ರಸ್ತೆ ತಡೆಗೋಡೆಗೆ ಆಟೋ ಡಿಕ್ಕಿ, ದಂಪತಿ ಸಾವು

ರಾಯಚೂರು ಜಿಲ್ಲೆ ಲಿಂಗಸೂರು ಮೂಲದ ದ್ಯಾವಪ್ಪ (65), ದುರ್ಗವ್ವ (60) ಮೃತ ದುರ್ದೈವಿಗಳು. ಆಟೋ ಚಾಲಕ ವೆಂಕಟೇಶ್​ (38), ಶಾಂತಮ್ಮ (38) ಹಾಗೂ ಅವರ ಮಕ್ಕಳಾದ ಅಂಬಿಕಾ (7), ಮಂಜುನಾಥ್​ (13) ಸಂಬಂಧಿಕರ ಪುತ್ರ ದೇವೇಗೌಡ (11) ಗಾಯಗೊಂಡಿದ್ದಾರೆ. ಗಾಯಾಳುಗಳನ್ನು ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದು ಚೇತರಿಸಿಕೊಂಡಿದ್ದಾರೆ.

ಜಾತ್ರೆಗೆ ತೆರಳಿದ್ದ ಕುಟುಂಬ: ಬೆಂಗಳೂರಿನಲ್ಲಿ ಕೂಲಿ ಕೆಲಸ ಮಾಡುತ್ತಿದ್ದ ದ್ಯಾವಪ್ಪ ಕುಟುಂಬ ಹುಟ್ಟೂರಿಗೆ ಜಾತ್ರೆಗೆ ತೆರಳಿತ್ತು. ಜಾತ್ರೆ ಮುಗಿಸಿಕೊಂಡು ಗುರುವಾರ ಹಿಂದಿರುಗುತ್ತಿದ್ದ ಸಂದರ್ಭದಲ್ಲಿ ಊರುಕೆರೆ ಬಳಿ ಚಾಲಕನ ನಿಯಂತ್ರಣ ತಪ್ಪಿದ ಆಟೋರಿಕ್ಷಾ ರಸ್ತೆಬದಿಯ ತಡೆಗೋಡೆಗೆ ಗುದ್ದಿದ್ದು ಈ ಅವಘಡ ಸಂಭವಿಸಿದೆ.

ದಂಪತಿ ಮೃತದೇಹವನ್ನು ಶುಕ್ರವಾರ ಮರಣೋತ್ತರ ಪರೀಕ್ಷೆ ಬಳಿಕ ಕುಟುಂಬದವರಿಗೆ ಹಸ್ತಾಂತರಿಸಲಾಯಿತು. ತುಮಕೂರು ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.