ದೊಡ್ಡ ಏರಿಕೆ ದಾಖಲಿಸಿದ ಷೇರುಪೇಟೆ: ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಶುಕ್ರವಾರ ಸಂಸತ್ತಿನಲ್ಲಿ ಮಂಡಿಸಿದ ಆರ್ಥಿಕ ಸಮೀಕ್ಷೆಯು ಬೆಳವಣಿಗೆಗೆ ಪೂರಕವಾದ ಬಜೆಟ್ನ ಮುನ್ಸೂಚನೆ ನೀಡಿದ್ದರಿಂದ ಭಾರತೀಯ ಷೇರುಪೇಟೆ ದೊಡ್ಡ ಪ್ರಮಾಣದ ಏರಿಕೆ ದಾಖಲಿಸಿತು. ಷೇರುಪೇಟೆ ಏರುತ್ತಿರುವುದು ಇದು ಸತತ ನಾಲ್ಕನೇ ದಿನ. ದಿನದ ಒಂದು ಹಂತದಲ್ಲಿ 846 ಅಂಕ ಏರಿಕೆಯಾಗಿ 77,605ಕ್ಕೆ ತಲುಪಿದ್ದ ಸೆನ್ಸೆಕ್ಸ್ ವಹಿವಾಟಿನ ಅಂತ್ಯದಲ್ಲಿ 740 ಅಂಕ ಏರಿಕೆಯಾಗಿ 77,500ಕ್ಕೆ ಸ್ಥಿರಗೊಂಡಿತು. ನಿಫ್ಟಿ 258 ಅಂಕ ಹೆಚ್ಚಳವಾಗಿ 23,508ಕ್ಕೆ ಸ್ಥಿರವಾಯಿತು. ಲಾರ್ಸೆನ್ ಆಂಡ್ ಟೂಬ್ರೊ ಡಿಸೆಂಬರ್ಗೆ ಅಂತ್ಯವಾದ ತ್ರೖೆಮಾಸಿಕ ಅವಧಿಯಲ್ಲಿ 3,359 ಕೋಟಿ ರೂ. ಲಾಭ ಗಳಿಸಿರುವುದನ್ನು ಪ್ರಕಟಿಸಿದ ಹಿನ್ನೆಲೆಯಲ್ಲಿ ಅದರ ಷೇರುಗಳಿಗೆ ಶುಕ್ರವಾರ ಭಾರಿ ಬೇಡಿಕೆ ಉಂಟಾಯಿತು. 688 ಕೋಟಿ ರೂ. ಲಾಭ ಪ್ರಕಟಿಸಿದ ನೆಸ್ಲೆಗೂ ಸಾಕಷ್ಟು ಬೇಡಿಕೆ ಕುದುರಿತು. ಇಂಡಸ್ಇಂಡ್ ಬ್ಯಾಂಕ್, ಟೈಟನ್, ಟಾಟಾ ಮೋಟರ್ಸ್, ಟಾಟಾ ಸ್ಟೀಲ್, ಐಟಿಸಿ, ಮಾರುತಿ ಷೇರುಗಳು ಲಾಭ ಮಾಡಿದವು. ಐಟಿಸಿ ಹೋಟೆಲ್ಸ್, ಭಾರ್ತಿ ಏರ್ಟೆಲ್, ಬಜಾಜ್ ಫಿನ್ಸರ್ವ್, ಬಜಾಜ್ ಫೈನಾನ್ಸ್, ಐಸಿಐಸಿಐ ಬ್ಯಾಂಕ್ ಷೇರುಗಳು ನಷ್ಟ ಅನುಭವಿಸಿದವು. ಜನವರಿ ತಿಂಗಳಲ್ಲಿ ಸೆನ್ಸೆಕ್ಸ್ ಒಟ್ಟಾರೆ 638 ಅಂಕ ಇಳಿಕೆಯಾಗಿದ್ದು, ನಿಫ್ಟಿ 136 ಅಂಕ ಕುಸಿದಿದೆ.
