ಲೋಕಾ ಬಲೆಗೆ ಸಬ್​ಇನ್ಸ್​ಪೆಕ್ಟರ್​

ತುಮಕೂರು: ಕಾರನ್ನು ಮಾಲೀಕರಿಗೆ ಹಿಂದಿರುಗಿಸಲು 40 ಸಾವಿರ ರೂಪಾಯಿ ಲಂಚ ಪಡೆಯತ್ತಿದ್ದಾಗ ಗ್ರಾಮಾಂತರ ಠಾಣೆ ಸಬ್​ಇನ್ಸ್​ಪೆಕ್ಟರ್​ ಎಸ್​.ಎಸ್​.ಚೇತನ್​ ಕುಮಾರ್​ ಲೋಕಾಯುಕ್ತ ಬಲೆಗೆ ಬಿದ್ದಿದ್ದಾರೆ. 7ನೇ ಅಪರ ಜಿಲಾ ್ಲ ಮತ್ತು ಸತ್ರ ನ್ಯಾಯಾಲಯವು ಆರೋಪಿ ಚೇತನ್​ ಕುಮಾರ್​ರನ್ನು ಶನಿವಾರ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಪೊಲೀಸ್​ ಠಾಣೆ ವಶದಲ್ಲಿದ್ದ ಕಾರನ್ನು ನೀಡಲು ಠಾಣಾಧಿಕಾರಿ ಚೇತನ್​ ಕುಮಾರ್​ ಬೆಂಗಳೂರು ಮೂಲದ ಎಸ್​,ಕೆ.ನಾಗೇಶ್​ ಎಂಬುವರ ಬಳಿ 40 ಸಾವಿರ ರೂಪಾಯಿ ಲಂಚಕ್ಕೆ ಬೇಡಿಕೆಇಟ್ಟಿದ್ದರು. ಶುಕ್ರವಾರ ತಡರಾತ್ರಿ ಕ್ಯಾತಸಂದ್ರ ಜಾಸ್​ ಟೋಲ್​ ಬಳಿಯ "ನಮಸ್ತೆ ತುಮಕೂರು' ಹೋಟೆಲ್​ ಕ್ಯಾಷಿಯರ್​ ಮೂಲಕ ಹಣಪಡೆದಿದ್ದು ಆತನನ್ನು ಲಂಚದ ಸಮೇತ ಬಂಧಿಸಿದ ಲೋಕಾ ಪೊಲೀಸರು ಆತನ ಹೇಳಿಕೆ ಆಧರಿಸಿ ತಡರಾತ್ರಿ 2 ಗಂಟೆಗೆ ಸಬ್​ಇನ್ಸ್​ಪೆಕ್ಟರ್​ರನ್ನು ವಶಕ್ಕೆ ಪಡೆದಿದ್ದಾರೆ.

ಪ್ರಕರಣ ಹಿನ್ನೆಲೆ: ಜ.17ರಂದು ವಾರಾಂತ್ಯದಲ್ಲಿ ಬೆಂಗಳೂರಿನಿಂದ ಸ್ನೇಹಿತರೊಂದಿಗೆ ತುಮಕೂರು ಕಡೆಗೆ ಕಾರಿನಲ್ಲಿ ಬಂದಿದ್ದ ನಾಗೇಶ್​ ಕ್ಯಾತಸಂದ್ರದ ಕೆಸರಮಡು ದರ್ಗಾ ಸರ್ಕಲ್​ನಲ್ಲಿ ಚಹಾ ಸೇವಿಸುತ್ತಿದ್ದ ವೇಳೆ ಚೇತನ್​ ಕುಮಾರ್​ ರಸ್ತೆ ಬದಿ ನಿಲ್ಲಿಸಿದ್ದ ಕಾರನ್ನು ಟೋ ಮಾಡಿಕೊಂಡು ತುಮಕೂರು ಗ್ರಾಮಾಂತರ ಠಾಣೆ ಆವರಣದಲ್ಲಿ ತಂದು ನಿಲ್ಲಿಸಿಕೊಂಡಿದ್ದರು. ಕಾರನ್ನು ಬಿಡುವಂತೆ ಕೇಳಿದಾಗ ಗಾಂಜಾ ಸೇವಿಸಿದ್ದೀರೆಂದು ಪ್ರಕರಣ ದಾಖಲಿಸುವುದಾಗಿ ಬೆದರಿಸಿ 5 ಲಕ್ಷ ರೂ,, ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು.

ಕೊನೆಗೆ ಅಷ್ಟೊಂದು ಹಣ ಕೊಡಲು ಸಾಧ್ಯವಿಲ್ಲವೆಂದು ನಾಗೇಶ್​ ಮನವಿ ಮಾಡಿಕೊಂಡ ನಂತರ ಗುರುವಾರ (ಜ.29)ದಂದು 40 ಸಾವಿರ ಕೊಟ್ಟು ಕಾರು ತೆಗೆದುಕೊಂಡು ಹೋಗುವಂತೆ ತಿಳಿಸಿದ್ದರು. ನಂತರ ಜ.30 ರಂದು ನಾಗೇಶ್​ ಲೋಕಾಯುಕ್ತ ಪೊಲೀಸ್​ ಠಾಣೆಗೆ ತೆರಳಿ ಪೊಲೀಸ್​ ಅಧೀಕ್ಷಕ ಎ.ವಿ.ಲಕ್ಷಿ$್ಮನಾರಾಯಣ್​ ಅವರಿಗೆ ದೂರು ಕೊಟ್ಟಿದ್ದಾರೆ. ಈ ಸಂಬಂಧ ಭ್ರಷ್ಟಾಚಾರ ಪ್ರತಿಬಂಧ ಕಾಯ್ದೆ -1988 (ತಿದ್ದುಪಡಿ-2018)ರಂತೆ ದೂರು ದಾಖಲಿಸಿಕೊಳ್ಳಲಾಗಿತ್ತು.

ಶುಕ್ರವಾರ ಸಂಜೆಯೇ ಲೋಕಾ ಪೊಲೀಸರು ಖೆಡ್ಡಾ ತೋಡಿದ್ದು ತಡರಾತ್ರಿ ಹೊತ್ತಿಗೆ ಆರೋಪಿಯನ್ನು ವಶಕ್ಕೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಶನಿವಾರ 7ನೇ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ಮುಂದೆ ಚೇತನ್​ ಕುಮಾರ್​ರನ್ನು ಹಾಜರುಪಡಿಸಿದ್ದು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಲೋಕಾ ಡಿವೈಎಸ್ಪಿಗಳಾದ ಎಂ.ಮಂಜುನಾಥ್​, ಡಾ.ಸಂತೋಷ್​ ನೇತೃತ್ವದಲ್ಲಿ ಪೊಲೀಸ್​ ನಿರೀಕ್ಷಕರುಗಳಾದ ಕೆ.ಸುರೇಶ್​, ಬಿ.ಮೊಹಮ್ಮದ್​ ಸಲೀಂ, ಟಿ.ರಾಜು ಹಾಗೂ ಸಿಬ್ಬಂದಿ ಯಶಸ್ವಿ ಕಾರ್ಯಾಚರಣೆ ನಡೆಸಿದ್ದರು.