ಕುಡುಕರ ತಾಣ ಬಸ್ಸು ತಂಗುದಾಣ: ಬೆಳ್ಳಂಬೆಳಗ್ಗೆಯೇ ಕುಡಿದು ತೂರಾಡುವ ಕಾರ್ಮಿಕರು ಪ್ರಯಾಣಿಕರಿಗೆ ನಿತ್ಯ ಕಿರಿಕಿರಿ

ನರೇಂದ್ರ ಎಸ್. ಮರಸಣಿಗೆ ಹೆಬ್ರಿ
ಹೆಬ್ರಿ ಹಾಗೂ ಕುಂದಾಪುರವನ್ನು ಸಂಪರ್ಕಿಸುವ ರಸ್ತೆಯ ಸ್ಪಟಿಕ ಪ್ಲಾಜಾದ ಮುಂಭಾಗದಲ್ಲಿರುವ ಸರ್ಕಾರಿ ಬಸ್ಸು ತಂಗುದಾಣ ಸದ್ಯ ಕುಡುಕರ ಆಶ್ರಯ ತಾಣವಾಗಿ ಮಾರ್ಪಟ್ಟಿದೆ.

ಕುಡುಕರಿಂದಾಗಿ ಬಸ್ಸಿಗಾಗಿ ಕಾಯುವ ಮಹಿಳೆಯರು, ಮಕ್ಕಳು, ಶಾಲಾ ವಿದ್ಯಾರ್ಥಿಗಳಿಗೆ ತೀವ್ರ ಕಿರಿಕಿರಿಯಾಗುತ್ತಿದ್ದು, ಅವರು ಬಸ್ಸು ತಂಗುದಾಣದ ಬಹುದೂರದಲ್ಲಿ ನಿಂತುಕೊಂಡು ಬಸ್ಸಿಗಾಗಿ ಕಾಯುತ್ತಾರೆ. ಹೆಬ್ರಿ ಗ್ರಾಮ ಪಂಚಾಯಿತಿ ಸೂಕ್ತ ಕ್ರಮ ವಹಿಸಿದ್ದರೂ ಕುಡುಕರ ನಿಯಂತ್ರಣ ಸಾಧ್ಯವಾಗುತ್ತಿಲ್ಲ.
ಮುಂಜಾನೆಯೇ ಮದ್ಯ ಸಿಗುತ್ತದೆಯೇ?: ಕುಡುಕರು ಬೆಳಗ್ಗಿನಿಂದ ಸಂಜೆ ತನಕ ಈ ತಂಗುದಾಣದಲ್ಲಿ ತೂರಾಡುತ್ತಿರುತ್ತಾರೆ. ಬಹುತೇಕರು ಬೆಳಗ್ಗೆ ಕೆಲಸಕ್ಕೆ ಹೋಗುವಾಗಲೇ ಮದ್ಯ ಸೇವಿಸಿ ಹೋಗುತ್ತಾರೆ. ಬೆಳಗ್ಗಿನಿಂದಲೇ ಕುಡುಕರ ಸಂಖ್ಯೆಯನ್ನು ಗಮನಿಸುವಾಗ ಸಾರ್ವಜನಿಕ ವಲಯದಲ್ಲಿ ಬೆಳಗ್ಗಿನಿಂದಲೇ ಹೆಬ್ರಿಯ ಪೇಟೆಯಲ್ಲಿ ಮದ್ಯ ಸಿಗುತ್ತದೆಯೇ ಎಂಬ ಅನುಮಾನ ಸಾರ್ವಜನಿಕ ವಲಯದಲ್ಲಿ ಕೇಳಿಬಂದಿದೆ. ಒಂದು ವೇಳೆ ಸಿಗುತ್ತಿದ್ದರೂ ಸಂಬಂಧಪಟ್ಟ ಅಧಿಕಾರಿಗಳು ಏಕೆ ಕಣ್ಣು ಮುಚ್ಚಿ ಕುಳಿತಿದ್ದಾರೆ ಎಂಬುದು ಇಲ್ಲಿನ ಜನತೆಯ ಪ್ರಶ್ನೆಯಾಗಿದೆ.

ಕ್ರಮ ಕೈಗೊಂಡಿದ್ದ ಹೆಬ್ರಿ ಪಂಚಾಯಿತಿ

ಸಾರ್ವಜನಿಕರ ಒತ್ತಾಯದ ಮೇರೆಗೆ ಕುಡುಕರು ಮಲಗಲು ಸಾಧ್ಯವಾಗದಂತೆ ಕಬ್ಬಿಣದ ಸರಳುಗಳನ್ನು ಅಳವಡಿಸಿ ಕೇವಲ ಕುಳಿತುಕೊಳ್ಳಲು ಸಾಧ್ಯವಾಗುವಂತೆ ಹೆಬ್ರಿ ಪಂಚಾಯಿತಿ ವ್ಯವಸ್ಥೆಯನ್ನು ಮಾಡಿತ್ತು. ಇದಕ್ಕೆಲ್ಲ ಕ್ಯಾರೇ ಎನ್ನದ ಕುಡುಕರು ನೇರವಾಗಿ ನೆಲದ ಮೇಲೆ ಬಿದ್ದುಕೊಳ್ಳುತ್ತಿದ್ದಾರೆ. ಪಂಚಾಯಿತಿ ಸಾರ್ವಜನಿಕ ಹಿತಕ್ಕಾಗಿ ಸೂಕ್ತ ವ್ಯವಸ್ಥೆ, ಅಗತ್ಯ ಕ್ರಮವನ್ನು ಕೈಗೊಂಡರೂ ಅದು ಪ್ರಯೋಜನಕ್ಕೆ ಬಂದಿಲ್ಲ.
ಮಹಿಳೆಯರು, ಮಕ್ಕಳು ಸುಳಿಯುವುದಿಲ್ಲ: ಕುಡುಕರ ಅಟಾಟೋಪವನ್ನು ನೋಡುವಾಗ ಮಹಿಳೆಯರು ಸಣ್ಣ ಮಕ್ಕಳು ಹತ್ತಿರ ಸುಳಿಯುವುದಿಲ್ಲ. ಬಸ್ಸಿಗಾಗಿ ಕಾಯುವಾಗ ಕುಡುಕರಿಂದ ದೂರವಿರಲು ಅಂಗಡಿ ಮುಂಗಟ್ಟು ಬಳಿ ನಿಲ್ಲುವ ಅನಿವಾರ್ಯ ಪರಿಸ್ಥಿತಿ ಎದುರಾಗಿದೆ. ವಿದ್ಯಾರ್ಥಿಗಳಿಗೆ ಕೂಡ ಇದು ಸಮಸ್ಯೆಯಾಗಿ ಪರಿಣಮಿಸಿದೆ.

ಸ್ಥಳಾಂತರಕ್ಕೆ ಜನಾಗ್ರಹ

ಸಾರ್ವಜನಿಕರ ಬೇಡಿಕೆಯಂತೆ ಬಸ್ಸು ತಂಗುದಾಣವನ್ನು ಸ್ಥಳಾಂತರಿಸಿ ಸರಿಯಾದ ಜಾಗದಲ್ಲಿ ಸುಸಜ್ಜಿತ ಬಸ್ಸು ತಂಗುದಾಣ ನಿರ್ಮಾಣ ಮಾಡುವಂತೆ ಜನರ ಬೇಡಿಕೆ ಇದೆ. ಈ ಬಗ್ಗೆ ಸಂಬಂಧಪಟ್ಟವರು ಕ್ರಮ ವಹಿಸಬೇಕಾಗಿದೆ.

ಮಹಿಳೆಯರ ವಿರೋಧ

ಬಹುತೇಕ ಕೂಲಿ ಕಾರ್ಮಿಕರು ಬೆಳ್ಳಂಬೆಳಗ್ಗೆಯೇ ಮದ್ಯಪಾನ ಮಾಡಿ ಕೂಲಿ, ಕಟ್ಟಡ ಕೆಲಸಕ್ಕೆ ತೆರಳುತ್ತಾರೆ. ಇದರಿಂದಾಗಿ ಕೆಲಸದ ಸ್ಥಳಗಳಲ್ಲಿ ಅಪಾಯಗಳು ಸಂಭವಿಸಿದ ಸಾಕಷ್ಟು ಉದಾಹರಣೆಗಳಿವೆ. ದಯವಿಟ್ಟು ನಿಗದಿತ ಸಮಯದಲ್ಲಿ ಮಾತ್ರವೇ ಮದ್ಯದ ಅಂಗಡಿಗಳು ತೆರೆಯಲಿ. ಈ ರೀತಿಯ ಬೆಳವಣಿಗೆಯಿಂದ ಬಡ ಕುಟುಂಬದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆ. ಮುಂಜಾನೆ ಎಲ್ಲೂ ಮದ್ಯ ವಿತರಿಸದಂತೆ ಅಧಿಕಾರಿಗಳು ಕ್ರಮ ವಹಿಸಬೇಕೆನ್ನುವುದು ಸ್ಥಳೀಯ ಮಹಿಳೆಯರ ಆಗ್ರಹ.

ಹೊರ ರಾಜ್ಯದ ಕೂಲಿ ಕಾರ್ಮಿಕರೇ ಅಧಿಕ

ಹೊರ ರಾಜ್ಯದ ಕೂಲಿ ಕಾರ್ಮಿಕರೇ ಹೆಚ್ಚಾಗಿ ಈ ಬಸ್ಸು ತಂಗುದಾಣದಲ್ಲಿ ಬೀಡುಬಿಡುತ್ತಾರೆ. ಅಲ್ಲಲ್ಲಿ ಕೆಲವು ಕಾರ್ಖಾನೆಗಳಲ್ಲಿ ಕೆಲಸ ಮಾಡುವ ಕಾರ್ಮಿಕರು ಮದ್ಯ ಸೇವನೆ ಮಾಡಿ ಬೇಕಾಬಿಟ್ಟಿ ವರ್ತಿಸುತ್ತಾರೆ. ಇನ್ನು ಕೆಲವರು ನಡು ರಸ್ತೆಯಲ್ಲೇ ನಡೆದುಕೊಂಡು ಹೋಗಿ ಅಪಘಾತಗಳಿಗೆ ಕಾರಣವಾಗಿದ್ದಾರೆ. ಮುಂದಿನ ದಿನಗಳಲ್ಲಿ ಕುಡುಕರ ಉಪಟಳವನ್ನು ನಿಯಂತ್ರಣ ಮಾಡಲು ಸಂಬಂಧಪಟ್ಟವರು ಮುಂದಾಗಬೇಕೆಂದು ಇಲ್ಲಿನ ನಾಗರಿಕರು ಆಗ್ರಹಿಸಿದ್ದಾರೆ.

https://www.vijayavani.net/indias-largest-king-cobra-found-at-hebri

https://www.vijayavani.net/old-rivals-battle-in-udupi-chikkamagaluru

https://www.vijayavani.net/police-caught-accused-within-48-hours-of-shop-theft