ಟೆಸ್ಟ್​ ಡ್ರೈವ್ ವೇಳೆ ಮೂರನೇ ಮಹಡಿಯಿಂದ ಬಿದ್ದ ಕಾರು; ಇಬ್ಬರು ಸ್ಥಳದಲ್ಲೇ ಸಾವು..

ಶಾಂಘೈ: ಟೆಸ್ಟ್​ ಡ್ರೈವ್ ವೇಳೆ ಕಾರೊಂದು ಕಟ್ಟಡವೊಂದರ ಮೂರನೇ ಮಹಡಿಯಿಂದ ಕೆಳಕ್ಕೆ ಉರುಳಿದ್ದರಿಂದ ಕಾರು ಛಿದ್ರವೊಂಡಿದ್ದು, ಇಬ್ಬರು ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ. ಇದು ಚೀನಾ ಕಂಪನಿಯ ನೂತನ ನಿಯೊ ಕಾರಿನ ಟೆಸ್ಟ್​ ಡ್ರೈವ್ ವೇಳೆ ಈ ಅವಘಡ ಸಂಭವಿಸಿದೆ.

ನಿಯೊ ಕಂಪನಿಯ ಹೆಡ್​ ಕ್ವಾರ್ಟರ್ಸ್​ನ ಮೂರನೇ ಮಹಡಿಯಲ್ಲಿ ಇಂದು ಮಧ್ಯಾಹ್ನ ನೂತನ ಇಲೆಕ್ಟ್ರಿಕ್​ ಕಾರಿನ ಟೆಸ್ಟ್ ಡ್ರೈವ್ ನಡೆಯುತ್ತಿದ್ದಾಗ ಕಾರು ಮೇಲಿನಿಂದ ಕೆಳಕ್ಕೆ ಬಿದ್ದಿದೆ. ಸಾವಿಗೀಡಾದವರ ಪೈಕಿ ಒಬ್ಬರು ನಿಯೊ ಉದ್ಯೋಗಿಯಾಗಿದ್ದು, ಇನ್ನೊಬ್ಬರು ಪೂರೈಕೆದಾರರಲ್ಲಿ ಒಬ್ಬರು.

ಕಾರು ಬಿದ್ದ ಸ್ಥಳದ ದೃಶ್ಯಾವಳಿಯ ವಿಶ್ಲೇಷಣೆ ಪ್ರಕಾರ ಪ್ರಾಥಮಿಕವಾಗಿ ಇದು ಅಪಘಾತ ಎಂದು ಪರಿಗಣಿಸಲಾಗಿದೆ, ಇದು ವಾಹನದಿಂದಾದ ಅಪಘಾತವಲ್ಲ ಎಂದು ಕಂಪನಿಯು ಚೀನಾದಲ್ಲಿನ ಟ್ವಿಟರ್ ರೀತಿಯ ಸೋಷಿಯಲ್ ಮೀಡಿಯಾ ವೀಬೊದಲ್ಲಿ ಹೇಳಿಕೊಂಡಿದೆ.

ಅಪಘಾತ ಹೇಗೆ ಸಂಭವಿಸಿತು ಎಂಬ ಬಗ್ಗೆ ಕಂಪನಿ ಇನ್ನೂ ಏನೂ ಹೇಳಿಕೊಂಡಿಲ್ಲ. ಟೆಸ್ಟ್​ ಡ್ರೈವ್ ನಡೆಯುತ್ತಿದ್ದ ಮೂರನೇ ಮಹಡಿ ಕಾರ್​ ಪಾರ್ಕ್​ ಅಥವಾ ಶೋರೂಮ್ ಎನ್ನಲಾಗಿದೆ. ಅದಾಗ್ಯೂ ಕಂಪನಿಯಿಂದ ಮಾಧ್ಯಮದವರಿಗೆ ಇನ್ನೂ ಅಧಿಕೃತ ಹೇಳಿಕೆ ಲಭಿಸಿಲ್ಲ. ಬಿದ್ದಿರುವ ಕಾರು ಈ ಕಂಪನಿಯ ಇಟಿ5 ಮಾಡೆಲ್ ಎಂದು ಹೇಳಲಾಗಿದೆ. ಇದು ಸ್ವಯಂ ಚಾಲನಾ ತಂತ್ರಜ್ಞಾನ ಹೊಂದಿದೆ. ಇದು ಟೆಸ್ಲಾದ ಪ್ರತಿಸ್ಪರ್ಧಿ ಕಂಪನಿ ಎಂದೂ ಹೇಳಲಾಗುತ್ತಿದೆ. ಈ ಹಿಂದೆ ನಿಯೊ ಇಎಸ್​8 ಕಾರು ಅಪಘಾತಕ್ಕೆ ಒಳಗಾಗಿದ್ದು, ಚೀನಾದ ಉದ್ಯಮಿಯೊಬ್ಬರು ಸಾವಿಗೀಡಾಗಿದ್ದರು. -ಏಜೆನ್ಸೀಸ್

https://www.vijayavani.net/govt-teachers-children-should-learn-in-kannada-medium-only/

https://www.vijayavani.net/article-about-dr-bro-kannada/