ಚೆನ್ನೈ: ಕಾಲಿವುಡ್ ಖ್ಯಾತ ಸಂಗೀತ ನಿರ್ದೇಶಕ ಅನಿರುದ್ಧ್, ನಟಿ ಹಾಗೂ ಗಾಯಕಿ ಆಂಡ್ರಿಯಾ ಜರೆಮಿಯ ಜತೆಗಿದ್ದ ತನ್ನ ರೊಮ್ಯಾಂಟಿಕ್ ಸಂಬಂಧದ ಕುರಿತು ಕೊನೆಗೂ ಮೌನ ಮುರಿದಿದ್ದಾರೆ.
ಅನಿರುದ್ಧ್ ಅವರು ತಮಿಳು ಸಿನಿಮಾ ರಂಗದ ಮುಂಚೂಣಿ ಸಂಗೀತ ನಿರ್ದೇಶಕರಲ್ಲಿ ಒಬ್ಬರು. ಐಶ್ವರ್ಯಾ ರಜಿನಿಕಾಂತ್ ನಿರ್ದೇಶನದ ಹಾಗೂ ಧನುಷ್ ನಟನೆಯ 3 ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟರು. ಮೊದಲ ಚಿತ್ರದಲ್ಲೇ ಅನಿರುದ್ಧ್ ಮ್ಯೂಸಿಕ್ ಭಾರಿ ಸದ್ದು ಮಾಡಿತು. ಇದಾದ ಬಳಿಕ ಸಾಲು ಸಾಲು ಸಿನಿಮಾ ಆಫರ್ಗಳು ಬಂದವು. ವಿಜಯ್ ಹಾಗೂ ರಜಿನಿಕಾಂತ್ ಸೇರಿದಂತೆ ಸ್ಟಾರ್ ನಟರಿಗೆ ಮ್ಯೂಸಿಕ್ ಕಂಪೋಸ್ ಮಾಡಿದ್ದಾರೆ. ಅಲ್ಲದೆ, ಶಾರುಖ್ ಖಾನ್ ಅಭಿನಯದ ಜವಾನ್ ಸಿನಿಮಾಗೂ ಅನಿರುದ್ಧ್ ಮ್ಯೂಸಿಕ್ ನೀಡುವ ಮೂಲಕ ಬಾಲಿವುಡ್ಗೂ ಪದಾರ್ಪಣೆ ಮಾಡಿದ್ದಾರೆ.
ಸದ್ಯ ಅನಿರುದ್ಧ್ ಅವರು ಯಶಸ್ಸಿನ ಉತ್ತುಂಗದಲ್ಲಿದ್ದಾರೆ. ಇದರ ನಡುವೆ ನಟಿ ಆಂಡ್ರಿಯಾ ಜರೆಮಿಯ ಜತೆಗಿದ್ದ ಪ್ರೇಮ ಸಂಬಂಧದ ಬಗ್ಗೆ ಮಾತನಾಡಿದ್ದಾರೆ. ಇಬ್ಬರು ಲಿಪ್ಲಾಕ್ ಮಾಡಿರುವ ಫೋಟೋಗಳು ಸುಚಿ ಲೀಕ್ಸ್ನಿಂದ ಸೋರಿಕೆಯಾದ ಬಳಿಕ ಕಾಲಿವುಡ್ನಲ್ಲಿ ಇಬ್ಬರ ಪ್ರೇಮ ಪ್ರಕರಣ ಬಹಳಷ್ಟು ಸದ್ದು ಮಾಡಿತ್ತು.
ಇದೀಗ ಸಂದರ್ಶನವೊಂದರಲ್ಲಿ ಅನಿರುದ್ಧ ಮೌನ ಮುರಿದಿದ್ದಾರೆ. ನೀವು ಪ್ರೀತಿಸಿದ ನಟಿ ಯಾರು? ಅವರ ಹೆಸರು ಮತ್ತು ಪ್ರೇಮ ವೈಫಲ್ಯಕ್ಕೆ ಕಾರಣವನ್ನು ಏಕೆ ಬಹಿರಂಗಪಡಿಸಲಿಲ್ಲ ಎಂಬ ಪ್ರಶ್ನೆ ಎದ್ದಿದೆ ಎಂದು ಆ್ಯಂಕರ್, ಅನಿರುದ್ಧ್ಗೆ ಪ್ರಶ್ನೆ ಕೇಳಿದರು. ಇದಕ್ಕೆ ಉತ್ತರಿಸಿದ ಅನಿರುದ್ಧ್ ಗೆಳತಿಯ ಹೆಸರು ಆಂಡ್ರಿಯಾ ಎಂದರು.
ನನಗೆ 19 ವರ್ಷ ವಯಸ್ಸಾಗಿದ್ದಾಗ ಆಕೆಯ ಪ್ರೀತಿಯ ಬಲೆಯಲ್ಲಿ ಬಿದ್ದೆ. ಅದೇ ನನ್ನ ಮೊದಲ ಲವ್. ಆ ಸಮಯದಲ್ಲಿ ಆಂಡ್ರಿಯಾಗೆ 25 ವರ್ಷ ವಯಸ್ಸಾಗಿತ್ತು. ನಮ್ಮ ಪ್ರೇಮ ವೈಫಲ್ಯಕ್ಕೆ ಪ್ರಮುಖ ಕಾರಣವೇನೆಂದರೆ, ವಯಸ್ಸಿನ ಅಂತರ. ನನ್ನ ಮತ್ತು ಆಂಡ್ರಿಯಾ ನಡುವೆ 6 ವರ್ಷ ವಯಸ್ಸಿನ ವ್ಯತ್ಯಾಸವಿದೆ. ಆಂಡ್ರಿಯಾ ನನಗಿಂತ 6 ವರ್ಷ ದೊಡ್ಡವಳು. ಹೀಗಾಗಿ ನಾವಿಬ್ಬರು ಸಂಬಂಧವನ್ನು ಮುಂದುರಿಸಲು ಸಾಧ್ಯವಾಗಲಿಲ್ಲ. ಹೀಗಾಗಿ ನಾವಿಬ್ಬರು ಬೇರೆಯಾದೆವು ಎಂದು ಅನಿರುದ್ಧ್ ಹೇಳಿದ್ದಾರೆ.
ಸ್ಟಾರ್ ನಿರ್ದೇಶಕನ ಜತೆ ಆಂಡ್ರಿಯಾ ಸಂಬಂಧ
ನಟಿ ಆಂಡ್ರಿಯಾ ವಿವಾಹಿತ ನಿರ್ದೇಶಕನ ಜತೆ ವಿವಾಹೇತರ ಸಂಬಂಧ ಇಟ್ಟುಕೊಳ್ಳುವ ಮೂಲಕ ಹಿಂದೊಮ್ಮೆ ಬಹಳ ಸುದ್ದಿಯಾಗಿದ್ದರು. ಇದು ಅವರ ಜೀವನದ ಅತ್ಯಂತ ಕಹಿ ಕ್ಷಣಗಳೆಂದು ಆಂಡ್ರಿಯಾ ಹಿಂದೊಮ್ಮೆ ಟಿವಿ ಸಂದರ್ಶನದಲ್ಲಿ ಹೆಸರೇಳದೆ ಪರೋಕ್ಷವಾಗಿ ಹೇಳಿದ್ದರು. ಅಂದಹಾಗೆ ಆ ನಿರ್ದೇಶಕ ಬೇರೆ ಯಾರೂ ಅಲ್ಲ ತಮಿಳಿನ ಖ್ಯಾತ ನಿರ್ದೇಶಕ ಸೆಲ್ವರಾಘವನ್. 7ಜಿ ರೈನ್ಬೋ ಕಾಲನಿ, ಯಾರಡಿ ನೀ ಮೋಹಿನಿ, ಆಯಿರಥಿಲ್ ಒರುವನ್, ಎನ್ಜಿಕೆ ಮತ್ತು ನಾನೇ ವರುವನ್ ಸೇರಿದಂತೆ ಅನೇಕ ಹಿಟ್ ಸಿನಿಮಾಗಳನ್ನು ನೀಡಿದ್ದಾರೆ. ಅಲ್ಲದೆ, ವಿಜಯ್ ಅಭಿನಯದ ಬೀಸ್ಟ್ ಹಾಗೂ ವಿಶಾಲ್ ನಟನೆಯ ಮಾರ್ಕ್ ಆಂಟೋನಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ತಮ್ಮ ಪ್ರತಿಭೆಯಿಂದಲೇ ತಮಿಳು ಇಂಡಸ್ಟ್ರಿಯಲ್ಲಿ ಸೆಲ್ವರಾಘವನ್ ಹೆಸರು ಮಾಡಿದ್ದಾರೆ. 2006ರಲ್ಲಿ ನಟಿ ಸೋನಿಯಾ ಅಗರವಾಲ್ ಅವರನ್ನು ಮದುವೆಯಾಗಿದ್ದರು. ಆದರೆ, 2010ರಲ್ಲಿ ಇಬ್ಬರು ಡಿವೋರ್ಸ್ ಪಡೆದುಕೊಂಡರು. 2011ರಲ್ಲಿ ಗೀತಾಂಜಲಿ ಎಂಬುವರನ್ನು ಮದುವೆಯಾದರು.
ಸೆಲ್ವರಾಘವನ್ ನಿರ್ದೇಶನದ ಆಯಿರಥಿಲ್ ಒರುವನ್ ಚಿತ್ರದಲ್ಲಿ ಆಂಡ್ರಿಯಾ ಜೆರಮಿಯಾ ಸಹ ನಟಿಸಿದ್ದಾರೆ. ಸೆಲ್ವರಾಘವನ್ ಜತೆಗಿನ ಸಂಬಂಧದ ಬಗ್ಗೆ ಈ ಹಿಂದೆಯೇ ಸಾಕಷ್ಟು ಸುದ್ದಿಗಳು ಹರಿದಾಡಿದರೂ ಸಹ ಅದು ವದಂತಿಯಾಗಿಯೇ ಉಳಿದಿತ್ತು. ಆದರೆ, ಯಾವಾಗ ಆಂಡ್ರಿಯಾ ಅವರು “ಬ್ರೋಕನ್ ವಿಂಗ್ಸ್” ಹೆಸರಿನಲ್ಲಿ ಪುಸ್ತಕ ಬರೆದು, ಅದರಲ್ಲಿ ತಮ್ಮ ಸಂಬಂಧದ ಬಗ್ಗೆ ಮಾತನಾಡಿದರೋ ಆಗ ವದಂತಿಗಳೆಲ್ಲ ನಿಜವಾಯಿತು. ವಿವಾಹಿತ ವ್ಯಕ್ತಿಯ ಜತೆ ದೀರ್ಘಕಾಲದವರೆಗೆ ಅಫೇರ್ ಇಟ್ಟುಕೊಂಡಿದ್ದೆ. ಆತನಂದ್ರೆ ನನಗೆ ತುಂಬಾ ಇಷ್ಟ ಇತ್ತು. ಆದರೆ, ಆತ ನನಗೆ ದೈಹಿಕವಾಗಿ ಮತ್ತು ಮಾನಸಿಕವಾಗಿ ಹಿಂಸೆ ನೀಡಿದನು. ಇದು ನನ್ನನ್ನು ಖಿನ್ನತೆಗೆ ದೂಡಿತು. ಈ ಸಂಕಷ್ಟದಿಂದ ಹೊರಬರಲು ನಾನು ಆಯುರ್ವೇದ ಚಿಕಿತ್ಸೆಯನ್ನು ಪಡೆದುಕೊಳ್ಳಬೇಕಾಯಿತು ಎಂದು ಹಿಂದೊಮ್ಮೆ ಸಂದರ್ಶನದಲ್ಲಿ ಆಂಡ್ರಿಯಾ ಹೇಳಿಕೊಂಡಿದ್ದರು. ಇದು ಕಾಲಿವುಡ್ನಲ್ಲಿ ಭಾರಿ ಸಂಚಲನವನ್ನೇ ಸೃಷ್ಟಿ ಮಾಡಿತ್ತು.
ಆಂಡ್ರಿಯಾ ಜತೆಗಿನ ಅಫೇರ್ ಕಾರಣದಿಂದಲೇ ಸೋನಿಯಾ ಅಗರ್ವಾಲ್, ಸೆಲ್ವರಾಘವನ್ನಿಂದ ಡಿವೋರ್ಸ್ ಪಡೆದುಕೊಂಡರು ಎಂದು ಹೇಳಲಾಗಿದೆ. (ಏಜೆನ್ಸೀಸ್)
ಆ ರೀತಿಯ ಸಿನಿಮಾಗಳನ್ನು ನೋಡಲ್ಲ ಅವಕಾಶ ಸಿಕ್ಕರೆ ಬಿಡಲ್ಲ: ನಟಿ ಆಂಡ್ರಿಯಾ ಓಪನ್ ಟಾಕ್
ಸ್ಟಾರ್ ನಟಿಯ ಗಂಡನ ಜತೆ ಈ ಹೀರೋಯಿನ್ಗಿತ್ತು ಅಫೇರ್! ಇಬ್ಬರಿಗೂ ಕೈಕೊಟ್ಟು 3ನೇಯವಳ ಕೈಹಿಡಿದ ಸೆಲೆಬ್ರಿಟಿ