‘ಆದಿಪುರುಷ್’ ಎಂಬ ಚಿತ್ರದಲ್ಲಿ ಪ್ರಭಾಸ್ ಹೀರೋ ಆಗಿ ಅಭಿನಯಿಸುತ್ತಿದ್ದಾರೆ, ಇದೊಂದು ಬಹುಕೋಟಿ ವೆಚ್ಚದ ಥ್ರೀಡಿ ಚಿತ್ರ, ಈ ಚಿತ್ರದಲ್ಲಿ ವಿಲನ್ ಆಗಿ ಸೈಫ್ ಅಲಿ ಖಾನ್ ನಟಿಸಲಿದ್ದಾರೆ … ಎಂಬ ಸುದ್ದಿಗಳೆಲ್ಲಾ ಗೊತ್ತೇ ಇದೆ. ಈಗ ಚಿತ್ರತಂಡದ ಕಡೆಯಿಂದ ಇನ್ನೂ ಒಂದು ಸುದ್ದಿ ಹೊರಬಿದ್ದಿದೆ.
ಇದನ್ನೂ ಓದಿ: ಎರಡರ ಜತೆಗೆ ಇನ್ನೊಂದು: ತೆಲುಗಿನ ಅಂಧಾದುನ್ ರೀಮೇಕ್ನಲ್ಲಿ ನಭಾ ನಟೇಶ್
ಚಿತ್ರದಲ್ಲಿ ಪ್ರಭಾಸ್ ಏನೋ ಹೀರೋ ಆಗಿ ನಟಿಸುತ್ತಿದ್ದಾರೆ. ಆದರೆ, ಅವರಿಗೂ ಮುನ್ನ ಇನ್ನೊಬ್ಬ ಸ್ಟಾರ್ ನಟ ಈ ಚಿತ್ರದಲ್ಲಿ ನಟಿಸಬೇಕಿತ್ತಂತೆ. ಅವರು ಚಿತ್ರದಲ್ಲಿ ನಟಿಸಬೇಕೋ, ಬೇಡವೋ ಎಂದು ಮೀನಾ-ಮೇಷ ಎಣಿಸುತ್ತಾ ಕುಳಿತಿದ್ದರಿಂದ, ಅವರನ್ನು ಬಿಟ್ಟು ಪ್ರಭಾಸ್ ಮನೆಯತ್ತ ಚಿತ್ರತಂಡ ಹೊರಟಿದೆ. ಕೊನೆಗೆ ಪ್ರಭಾಸ್ ಆ ಪಾತ್ರವನ್ನು ಒಪ್ಪಿಕೊಂಡಿದ್ದಾರೆ.
ಇಷ್ಟಕ್ಕೂ ಹಾಗೆ ಯೋಚನೆ ಮಾಡಿದ ಸ್ಟಾರ್ ನಟ ಯಾರು ಗೊತ್ತಾ? ಹೃತಿಕ್ ರೋಶನ್. ಹೌದು, ಈ ಚಿತ್ರದ ನಾಯಕನ ಪಾತ್ರಕ್ಕೆ ನಿರ್ದೇಶಕ ಓಂ ರೌತ್ ಅವರ ಮೊದಲ ಆಯ್ಕೆಯಾಗಿದ್ದು ಹೃತಿಕ್ ರೋಶನ್ ಅಂತೆ. ನಿರ್ದೇಶಕರು ಹೋಗಿ ಹೃತಿಕ್ ಅವರನ್ನು ಭೇಟಿ ಮಾಡಿ ಚಿತ್ರದ ಬಗ್ಗೆ ಹೇಳಿದರಂತೆ.
ಆದರೆ, ಹೃತಿಕ್ ಮಾತ್ರ ಚಿತ್ರ ಮಾಡುತ್ತೀನಿ ಅಂತಲೂ ಹೇಳಲಿಲ್ಲ, ಮಾಡುವುದಿಲ್ಲ ಎಂದೂ ಹೇಳಲಿಲ್ಲ. ನೋಡೋಣ ಎಂದು ಸಮಯ ತೆಗೆದುಕೊಂಡು ಅವರು, ಸಾಕಷ್ಟು ಕಾಯಿಸಿದರಂತೆ. ಹೃತಿಕ್ ಅವರಿಂದ ಯಾವುದೇ ಪ್ರತಿಕ್ರಿಯೆ ಬರದ ಕಾರಣ, ನಿರ್ದೇಶಕರು ಇನ್ನೊಬ್ಬ ಹೀರೋ ನೋಡೋಣ ಎಂದು ಹೊರಟಿದ್ದಾರೆ. ಆಗ ಅವರ ಮನಸ್ಸಿಗೆ ಬಂದಿದ್ದು ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್.
ಇದನ್ನೂ ಓದಿ: ಕೂಡಿಬಂತೆ ಕಂಕಣಬಲ?: ಕಾಜಲ್ ಅಗರವಾಲ್ ನಿಶ್ಚಿತಾರ್ಥ ವದಂತಿ
ಪ್ರಭಾಸ್ಗೆ ಕಥೆ ಮತ್ತು ಪಾತ್ರ ಹೇಳುತ್ತಿದ್ದಂತೆಯೇ ಅವರು ಒಪ್ಪಿಕೊಂಡು ಚಿತ್ರದಲ್ಲಿ ನಟಿಸುವುದಕ್ಕೆ ಮುಂದಾಗಿದ್ದಾರೆ. ‘ಆದಿಪುರುಷ್’ ಚಿತ್ರವು ರಾಮಾಯಣವನ್ನಾಧರಿಸಿದ್ದು, ಈ ಚಿತ್ರವನ್ನು ಟಿ-ಸೀರೀಸ್ನ ಭೂಷಣ್ ಕುಮಾರ್ ನಿರ್ಮಿಸುತ್ತಿದ್ದಾರೆ. ಸದ್ಯಕ್ಕೆ ಪ್ರೀ-ಪ್ರೊಡಕ್ಷನ್ ಕೆಲಸಗಳು ಪ್ರಾರಂಭವಾಗಿವೆ. ಬಹುಶಃ 2021ರ ಮಧ್ಯಭಾಗದಲ್ಲಿ ಈ ಚಿತ್ರ ಪ್ರಾರಂಭವಾಗಿ 2022ರಲ್ಲಿ ಬಿಡುಗಡೆಯಾಗಲಿದೆ ಎಂದು ಹೇಳಲಾಗುತ್ತಿದೆ.