ಅಪ್ಪ ಈ ಮಾತು ಹೇಳುವವರೆಗೂ ಮಗನಿಗೆ ಈ ವಿಷಯ ಹೊಳೆದೇ ಇರುವುದಿಲ್ಲ. ಚಿತ್ರ ನಿರ್ದೇಶಿಸಬೇಕು ಎಂಬ ತನ್ನ ಕನಸು ನನಸು ಮಾಡಿಕೊಳ್ಳುವುದಕ್ಕೆ ಆತ ಇಡೀ ಗಾಂಧಿನಗರವನ್ನು ಒಂದು ರೌಂಡು ಸುತ್ತಿಬಂದಿರುತ್ತಾನೆ. ನೂರೆಂಟು ನಿರ್ಮಾಪಕರಿಗೆ ಕಥೆ ಹೇಳುವುದಕ್ಕೆ ಹೋಗಿ ಹೊರದಬ್ಬಿಸಿಕೊಂಡಿರುತ್ತಾನೆ. ನಿರ್ದೇಶಕನಾಗುವುದಕ್ಕೆ ಅವಕಾಶಗಳೇ ಸಿಗುತ್ತಿಲ್ಲ ಎಂದು ಕುಳಿತಿರುವಾಗ ಅಪ್ಪ ಅರ್ಥ ಮಾಡಿಸುತ್ತಾನೆ. ನಿರ್ವಪಕರು ಸಿಗದಿದ್ದರೇನಂತೆ, ಚಿತ್ರ ನಿರ್ವಿುಸುವ ಅವಕಾಶವನ್ನು ತಾನೇ ಸೃಷ್ಟಿಸಿಕೊಳ್ಳುತ್ತಾನೆ ಗಿರಿ. ಅವನ ಜತೆಗೆ ಇನ್ನಿಬ್ಬರು ಗಿರಿಗಳು ಸೇರಿಕೊಳ್ಳುತ್ತಾರೆ. ಅಲ್ಲಿಗೆ ಹರಿಕಥೆ ಆಗಬಹುದಾಗಿದ್ದ ಒಂದು ಕಥೆ, ಕ್ರಮೇಣ ಗಿರಿಕಥೆಯಾಗುತ್ತದೆ. ‘ಹರಿಕಥೆ ಅಲ್ಲ ಗಿರಿಕಥೆ’ ಚಿತ್ರ ಮಾಡುವುದಕ್ಕೆ ಪ್ರಯಾಸ ಪಡುತ್ತಿರುವ ಸಿನಿಮಾ ಉತ್ಸಾಹಿಗಳ ಕಥೆ. ತಲೆ ತುಂಬಾ ಚಿತ್ರ ಮಾಡುವ ಹುಚ್ಚು ಹಿಡಿಸಿಕೊಂಡವರು, ಚಿತ್ರ ಮಾಡುವುದಕ್ಕೆ ಏನೆಲ್ಲಾ ಹುಚ್ಚು ಸಾಹಸಗಳನ್ನು ಮಾಡುತ್ತಾರೆ ಎನ್ನುವುದು ಚಿತ್ರದ ಕಥೆ. ಅಷ್ಟೆಲ್ಲಾ ಮಾಡಿ, ಕೊನೆಗೆ ಗಿರಿ ಮತ್ತು ತಂಡಕ್ಕೆ ಚಿತ್ರ ಮಾಡುವುದಕ್ಕೆ ಸಾಧ್ಯವಾ ಎಂದು ಹಾಸ್ಯಮಯವಾಗಿ ತೋರಿಸಲಾಗಿದೆ.
