ಕಲಾವಿದರಿಗೆ ಅಗತ್ಯ ಸಾಮಾಜಿಕ ಮನ್ನಣೆ

ಖ್ಯಾತ ಕಲಾವಿದ ಕರಣ್​ ಆಚಾರ್ಯ ಅನಿಸಿಕೆ

'ಜ್ಞಾನಂ' ಫೆಸ್ಟ್​ ಸಮಾರೋಪ ಸಮಾರಂಭ

ಉಡುಪಿ: ನಿಮ್ಮೊಳಗಿನ ಪ್ರತಿಭೆಗಳಿಗೆ ನೀವೇ ಸ್ಫೂರ್ತಿಯಾಗಬೇಕು. ಅದರಿಂದ ಸಮಾಜ ಗುರುತಿಸುವಂಥ ಸಾಧನೆ ಮಾಡುವಂತಾಗಬೇಕು. ಕಲೆಯೊಂದಿಗಿನ ಬದುಕು ಇಂದಿನ ಯುಗದಲ್ಲಿ ಅನಿವಾರ್ಯ. ಕಲಾವಿದರಿಗೆ ಸಾಮಾಜಿಕ ಮನ್ನಣೆಯ ಅಗತ್ಯತೆಯಿದೆ. ಅದರಿಂದ ಅವರಿಗೆ ಖಂಡಿತ ಸ್ಫೂರ್ತಿ ನೀಡಬಲ್ಲದು ಎಂದು ಚಿತ್ರ ಕಲಾವಿದ, ಮಂಗಳೂರು ಪೆಡ್​' ಖ್ಯಾತಿಯ ಕರಣ್​ ಆಚಾರ್ಯ ಅನಿಸಿಕೆ ವ್ಯಕ್ತಪಡಿಸಿದರು.

ಉಡುಪಿಯ ಶ್ರೀ ಪೂರ್ಣಪ್ರಜ್ಞ ಸಂಧ್ಯಾ ಕಾಲೇಜ್​ನಲ್ಲಿ ಪದವಿ ಪೂರ್ವ ವಿದ್ಯಾರ್ಥಿಗಳಿಗಾಗಿ ಆಯೋಜಿಸಿದ್ದ ರಾಜ್ಯ ಮಟ್ಟದ "ಜ್ಞಾನಂ' ಸಾಂಸ್ಕೃತಿಕ ಹಾಗೂ ಆಡಳಿತಾತ್ಮಕ ಸ್ಪರ್ಧೆಗಳ ಫೆಸ್ಟ್ ಸಮಾರೋಪ ಸಮಾರಂಭದಲ್ಲಿ ವಿಜೇತರಿಗೆ ಬಹುಮಾನ ವಿತರಿಸಿ ಮಾತನಾಡಿದರು.

ಇಚ್ಛಾಶಕ್ತಿ ಅಗತ್ಯ

ಕಾಲೇಜ್​ನ ಆಡಳಿತ ಮಂಡಳಿಯ ಗೌರವ ಸದಸ್ಯ ಪ್ರೊ.ರತ್ನಕುಮಾರ್​ ಮಾತನಾಡಿ, ಕಾಲೇಜ್​ನ ಸ್ಥಾಪಕರಾದ ವಿಬುಧೇಶ ತೀರ್ಥ ಶ್ರೀಪಾದರ ಸದೃಢ ಸಂಕಲ್ಪದಿಂದ ಇಂದು ವಜ್ರ ಮಹೋತ್ಸವದ ಸಂಭ್ರಮದಲ್ಲಿದ್ದೇವೆ. ಶ್ರೀಗಳ ಶೈಕ್ಷಣಿಕ ಕ್ಷೇತ್ರದ ಎಲ್ಲ ಸಂಕಲ್ಪವೂ ಸಾಕಾರಗೊಳ್ಳುವಲ್ಲಿ ನಿಮ್ಮ ಇಚ್ಛಾಶಕ್ತಿಯೇ ಮೂಲವಾಗಲಿ. ಭವಿಷ್ಯದ ಭವ್ಯ ಭಾರತದ ನಿರ್ಮಾಣದಲ್ಲಿ ತೊಡಗಿಸಿಕೊಳ್ಳಿ ಎಂದರು.

ಸಂಸ್ಥೆಯ ಗೌರವ ಕಾರ್ಯದರ್ಶಿ ಸಿಎ ಟಿ.ಪ್ರಶಾಂತ್​ ಹೊಳ್ಳ ಶುಭ ಹಾರೈಸಿದರು.

ಆತಿಥೇಯ ಕಾಲೇಜ್​ ಪ್ರಥಮ

ಜ್ಞಾನಂ ಫೆಸ್ಟ್​ನಲ್ಲಿ ಸಮಗ್ರ ಪ್ರಶಸ್ತಿ ವಿಜೇತರಾದ ಉಡುಪಿಯ ಪೂರ್ಣಪ್ರಜ್ಞ ಪದವಿ ಪೂರ್ವ ಕಾಲೇಜ್​ ಪ್ರಥಮ, ಉಡುಪಿಯ ಎಂಜಿಎಂ ಕಾಲೇಜ್​ ದ್ವಿತೀಯ ಸ್ಥಾನ ಗಳಿಸಿದ್ದು, ವಿಜೇತ ತಂಡಗಳಿಗೆ ಬಹುಮಾನ ವಿತರಿಸಲಾಯಿತು.

ಪ್ರಾಂಶುಪಾಲ ಡಾ. ಚಂದ್ರಕಾಂತ್​ ಭಟ್​ ಅಧ್ಯಕ್ಷತೆ ವಹಿಸಿದ್ದರು. ಐಕ್ಯೂಎಸಿ ಘಟಕದ ಸಂಯೋಜಕ ಡಾ. ರಾಘವೇಂದ್ರ ಎಲ್​., ಜ್ಞಾನಂ ಫೆಸ್ಟ್​ನ ಸಂಯೋಜಕಿ ಲವಿಟಾ ಡಿಸೋಜ, ವಿದ್ಯಾರ್ಥಿ ಕ್ಷೇಮಪಾಲನಾಧಿಕಾರಿಗಳಾದ ವಿನಾಯಕ ಪೈ ಬಿ. ಮತ್ತು ಡಾ. ಪ್ರಜ್ಞಾ ಮಾರ್ಪಳ್ಳಿ, ವಿದ್ಯಾರ್ಥಿ ಸಂಘದ ನಾಯಕ ವಿಶ್ವಾಸ್​ ಕರ್ವಾಲೋ ಉಪಸ್ಥಿತರಿದ್ದರು.

ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ಪ್ರೀತಮ್​ ಶೆಟ್ಟಿ ಸ್ವಾಗತಿಸಿದರು. ಶೋಭಿತಾ ಹೆಗಡೆ ವಂದಿಸಿದರು. ವಿದ್ಯಾರ್ಥಿ ಶರತ್​ ಕಾರ್ಯಕ್ರಮ ನಿರೂಪಿಸಿದರು.