ಕಡೆಗೂ ಬಿಗ್​ಬಾಸ್ 11ರ​ ಆ್ಯಂಕರ್​ ಸೀಕ್ರೆಟ್​ ರಿವೀಲ್​! ಸೆ.29ರಿಂದ ಅಸಲಿ ಆಟ ಶುರು

ಬೆಂಗಳೂರು: ರಿಯಾಲಿಟಿ ಶೋಗಳ ಪೈಕಿ ಅತೀ ದೊಡ್ಡ ರಿಯಾಲಿಟಿ ಶೋ ಎಂದೇ ಖ್ಯಾತಿ ಗಳಿಸಿರುವ ಕನ್ನಡ ಬಿಗ್ ಬಾಸ್ ಮನರಂಜನಾ ಕಾರ್ಯಕ್ರಮಕ್ಕೆ ಇದೀಗ ಹೊಸ ರೂಪ ಸಿಕ್ಕಿದ್ದು,​ ಸೀಸನ್ 10ರ ಯಶಸ್ಸಿನ ನಂತರ ಸೀಸನ್​ 11 ಸಖತ್ ಸದ್ದು ಮಾಡುತ್ತಿದೆ. ಸತತ 11 ಸೀಸನ್​ಗಳನ್ನು ತಮ್ಮ ಖಡಕ್​ ಮಾತು, ವಿಭಿನ್ನ ಶೈಲಿಯಿಂದಲೇ ಅಚ್ಚುಕಟ್ಟಾಗಿ, ಯಶಸ್ವಿಯಾಗಿ ನಡೆಸಿಕೊಂಡು ಬಂದಿರುವ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್​, ಈ ಬಾರಿ ಕಾರ್ಯಕ್ರಮದ ಮುಂದಾಳತ್ವ ವಹಿಸಲಿದ್ದಾರಾ ಎಂಬ ಪ್ರಶ್ನೆ ವೀಕ್ಷಕರನ್ನು ಬೆಂಬಿಡದೆ ಕಾಡತೊಡಗಿತ್ತು. ಇದೀಗ ಆ ಎಲ್ಲಾ ಗೊಂದಲಗಳಿಗೆ ತೆರೆ ಬಿದ್ದಿದ್ದು, ಆ್ಯಂಕರ್​ ಯಾರು ಎಂಬುದು ಅಧಿಕೃತವಾಗಿ ರಿವೀಲ್ ಆಗಿದೆ.

ಇದನ್ನೂ ಓದಿ:ಸಾರ್ವಜನಿಕರ ಗಮನ ಸೆಳೆದ ಮಾನವ ಸರಪಳಿ ನಿರ್ಮಾಣ; ಪ್ರಜಾಪ್ರಭುತ್ವ ದಿನಾಚರಣೆ 

ಸೀಸನ್​ 10ರ ವಿನ್ನರ್​ ಪಟ್ಟ ಯಾರ ಪಾಲಾಗಲಿದೆ ಎಂಬ ಒಂದೇ ಒಂದು ಪ್ರಶ್ನೆ ವೀಕ್ಷಕರನ್ನು ಹೇಗೆ ಬೆಂಬಿಡದೆ ಕಾಡುತ್ತಿತ್ತೋ, ಅದೇ ರೀತಿ ಕಿಚ್ಚ ಸುದೀಪ್ ಅವರ ನಿರೂಪಣೆ ಶೋಗೆ ಇರಲಿದೆಯೇ ಎಂಬುದು ಕೂಡ ತಲೆಯಲ್ಲಿ ಬಗೆಹರಿಯದ ಸಮಸ್ಯೆಯಾಗಿ ಜನರಲ್ಲಿ ಕಾಡುತ್ತಿತ್ತು. ಈ ವಿಷಯಕ್ಕೆ ಸಂಬಂಧಿಸಿದಂತೆ ಕಳೆದ ಕೆಲವು ದಿನಗಳಿಂದ ಸಾಮಾಜಿಕ ಜಾಲತಾಣದಲ್ಲಿ ಸುದೀಪ್​ ಸೀಸನ್​ 11ರ ಆ್ಯಂಕರ್​​ ಸ್ಥಾನದಿಂದ ಕೆಳಗಿಳಿಯುತ್ತಾರೆ ಎಂಬ ಸುದ್ದಿಗಳು ವ್ಯಾಪಕವಾಗಿ ಹರಿದಾಡಿತ್ತು. ಆದ್ರೆ, ಇದೀಗ ಕಡೆಗೂ ಆ ಗೊಂದಲಗಳಿಗೆ ತೆರೆ ಎಳೆಯಲಾಗಿದ್ದು, ಬಿಗ್ ಬಾಸ್​ ಸೀಸನ್  11 ಅನ್ನು ಕೂಡ ಕಿಚ್ಚ ಸುದೀಪ್ ಅವರೇ ನಡೆಸಿಕೊಡಲಿದ್ದಾರೆ. ಈಗಾಗಲೇ ಕಾರ್ಯಕ್ರಮದ ಪ್ರೋಮೋ ಕೂಡ ಹೊರಬಿದ್ದಿದೆ.

ಒಂದೆಡೆ ಸುದೀಪ್ ನಿರೂಪಣೆ ಎಂದಿನಂತೆ ಈ ಸೀಸಸ್​ನಲ್ಲಿಯೂ ನೋಡಬಹುದು ಎಂದು ಖುಷಿ ಪಟ್ಟ ಅಭಿಮಾನಿಗಳು ಹಾಗೂ ವೀಕ್ಷಕರಿಗೆ ಇದೀಗ ಮತ್ತೊಂದು ಸುದ್ದಿ ಡಬಲ್ ಧಮಾಕಾ ನೀಡಿದೆ. ಪ್ರತಿವರ್ಷ ಅಕ್ಟೋಬರ್​ ತಿಂಗಳ ಮಧ್ಯೆ ಅಥವಾ ಕಡೆಯ ವಾರದಲ್ಲಿ ಅದ್ಧೂರಿ ಓಪನಿಂಗ್ ಪಡೆಯುತ್ತಿದ್ದ ಬಿಗ್ ಬಾಸ್​ ಕಾರ್ಯಕ್ರಮ ಈ ಬಾರಿ ಅಚ್ಚರಿ ಎಂಬಂತೆ ಇದೇ ಸೆ.29ರಿಂದ ಪ್ರಾರಂಭವಾಗಲಿದೆ. ಕಾರ್ಯಕ್ರಮಕ್ಕೆ ಸುದೀಪ್​ ಚಾಲನೆ ನೀಡಲಿದ್ದು, ಯಾರೆಲ್ಲಾ ಸ್ಟಾರ್​ ಸೆಲೆಬ್ರಿಟಿಗಳು ಬಿಗ್​ ಮನೆಯೊಳಗೆ ಬಿಗ್​ ಎಂಟ್ರಿ ಕೊಡಲಿದ್ದಾರೆ ಎಂಬುದನ್ನು ಸದ್ಯ ಕಾದು ನೋಡಬೇಕಿದೆ.

https://www.vijayavani.net/captain-cool-lost-his-temper-that-day