ಇನ್ನೊಂದೆಡೆ, ಶುದ್ಧ ವಾಯುವಿನ ಕೊರತೆ ಹಾಗೂ ಮಾಲಿನ್ಯದಿಂದಾಗಿ ಆರೋಗ್ಯ ಸಮಸ್ಯೆಗಳೂ ಅಧಿಕಗೊಂಡು, ವೆಚ್ಚವೂ ಏರಿದೆ. ಇದರಿಂದಾಗಿ ವಯಸ್ಕರು ಮಾತ್ರವಲ್ಲ, ಮಕ್ಕಳೂ ಅನಾರೋಗ್ಯ ಹೊಂದುವುದು ಮಾಮೂಲಾಗಿದೆ. ಬೆಂಗಳೂರನ್ನೇ ಪ್ರಾತಿನಿಧಿಕವಾಗಿ ತೆಗೆದುಕೊಂಡರೆ, ಸಮಸ್ಯೆಗಳ ಗಾತ್ರ ಅನಾವರಣವಾಗುತ್ತದೆ. ಜನರ ಸಂಖ್ಯೆಗಿಂತ ವಾಹನಗಳ ಸಂಖ್ಯೆ ಇಲ್ಲಿ ಹೆಚ್ಚಿಗೆಯಿದ್ದು, ಟ್ರಾಫಿಕ್ ಎಂದರೆ ಜನ ಭಯಪಡುವಂತಾಗಿದೆ. ನ್ಯೂಯಾರ್ಕ್ ನಗರವಂತೂ ಗಗನಚುಂಬಿ ಕಟ್ಟಡಗಳ ಭಾರಕ್ಕೆ ಕುಸಿಯುವ ಪ್ರಕ್ರಿಯೆಗೆ ಈಡಾಗಿದೆ ಎಂದು ಅಧ್ಯಯನ ವರದಿಗಳು ಬೊಟ್ಟುಮಾಡಿವೆ. ಇಂಥ ಪರಿಸ್ಥಿತಿಯಲ್ಲಿ ನಗರಗಳ ದಟ್ಟಣೆ ತಗ್ಗಿಸಿ, ಬೆಳವಣಿಗೆಯ ವಿಕೇಂದ್ರೀಕರಣವೇ ತಕ್ಕಮಟ್ಟಿನ ಪರಿಹಾರ ಮಾರ್ಗ. ಆದರೆ ನೂತನ ನಗರಗಳ ನಿರ್ಮಾಣ ಅಷ್ಟು ಸುಲಭವಲ್ಲ. ಇದು ಭಾರಿ ಹಣಕಾಸು ಅಪೇಕ್ಷಿಸಲಿದ್ದು, ಹೇಗೆ ಭರಿಸಲಾಗುತ್ತದೆ ಮತ್ತು ನೂತನ ನಗರಗಳ ಸ್ವರೂಪ ಹೇಗಿರುತ್ತದೆ ಎಂಬುದು ಇನ್ನಷ್ಟೇ ಗೊತ್ತಾಗಬೇಕಿದೆ.
