ನಾರಿ ಪಡೆಯ ಆರ್ಭಟಕ್ಕೆ ದಾಖಲೆಗಳು ಉಡೀಸ್​: ವಿಶ್ವದಲ್ಲೇ ಈ ಸಾಧನೆ ಮಾಡಿದ ಮೊದಲ ತಂಡ ಭಾರತ! Team India

ಮುಂಬೈ: ನಿನ್ನೆ (ಅ.30) ನಡೆದ ಸೆಮಿಫೈನಲ್ ಪಂದ್ಯದಲ್ಲಿ ಭಾರತೀಯ ಮಹಿಳಾ ಕ್ರಿಕೆಟ್ ತಂಡ ( Team India ) ಪವಾಡವನ್ನೇ ಪ್ರದರ್ಶಿಸಿತು. ತೀವ್ರ ಒತ್ತಡದಲ್ಲೂ ಅಸಾಧಾರಣ ಪ್ರದರ್ಶನ ನೀಡಿದ ಹರ್ಮನ್​ಪ್ರೀತ್​ ಕೌರ್​ ಪಡೆ, 2025ರ ಐಸಿಸಿ ಮಹಿಳಾ ಏಕದಿನ ವಿಶ್ವಕಪ್​ನ ಅಂತಿಮ ಘಟ್ಟ ಫೈನಲ್‌ಗೆ ಪ್ರವೇಶಿಸಿತು.

ಅಂದಹಾಗೆ, ಫೈನಲ್​ ಪ್ರವೇಶದ ಹಾದಿ ಅಷ್ಟೊಂದು ಸುಲಭವಾಗಿರಲಿಲ್ಲ. ಏಕೆಂದರೆ, ನಮ್ಮ ನಾರಿ ಶಕ್ತಿ, ಹಾಲಿ ಚಾಂಪಿಯನ್​ ಮತ್ತು ಬಲಿಷ್ಠ ಆಸ್ಟ್ರೇಲಿಯಾ ತಂಡವನ್ನು ಸೋಲಿಸಿ ಟ್ರೋಫಿಯನ್ನು ಮುತ್ತಿಕ್ಕಲು ಒಂದು ಹೆಜ್ಜೆ ಸನಿಹದಲ್ಲಿದೆ. ಇದೇ ಆಸ್ಟ್ರೇಲಿಯಾ ತಂಡ ಲೀಗ್​ನಲ್ಲಿ ಭಾರತವನ್ನು ಸೋಲಿಸಿತ್ತು.

ಆಸೀಸ್ ತಂಡ ನೀಡಿದ 339 ರನ್‌ಗಳ ಬೃಹತ್ ಗುರಿಯನ್ನು ಬೆನ್ನಟ್ಟುವಲ್ಲಿ, ಭಾರತದ ಒನ್-ಡೌನ್ ಬ್ಯಾಟ್ಸ್‌ಮನ್ ಜೆಮಿಮಾ ರೊಡ್ರಿಗಸ್ (134 ಎಸೆತಗಳಲ್ಲಿ 127 ರನ್​) ಅಜೇಯ ಶತಕದೊಂದಿಗೆ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಹರ್ಮನ್‌ಪ್ರೀತ್ ಕೌರ್ ನಾಯಕಿಯ ಇನ್ನಿಂಗ್ಸ್‌ನೊಂದಿಗೆ (88 ಎಸೆತಗಳಲ್ಲಿ 89 ರನ್​) ಮಿಂಚಿದರು. ಆಸೀಸ್ ವಿರುದ್ಧದ ಗೆಲುವಿನೊಂದಿಗೆ ಅಂತಿಮ ಸ್ಥಾನವನ್ನು ಭದ್ರಪಡಿಸಿಕೊಳ್ಳುವುದರ ಜೊತೆಗೆ, ಭಾರತ ತಂಡವು ಹಲವಾರು ವಿಶ್ವ ದಾಖಲೆಗಳನ್ನು ಮುರಿದಿದೆ.

ಮಹಿಳಾ ಏಕದಿನ ಕ್ರಿಕೆಟ್ ಇತಿಹಾಸದಲ್ಲೇ ಯಾವುದೇ ತಂಡವು ಮಾಡಿರದ ಅತ್ಯಧಿಕ ರನ್​ ಚೇಸಿಂಗ್​ ಇದಾಗಿದೆ. ಈ ದಾಖಲೆ ಈ ಹಿಂದೆ ಆಸ್ಟ್ರೇಲಿಯಾ ಹೆಸರಿನಲ್ಲಿತ್ತು. 2025ರ ಏಕದಿನ ವಿಶ್ವಕಪ್‌ನ ಲೀಗ್ ಹಂತದ ಭಾಗವಾಗಿ ಭಾರತ ನಿಗದಿಪಡಿಸಿದ 331 ರನ್‌ಗಳ ಗುರಿಯನ್ನು ಆಸ್ಟ್ರೇಲಿಯಾ ಬೆನ್ನಟ್ಟಿತ್ತು. ಈಗ ಟೀಮ್ ಇಂಡಿಯಾ ಅದೇ ತಂಡದ ವಿರುದ್ಧ 339 ರನ್‌ಗಳ ಗುರಿಯನ್ನು ಪೂರ್ಣಗೊಳಿಸಿ ಅದನ್ನು ಸಾಧಿಸಿದೆ.

ಇದನ್ನೂ ಓದಿ: ರೋಡ್ರಿಗಸ್ ಭರ್ಜರಿ ಶತಕ, ಕೌರ್​ ಮಿಂಚಿನಾಟ! ಆಸೀಸ್​ಗೆ ಸೋಲುಣಿಸಿ ವಿಶ್ವಕಪ್​ ಫೈನಲ್​ಗೇರಿದ ಭಾರತ | IND vs AUS Womens

ವಿಶ್ವದ ಒಂದು ತಂಡವು ಪುರುಷ ಮತ್ತು ಮಹಿಳಾ ಕ್ರಿಕೆಟ್‌ನಲ್ಲಿ ಏಕದಿನ ವಿಶ್ವಕಪ್ ನಾಕೌಟ್ ಪಂದ್ಯಗಳಲ್ಲಿ 300ಕ್ಕಿಂತ ಹೆಚ್ಚು ರನ್ ಗಳಿಸಿದ್ದು ಇದೇ ಮೊದಲು.

ಈ ಪಂದ್ಯದಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ಜಂಟಿಯಾಗಿ 679 ರನ್ ಗಳಿಸಿದವು. ಈ ಮೂಲಕ ಈ ಪಂದ್ಯಾವಳಿಯ ಇತಿಹಾಸದಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ತಂಡಗಳೆಂಬ ಹೆಗ್ಗಳಿಕೆಗೆ ಪಾತ್ರವಾದವು. ಇದಕ್ಕೂ ಮೊದಲು, ಈ ದಾಖಲೆ ಇಂಗ್ಲೆಂಡ್ ಮತ್ತು ದಕ್ಷಿಣ ಆಫ್ರಿಕಾ ಹೆಸರಿನಲ್ಲಿತ್ತು. 2017 ರ ಬ್ರಿಸ್ಟಲ್‌ನಲ್ಲಿ ನಡೆದ ವಿಶ್ವಕಪ್‌ನಲ್ಲಿ ಈ ತಂಡಗಳು 678 ರನ್ ಗಳಿಸಿದವು.

ಈ ಪಂದ್ಯದ ಸಮಯದಲ್ಲಿ ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ್ತಿ ಫೋಬೆ ಲಿಚ್‌ಫೀಲ್ಡ್ ಕಿರಿಯ ವಯಸ್ಸಿನಲ್ಲಿಯೇ ಇತಿಹಾಸ ಸೃಷ್ಟಿಸಿದರು. ಮಹಿಳಾ ಏಕದಿನ ವಿಶ್ವಕಪ್ ನಾಕೌಟ್ ಪಂದ್ಯದಲ್ಲಿ ಶತಕ ಗಳಿಸಿದ ಅತ್ಯಂತ ಕಿರಿಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಲಿಚ್‌ಫೀಲ್ಡ್ 22 ನೇ ವಯಸ್ಸಿನಲ್ಲಿ ಈ ಸಾಧನೆ ಮಾಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/are-these-symptoms-in-your-area-there-will-definitely-be-king-cobra-there

https://www.vijayavani.net/fact-check-pile-of-condoms-found-in-drain-of-delhi-girls-hostel-fake-story-punctured