯ. ಈ ಪಂದ್ಯದಲ್ಲಿ ಭಾರತೀಯ ಫೀಲ್ಡರ್‌ಗಳು ಒಟ್ಟು 6 ಕ್ಯಾಚ್‌ಗಳನ್ನು ಕೈಬಿಟ್ಟರು. ಇದೇ ಇಂಗ್ಲೆಂಡ್​ ತಂಡಕ್ಕೆ ವರವಾಯಿತು.

ಕೊನೆಯ ದಿನದಾಟದಲ್ಲೂ ಟೀಮ್ ಇಂಡಿಯಾದ ಫೀಲ್ಡಿಂಗ್ ಸ್ವಲ್ಪವೂ ಸುಧಾರಿಸಲಿಲ್ಲ. ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದ ಬೆನ್ ಡಕೆಟ್ 97 ರನ್ ಗಳಿಸಿದ್ದಾಗ ಸಿರಾಜ್​ ಬೌಲಿಂಗ್​ನಲ್ಲಿ ಶಾಟ್​ ಆಡಲು ಹೋಗಿ ಕ್ಯಾಚ್ ನೀಡಿದರು. ಆದರೆ,​ ಯಶಸ್ವಿ ಜೈಸ್ವಾಲ್ ಆ ಕ್ಯಾಚ್​ ಅನ್ನು ಕೈಚೆಲ್ಲಿದರು. ಒಂದು ಜೀವದಾನ ಪಡೆದ ಡಕೆಟ್​ 149 ರನ್ ಗಳಿಸಿ ಇಂಗ್ಲೆಂಡ್ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಇದನ್ನೂ ಓದಿ: ಈ ಮೂರು ರಾಶಿಯವರು ಹಣವನ್ನು ಅಯಸ್ಕಾಂತದ ರೀತಿ ಸೆಳೆಯುತ್ತಾರಂತೆ! ನಿಮ್ಮ ರಾಶಿಯೂ ಇದೇನಾ? Zodiac Signs

ಮೈಕಲ್​ ವಾನ್​ ವ್ಯಂಗ್ಯ

ಈ ಸರಣಿಯಲ್ಲಿ ಟೀಮ್ ಇಂಡಿಯಾದ ಕಳಪೆ ಫೀಲ್ಡಿಂಗ್ ಪ್ರದರ್ಶನಕ್ಕಾಗಿ ಇಂಗ್ಲೆಂಡ್‌ನ ಮಾಜಿ ನಾಯಕ ಮೈಕೆಲ್ ವಾನ್ ಟ್ರೋಲ್ ಮಾಡಿದ್ದಾರೆ. ನಾನು ಈ ಭಾರತೀಯ ತಂಡಕ್ಕೆ ಫೀಲ್ಡಿಂಗ್ ಕೋಚ್ ಎಂದು ಘೋಷಿಸುತ್ತಿದ್ದೇನೆ. ನನ್ನ ಫೀಲ್ಡಿಂಗ್ ಅಕಾಡೆಮಿ ಈಗ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಮೈಕಲ್​ ವಾನ್​ ವ್ಯಂಗ್ಯವಾಗಿ ಟ್ವೀಟ್ ಮಾಡಿದ್ದಾರೆ.

ಮೈಕಲ್​ ವಾನ್​ ಕಾಲೆಳೆದ ಟೀಮ್​ ಇಂಡಿಯಾ ಫ್ಯಾನ್ಸ್

ಮೈಕಲ್​ ವಾನ್​ ಮಾಡಿರುವ ಟ್ವೀಟ್​ ಅನ್ನು ವಿರೋಧಿಸುತ್ತಿರುವ ಭಾರತೀಯ ಅಭಿಮಾನಿಗಳು, ಈ ಹಿಂದೆ ಮೈಕಲ್​ ವಾನ್ ಕ್ಯಾಚ್‌ ಬಿಟ್ಟಂತಹ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು ಕಾಲೆಳೆಯುತ್ತಿದ್ದಾರೆ. ಈ ಹಿಂದೆ, ಮೈಕಲ್​ ವಾನ್​ ತಮ್ಮದೇ ತಂಡವನ್ನು ಇದೇ ರೀತಿ ಟ್ರೋಲ್ ಮಾಡಿದ್ದರು. ಸಾಮಾಜಿಕ ಜಾಲತಾಣದಲ್ಲಿ ಆ್ಯಕ್ಟಿವ್​ ಆಗಿರುವ ಮೈಕಲ್​ ವಾನ್​ ಕ್ರಿಕೆಟ್​ ಸಂಬಂಧ ಏನಾದರೂ ಒಂದು ಟ್ವೀಟ್​ ಮಾಡುತ್ತಲೇ ಇರುತ್ತಾರೆ.

ಅಂದಹಾಗೆ, ಇಂಗ್ಲೆಂಡ್ ಮತ್ತು ಭಾರತ ನಡುವಿನ ಎರಡನೇ ಟೆಸ್ಟ್ ಪಂದ್ಯ ಮುಂದಿನ ಬುಧವಾರದಿಂದ ಆರಂಭವಾಗಲಿದೆ. (ಏಜೆನ್ಸೀಸ್​)

https://www.vijayavani.net/ind-vs-end-captain-shubman-gill-sensational-comments-after-the-defeat-in-the-first-test

https://www.vijayavani.net/team-india-created-history-for-the-first-time-in-the-93-year-history-of-indian-test-cricket