ಒಕ್ಕಲಿಗರ ಸಂಘದ ಆಡಳಿತ ಮಂಡಳಿಗೆ ಅವಿರೋಧ ಆಯ್ಕೆ?

ಆಯ್ಕೆಗೆ ಅರ್ಜಿ ಸಲ್ಲಿಸಿದ್ದ ಎಲ್ಲರೂ ಹಿರಿಯ ಶಾಸಕ ಎಸ್​.ಆರ್​.ಶ್ರೀನಿವಾಸ್​ ನೇತೃತ್ವದಲ್ಲಿ ಭಾನುವಾರ ತುಮಕೂರಿನಲ್ಲಿ ನಡೆದ ಸಮುದಾಯ ಮುಖಂಡರ ಸಂಧಾನ ಸಭೆಯಲ್ಲಿ ನಿರ್ದೇಶಕರ ಅವಿರೋಧ ಒಪ್ಪಿಗೆ ನೀಡಿದ್ದು ಸೋಮವಾರ ನಾಮಪತ್ರ ವಾಪಸ್​ ಪಡೆಯಲು ಒಪ್ಪಿಗೆ ಸೂಚಿಸಿದ್ದು ಕಣದಲ್ಲಿರುವ ಆಯ್ಕೆಯೆ ಹೊಣೆಯನ್ನು ಹಿರಿಯ ಮುಖಂಡರಿಗೆ ಬಿಡಲಾಗಿದೆ.

ಜಿಲ್ಲೆಯಲ್ಲಿ ಪ್ರತಿಷ್ಠಿತ ಎನ್ನಿಸಿರುವ ಒಕ್ಕಲಿಗರ ಸಂಘದ ಆಡಳಿತ ಮಂಡಳಿಗೆ ಕಳೆದ ಮೂರು ವರ್ಷದಿಂದ ತುಮಕೂರು ಉಪವಿಭಾಗಾಧಿಕಾರಿ ಆಡಳಿತಾಧಿಕಾರಿಯಾಗಿದ್ದರು. ಸದಸ್ಯತ್ವದ ಗೊಂದಲ ನ್ಯಾಯಾಲಯದಲ್ಲಿ ಭಗೆಹರಿದು ಮೂರು ವರ್ಷದ ನಂತರ ನಡೆಯುತ್ತಿರುವ ಚುನಾವಣೆಯಲ್ಲಿ ಅವಿರೋಧ ಆಯ್ಕೆ ಸಾಧ್ಯವಾಗದಿದ್ದರೆ ಜೂ.30ರಂದು ಗುಬ್ಬಿ, ತುಮಕೂರು ಹಾಗೂ ಶಿರಾ ತಾಲೂಕಿಗೆ ಮಾತ್ರ ಚುನಾವಣೆ ನಡೆಯಲಿದೆ.

ಜಿಲ್ಲಾ ಒಕ್ಕಲಿಗರ ಸಂಘದ ಆಡಳಿತ ಮಂಡಳಿ ಚುನಾವಣೆಗೆ ಕರಡು ಅರ್ಹ ಮತದಾರರ ಪಟ್ಟಿ ಪ್ರಕಟಿಸುವ ಬಗ್ಗೆ ಉಚ್ಛ ನ್ಯಾಯಾಲಯ ಜಿಲ್ಲಾ ಒಕ್ಕಲಿಗರ ಸಂಘದ ಆಡಳಿತಾಧಿಕಾರಿಯಾಗಿರುವ ತುಮಕೂರು ಉಪವಿಭಾಗಾರಿಕಾರಿಗೆ ಆದೇಶ ನೀಡಿದ್ದು ಕೋರ್ಟ್​ ಸೂಚನೆಯಂತೆ 121 ಸದಸ್ಯರಿಗೆ ಮಾತ್ರ ಮತದಾನದ ಹಕ್ಕು ನೀಡಲಾಗಿದೆ. ಸದಸ್ಯತ್ವ ಶುಲ್ಕ ಪಾವತಿಸಿದ ದಾಖಲೆಗಳನ್ನು ಕೋರ್ಟ್​ಗೆ ಸಲ್ಲಿಸಲು ವಿಲರಾದ ಹಿನ್ನೆಲೆಯಲ್ಲಿ 400 ಸದಸ್ಯರು ಮತದಾನದಿಂದ ವಂಚಿತರಾಗಿದ್ದಾರೆ.

ತುಮಕೂರು ಜಿಲ್ಲಾ ಒಕ್ಕಲಿಗರ ಸಂಘದ ಪ್ರಕರಣಗಳಲ್ಲಿ -2025ರ ಡಿಸೆಂಬರ್​ನಲ್ಲಿ ಕರ್ನಾಟಕ ಉಚ್ಚನ್ಯಾಯಾಲಯ ನೀಡಿರುವ ತೀರ್ಪಿನಲ್ಲಿ ಅನುಬಂಧ-&ಇ ರಲ್ಲಿರುವ ಆಡಳಿತಾಧಿಕಾರಿ ಸಿದ್ಧಪಡಿಸಿರುವ ಕರಡು ಮತದಾರರ ಪಟ್ಟಿ ವಜಾ ಮಾಡಿ ಆದೇಶಿಸಿತ್ತು. ಜತೆಗೆ ಆಡಳಿತಾಧಿಕಾರಿ ನೇಮಕದ ಪೂರ್ವದಲ್ಲಿಯೇ ಇದ್ದ ಅರ್ಹ ಮತದಾರರ ಪಟ್ಟಿ ಸಿದ್ಧಪಡಿಸಿ ಆಡಳಿತ ಮಂಡಳಿ ಚುನಾವಣೆ ನಡೆಸುವಂತೆ ನಿರ್ದೇಶನ ನೀಡಿತ್ತು.

ತುಮಕೂರು ನಗರದ ಹೃದಯಭಾಗದಲ್ಲಿ ಬೆಲೆಬಾಳುವ ಆಸ್ತಿ ಕೂಡ ಹೊಂದಿರುವ, ಆರ್ಥಿಕವಾಗಿ ಸದೃಢವಾಗಿರುವ ಒಕ್ಕಲಿಗರ ಸಂಕ್ಕೆ 2022ರಿಂದಲೂ ಆಡಳಿತಾಧಿಕಾರಿ ನೇಮಕ ಮಾಡಲಾಗಿದೆ. ಆಡಳಿತಾಧಿಕಾರಿ ನೇಮಕದ ಪೂರ್ವದಲ್ಲಿ ಸದಸ್ಯತ್ವ ಹೊಂದಿರುವವರು ಮಾತ್ರ ಮತದಾರರ ಪಟ್ಟಿ ತಯಾರಿಸಿದ್ದರಿಂದ 121 ಸದಸ್ಯರಿಗೆ ಮತದಾನದ ಹಕ್ಕು ಲಭಿಸಿದೆ.

2017 ಹಾಗೂ 2021ರಲ್ಲಿ ಸಂಘದ ಕಾರ್ಯದರ್ಶಿ ಜಿಲ್ಲಾ ಸಂಘಗಳ ನೋಂದಣಾಧಿಕಾರಿಗೆ ಸಂಘದ ವಾರ್ಷಿಕ ಲೆಕ್ಕಪತ್ರಗಳು ಮತ್ತು ಕಾರ್ಯಕಾರಿ ಸಮಿತಿ ಪಟ್ಟಿಯೊಂದಿಗೆ ಸಲ್ಲಿಸಿರುವ ಮೇಲ್ಕಂಡ ಸಂಘದ 121 ಜನ ಸದಸ್ಯರ ಪಟ್ಟಿ ಸಲ್ಲಿಸಿದ್ದು ಈ 121 ಜನ ಸದಸ್ಯರ ಪಟ್ಟಿಯನ್ನು ಯಾವುದೇ ನ್ಯಾಯಾಲಯದಲ್ಲಿ ಪ್ರಶ್ನಿಸಿಲ್ಲ ಆದ್ದರಿಂದ 121 ಸದಸ್ಯರು ಮಾತ್ರ ಮತದಾನದ ಜತೆಗೆ ಚುನಾವಣೆಗೆ ಸ್ಫರ್ಧಿಸಲು ಅರ್ಹತೆ ಪಡೆದಿದ್ದರು.

ಜಿಲ್ಲಾ ಒಕ್ಕಲಿಗರ ಸಂದಲ್ಲಿ ಪ್ರಸ್ತುತ ಮತದಾನಕ್ಕೆ ಅರ್ಹತೆ ಪಡೆದಿರುವ 121 ಸದಸ್ಯ ಸಂಖ್ಯೆಗೆ ಅನುಗುಣವಾಗಿ 16 ನಿರ್ದೇಶಕ ಸ್ಥಾನಗಳಿಗೆ ಚುನಾವಣೆ ಘೋಷಣೆಯಾಗಿದ್ದು ಜೂ.30ರಂದು ಮತದಾನ ನಡೆಯಬೇಕಿದೆ. ತುಮಕೂರು ಗ್ರಾಮಾಂತರ 4, ತುಮಕೂರು ನಗರ 2,

ಕುಣಿಗಲ್​ 3, ತುರುವೇಕೆರೆ 3, ಗುಬ್ಬಿ 2, ತಿಪಟೂರು 1, ಶಿರಾ 1 ಸೇರಿ ಒಟ್ಟು 16 ಸ್ಥಾನಗಳಿಗೆ ಚುನಾವಣೆ ನಡೆಯಲಿದ್ದು ಗುಬ್ಬಿ, ತುಮಕೂರು ನಗರ ಹಾಗೂ ಗ್ರಾಮಾಂತರ, ಶಿರಾ ತಾಲೂಕು ಹೊರತುಪಡಿಸಿ ಉಳಿದೆಲ್ಲಾ ತಾಲೂಕುಗಳಲ್ಲಿಯೂ ನಿಗಧಿತ ಸ್ಥಾನಗಳಿಗಷ್ಟೇ ನಾಮಪತ್ರ ಸಲ್ಲಿಕೆಯಾಗಿರುವ ಹಿನ್ನೆಲೆಯಲ್ಲಿ ಅವಿರೋಧ ಆಯ್ಕೆಯ ಘೋಷಣೆಯಷ್ಟೇ ಬಾಕಿ ಇದೆ. ಸಂದಲ್ಲಿ ಅರ್ಹ ಸದಸ್ಯತ್ವ ಹೊಂದಿಲ್ಲದ ಚಿ.ನಾ.ಹಳ್ಳಿ, ಮಧುಗಿರಿ, ಕೊರಟಗೆರೆ ಹಾಗೂ ಪಾವಗಡ ತಾಲೂಕುಗಳಲ್ಲಿ ನಿರ್ದೇಶಕ ಸ್ಥಾನ ನೀಡಲಾಗಿಲ್ಲ.