ಹಳ್ಳಿ ಫೈಟ್​: ಮತದಾನದ ವೇಳೆ ಅಭ್ಯರ್ಥಿ, ನಿವೃತ್ತ ಶಿಕ್ಷಕ, ಅಜ್ಜಿ, ಮಹಿಳೆಯ ಪ್ರಾಣ ಹೊತ್ತೊಯ್ದ ಜವರಾಯ!

ಬೆಂಗಳೂರು: ರಾಜ್ಯದಲ್ಲಿ ಗ್ರಾಮ ಪಂಚಾಯಿತಿ ಚುನಾವಣೆಯ 2ನೇ ಹಂತದ ಮತದಾನ ಭಾನುವಾರ ನಡೆದಿದೆ. ಹಕ್ಕು ಚಲಾಯಿಸಿ ಹೋಗುವ ಮಾರ್ಗದಲ್ಲಿ ಹಾಗೂ ಮತದಾನ ಮಾಡಲೆಂದು ಬರುತ್ತಿದ್ದ ವೇಳೆ ಅವಘಡ ಸಂಭವಿಸಿದ್ದು, ನಾಲ್ವರು ಪ್ರಾಣ ಕಳೆದುಕೊಂಡಿದ್ದಾರೆ. ಈ ಪೈಕಿ ಓರ್ವ ಅಭ್ಯರ್ಥಿಯೂ ಸೇರಿದ್ದಾನೆ.

ಅಭ್ಯರ್ಥಿ ಸಾವು: ಕಕ್ಕೇರಿಯ ಗ್ರಾಮದ 2ನೇ ವಾರ್ಡ್​ನಿಂದ ಕಣಕ್ಕಿಳಿದಿದ್ದ ಅಭ್ಯರ್ಥಿ ಚಂದ್ರಶೇಖರ ಬಸಪ್ಪ ಅಂಬೋಜಿ(64) ಅನಾರೋಗ್ಯದಿಂದ ಬೆಳಗಾವಿ ಖಾಸಗಿ ಆಸ್ಪತ್ರೆಯಲ್ಲಿ ಭಾನುವಾರ ನಿಧನರಾದರು. ವಕೀಲರಾಗಿದ್ದ ಚಂದ್ರಶೇಖರ 3 ಬಾರಿ ವಿಧಾನಸಭೆ ಚುನಾವಣೆಯಲ್ಲಿ ಖಾನಾಪುರ ಕ್ಷೇತ್ರದಿಂದ ಸ್ಪರ್ಧಿಸಿ ಪರಾಭವಗೊಂಡಿದ್ದರು. ಬಿಷ್ಠಾದೇವಿ ಜೀಣೋದ್ಧಾರ ಟ್ರಸ್ಟ್ ಅಧ್ಯಕ್ಷರು, ಕಕ್ಕೇರಿ ಪಿಕೆಪಿಎಸ್ ಅಧ್ಯಕ್ಷರು ಹಾಗೂ ಗ್ರಾಪಂ ಸದಸ್ಯರಾಗಿ ಕೆಲಸ ಮಾಡಿದ್ದರು. ಭಾಗ್ಯಲಕ್ಷ್ಮೀ ಸಕ್ಕರೆ ಕಾರ್ಖಾನೆ ಮಾಜಿ ಅಧ್ಯಕ್ಷರಾಗಿದ್ದರು. ಮೃತರಿಗೆ ಪತ್ನಿ, ಪುತ್ರ, ಪುತ್ರಿ ಇದ್ದಾರೆ.

ಮತಗಟ್ಟೆಯಲ್ಲೇ ನಿವೃತ್ತ ಶಿಕ್ಷಕ ಸಾವು: ತುಮಕೂರು ಜಿಲ್ಲೆ ಚಿಕ್ಕನಾಯಕನಹಳ್ಳಿ ತಾಲೂಕಿನಲ್ಲಿ ಮತ ಚಲಾಯಿಸಲು ಬಂದ ತೀರ್ಥಪುರದ ನಿವೃತ್ತ ಶಿಕ್ಷಕ ಪುಟ್ಟಮರುಳಾರಾದ್ಯ (76) ಮತಗಟ್ಟೆಯಲ್ಲೇ ಕುಸಿದು ಬಿದ್ದು ಸಾವನ್ನಪ್ಪಿದರು. ಮತ ಚಲಾವಣೆಗೂ ಮುನ್ನವೇ ಈ ದುರಂತ ಸಂಭವಿಸಿದೆ. ಮತಗಟ್ಟೆ ಒಳಗೆ ತೆರಳುತ್ತಿದ್ದಾಗಲೇ ಕುಸಿದು ಬಿದ್ದರು. ಇದನ್ನೂ ಓದಿರಿ ಮತದಾನಕ್ಕೆ ಕರೆದೊಯ್ಯುತ್ತಿದ್ದ ಕಾರು ಪಲ್ಟಿ, 11 ಜನರ ಸ್ಥಿತಿ ಗಂಭೀರ

ಮತದಾನಕ್ಕೆ ಹೋಗಿದ್ದ ಮಹಿಳೆ ಸಾವು: ಚಿತ್ತಾಪುರ ಹೊರವಲಯದಲ್ಲಿ ಆಟೋ ಪಲ್ಟಿಯಾಗಿ ಯರಗಲ್ ಮೂಲದ ಚಿತ್ತಾಪುರ ಪಟ್ಟಣ ನಿವಾಸಿ ಸರಸ್ವತಿ ಕುಲಕರ್ಣಿ (40) ಮೃತಪಟ್ಟಿದ್ದಾರೆ. ಗ್ರಾಪಂ ಚುನಾವಣೆ ಹಿನ್ನೆಲೆ ಸ್ವಗ್ರಾಮ ಯರಗಲ್​ಗೆ ಕುಟುಂಬದವರ ಜತೆ ಹೋಗಿ ಮತದಾನದ ಹಕ್ಕು ಚಲಾಯಿಸಿ ಸರಸ್ವತಿ ಆಟೋದಲ್ಲಿ ಮರಳುತ್ತಿದ್ದರು. ಈ ವೇಳೆ ಅವಘಡ ಸಂಭವಿಸಿದೆ. ಚಾಲಕ ಮತ್ತು ಒಂದೇ ಕುಟುಂಬದ ನಾಲ್ವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಚಿತ್ತಾಪುರ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದು, ಚಿತ್ತಾಪುರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

https://www.vijayavani.net/hanumajayanti-siddaramaiah-nonveg/

https://www.vijayavani.net/condom-rolling-paper-orders-spike-in-2020/

https://www.vijayavani.net/grama-panchayat-election-drunker-kirik/