ಘೊಷಿತ ಮುದುಡಿ ಗ್ರಾಮದ ಆಸುಪಾಸಿನ 40 ಚ.ಕಿ.ಮೀ. ವ್ಯಾಪ್ತಿಯ ಸಿದ್ದಾಪುರ, ಬಿಸಲೇಹಳ್ಳಿ, ಮುದುಡಿ ತಾಂಡ್ಯ, ಹಲಗೇನಹಳ್ಳಿ, ವೆಂಕಟಾಪುರ ಕಾವಲು, ಶಂಕರಪುರ, ಬೋರೆಹಳ್ಳಿ, ಪುಣ್ಯ ಕ್ಷೇತ್ರ ಗಂಗೆಮಡು ಸೇರಿ ಅಂದಾಜು 9500 ಎಕರೆಯಲ್ಲಿ ಬೃಹತ್ ಗಣಿಗಾರಿಕೆ ತಲೆ ಎತ್ತಲಿದೆ. ಇದರಿಂದ ಒಕ್ಕಲುತನವನ್ನೇ ನಂಬಿರುವ ಸಾವಿರಾರು ರೈತ ಕುಟುಂಬಗಳು ಅತಂತ್ರವಾಗಲಿವೆ. ರೈಲ್ವೆ ಮಾರ್ಗ, ಎತ್ತಿನಹೊಳೆ ನಾಲೆ ನಿರ್ಮಾಣ ಕಾಮಗಾರಿ, ಅನಿಲ ಪೂರೈಕೆ ಕೊಳವೆ ಮಾರ್ಗ, ಹೈಟೆನ್ಷನ್ ವಿದ್ಯುತ್ ಮಾರ್ಗ ಸೇರಿ ಹಲವು ಯೋಜನೆಗಳಿಗೆ ಈಗಾಗಲೆ ಸಾವಿರಾರು ಎಕರೆ ಕೃಷಿ ಭೂಮಿಯನ್ನು ವಶಕ್ಕೆ ಪಡೆಯಲಾಗಿದೆ. ನೈಸರ್ಗಿಕ ಸಂಪತ್ತಿನ ತಾಣವಾಗಿರುವ ಭೂ ಪ್ರದೇಶದಲ್ಲಿ ಚಿನ್ನದ ಅದಿರಿನ ಬೇಟೆಗೆ ಸರ್ಕಾರ ಮುಂದಾಗಿದ್ದು ಘೊಷಿತ ಮೀಸಲು ಪ್ರದೇಶದಲ್ಲಿ ಚಿನ್ನದ ಅದಿರಿನ ಗಣಿಗಾರಿಕೆ ಆರಂಭಗೊಂಡಲ್ಲಿ ಅಪಾರ ಸಸ್ಯ, ಪ್ರಾಣಿ, ಪಕ್ಷಿಗಳ ಸಂಕುಲಕ್ಕೆ ಧಕ್ಕೆ ಎದುರಾಗುವ ಅಪಾಯವಿದೆ. ಸಣ್ಣ ಪುಟ್ಟ ಕೆರೆಕಟ್ಟೆ, ಗುಡ್ಡ, ಕುರುಚಲು ಕಾಡಿನ ಜತೆಗೆ ಸಾವಿರಾರು ಎಕರೆ ಸಮೃದ್ಧ ಕೃಷಿ ಭೂಮಿ ಇತಿಹಾಸದ ಪುಟ ಸೇರುವುದರಲ್ಲಿ ಸಂದೇಹವಿಲ್ಲ ಎನ್ನಲಾಗುತ್ತಿದೆ.
