ರಸ್ತೆಯಲ್ಲಿ ಸಿಕ್ಕ 75 ಲಕ್ಷ ರೂ. ಪೊಲೀಸರಿಗೊಪ್ಪಿಸಿ ಪ್ರಾಮಾಣಿಕತೆ ಮೆರೆದ ದಂಪತಿ..!

ಇಡೀ ಜಗತ್ತು ಕರೊನಾದ ಕಪಿಮುಷ್ಠಿಯಲ್ಲಿ ಸಿಲುಕಿದೆ. ಹಲವು ದೇಶಗಳಲ್ಲಿ ಕಟ್ಟುನಿಟ್ಟಿನ ಲಾಕ್​ಡೌನ್​ ಇಲ್ಲ. ಭಾರತ ಸೇರಿ ಹಲವೆಡೆ ನಿರ್ಬಂಧಗಳನ್ನು ಸಡಿಸಲಿಸಲಾಗಿದೆ. ಸ್ಥಳೀಯವಾಗಿಯೇ ಈ ಬಗ್ಗೆ ನಿರ್ಧಾರ ಕೈಗೊಂಡು ಜನರಿಗೆ ತಿರುಗಾಡಲು ಅವಕಾಶ ಕಲ್ಪಿಸುತ್ತಿವೆ.

ಅಂತೆಯೇ, ಲಾಕ್​ಡೌನ್​ನಿಂದ ಮನೆಯಲ್ಲಿದ್ದು ಬೋರ್​ ಆಗಿದ್ದರಿಂದ ಅಮೆರಿಕದ ವರ್ಜಿನಿಯಾ ರಾಜ್ಯದ ಕ್ಯಾರೊಲಿನ್​ ಕೌಂಟಿಯ ಕುಟುಂಬವೊಂದು ಕಳೆದ ಶನಿವಾರ ಸುತ್ತಾಟಕ್ಕೆಂದು ತೆರಳಿದೆ. ಪಿಕ್​ಅಪ್​ ವಾಹನದಲ್ಲಿ ಡೇವಿಡ್​ ಪತ್ನಿ ಎಮಿಲಿ ಕರೆದುಕೊಂಡು ಹೋಗುತ್ತಿದ್ದಾಗ ರಸ್ತೆಯಲ್ಲಿ ಬ್ಯಾಗ್​ ಬಿದ್ದಿರುವುದು ಕಂಡಿದೆ. ವಾಹನ ನಿಲ್ಲಿಸಿದ ಡೇವಿಡ್​ ಅದನ್ನು ಎತ್ತಿಕೊಂಡಿದ್ದಾರೆ. ಕೊಂಚ ದೂರದಲ್ಲಿ ಇನ್ನೊಂದು ಬ್ಯಾಗ್​ ಕಂಡು ಬಂದಿದೆ. ಅದನ್ನು ಕೂಡ ವಾಹನಕ್ಕೆ ಹಾಕಿಕೊಂಡಿದ್ದಾರೆ. ಆ ಕ್ಷಣದಲ್ಲಿ ಅದರಲ್ಲೇನಿದೆ ಎಂಬ ಬಗ್ಗೆ ಅವರು ಚಿಂತೆ ಮಾಡಿರಲಿಲ್ಲ.

ಇದನ್ನೂ ಓದಿ; ಲಾಕ್​ಡೌನ್​ ಸಮಯದಲ್ಲಿ ಸೂರ್ಯನೂ ಥಂಡಾ…! ಏನಿದು ಸೋಲಾರ್​ ಮಿನಿಮಂ?

ಕೊಂಚ ಹೊತ್ತು ಸುತ್ತಾಡಿದ ಬಳಿಕ ಇಬ್ಬರೂ ಮನೆಗೆ ಮರಳಿದ್ದಾರೆ. ವಾಹನದ ಹಿಂದೆ ಬ್ಯಾಗ್​ ಇಟ್ಟಿದ್ದು ನೆನಪಿಗೆ ಬಂದು ಅದರಲ್ಲೇನಿದೆ ಎಂದು ನೋಡಿದಾಗ ಅಚ್ಚರಿ ಕಾದಿತ್ತು. ಎರಡೂ ಬ್ಯಾಗ್​ನಲ್ಲೂ ನೋಟುಗಳಿದ್ದವು. ಪ್ಲಾಸ್ಟಿಕ್​ ಚೀಲಗಳಲ್ಲಿ ನೋಟಿನ ಕಂತೆಗಳನ್ನು ಕಟ್ಟಿ ಇಡಲಾಗಿತ್ತು.

ಕೂಡಲೇ ಪೊಲೀಸರಿಗೆ ವಿಷಯ ತಿಳಿಸಿದ್ದಾರೆ. ಪೊಲೀಸರು ಮನೆಗೆ ಬಂದು ಲೆಕ್ಕ ಹಾಕಿದಾಗ ಬರೋಬ್ಬರಿ ಒಂದು ಮಿಲಿಯನ್​ ಡಾಲರ್​ ನಷ್ಟಿತ್ತು. ಅಂದರೆ 75 ಲಕ್ಷ ರೂ.ಗಳಿಗೂ ಹೆಚ್ಚು ಮೊತ್ತ ಅದರಲ್ಲಿತ್ತು.

ಇದನ್ನೂ ಓದಿ; ಕರೊನಾ ಲಸಿಕೆ ಮಾನವರ ಮೇಲೂ ಯಶಸ್ವಿ..! ವರ್ಷಾಂತ್ಯಕ್ಕೆ ಬಳಕೆಗೆ 

ಸದ್ಯ ಪೊಲೀಸರು ಹಣ ಯಾರಿಗೆ ಸೇರಿದ್ದು ಎಂಬುದನ್ನು ಪತ್ತೆ ಹಚ್ಚುತ್ತಿದ್ದಾರೆ. ಯಾರೇ ಆಗಿರಲಿ ದಂಪತಿಗೆ ಬಹುಮಾನ ಕೊಡುತ್ತಾರೆ ಎನ್ನುವುದಂತೂ ಪಕ್ಕಾ. ಜತೆಗೆ ಈ ದಂಪತಿ ಹಣವನ್ನು ಪೊಲೀಸರಿಗೆ ಒಪ್ಪಿಸಿ ಪ್ರಾಮಾಣಿಕತೆ ಮೆರೆದಿರುವುದು ಇತರರಿಗೂ ಮಾದರಿಯಾಗಿದೆ ಎಂದು ಅಧಿಕಾರಿಗಳು ಶ್ಲಾಘಿಸಿದ್ದಾರೆ.

https://www.vijayavani.net/bangladeshi-doctors-claim-drug-combination-to-cured-covid-19-patients-in-four-days/