ಸಮ ಸಮಾಜದ ಕನಸು ಕಂಡಿದ್ದ ಅರಸು

ವಿವಿ ಸರ್​ ಎಂ.ವಿಶ್ವೇಶ್ವರಯ್ಯ ಸಭಾಂಗಣದಲ್ಲಿ ತುಮಕೂರು ವಿಶ್ವವಿದ್ಯಾಲಯದ ಶ್ರೀ ಡಿ. ದೇವರಾಜ ಅರಸು ಅಧ್ಯಯನ ಪೀಠದ ವತಿಯಿಂದ ಬುಧವಾರ ಆಯೋಜಿಸಿದ್ದ ಜನಮುಖಿ ಅರಸು ಕೃತಿಯ ಲೋಕಾರ್ಪಣೆ ಹಾಗೂ ಶ್ರೀ ಡಿ. ದೇವರಾಜ ಅರಸು: ಸಮ ಸಮಾಜದ ಕನಸುಗಾರ ವಿಷಯದ ಕುರಿತ ರಾಜ್ಯಮಟ್ಟದ ವಿಚಾರ ಸಂಕಿರಣವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಜಮೀನ್ದಾರರ ಮುಂದೆ ಬೆನ್ನುಮೂಳೆ ಬಗ್ಗಿಸಿ ನಿಲ್ಲುತ್ತಿದ್ದ ಗೇಣಿದಾರರನ್ನು ತಲೆ ಎತ್ತಿ ಹೆಮ್ಮೆಯಿಂದ ಬದುಕುವಂತೆ ಮಾಡಿದ ಮಹಾನುಭಾವರು ಅರಸು ಎಂದು ಬಣ್ಣಿಸಿದರು.

ಭೂ ಸುಧಾರಣೆ ಕಾಯ್ದೆ ಸೇರಿದಂತೆ ಜನಪರ ಯೋಜನೆಗಳನ್ನು ಜಾರಿಗೊಳಿಸಿದ್ದನ್ನು ಸಹಿಸಲಾರದವರು ಹೊಟ್ಟೆಯುರಿಯಿಂದ ದೇವರಾಜ ಅರಸು ಮೇಲೆ ಭ್ರಷ್ಟಾಚಾರದಂತಹ ಸುಳ್ಳು ಅಪವಾದಗಳನ್ನು ಹೊರಿಸಲಾಯಿತು. ದಿವಂಗತ ದೇವರಾಜ ಅರಸು ಬರುವುದಕ್ಕೂ ಮೊದಲ ಭ್ರಷ್ಟಾಚಾರವೇ ಇರಲಿಲ್ಲವೇ? ಎಲ್ಲರೂ ಸತ್ಯಹರಿಶ್ಚಂದ್ರರೇ ಇದ್ದರೇ?. ಭ್ರಷ್ಟಾಚಾರದ ಆರೋಪ ಅರಸು ಒಬ್ಬರ ಮೇಲೆ ಯಾಕೆ ಬರುತ್ತದೆ. ಅವರಿಗಿಂತ ಹಿಂದೆ ಇದ್ದವರ ಮೇಲೆ ಯಾಕೆ ಬರೋದಿಲ್ಲ ಎಂಬುದನ್ನು ನಾವು ಅರ್ಥ ಮಾಡಿಕೊಳ್ಳಬೇಕಾಗಿದೆ. ಅರಸು ಅವರು ಜಾರಿಗೊಳಿಸಿದ ಕಾರ್ಯಕ್ರಮಗಳೇ ಇದಕ್ಕೆ ಕಾರಣ.ನಮ್ಮ ಪರಂಪರೆಯಲ್ಲಿ ಬದುಕಿದ್ದಾಗ ಗೌರವ ಕೊಡುವುದಕ್ಕಿಂತ, ಸತ್ತಾಗ ಗೌರವಿಸುವುದು ಹೆಚ್ಚು. ಇದಕ್ಕೆ ವೈದಿಕ ಪರಂಪರೆಯೇ ಕಾರಣ ಎಂದು ಹೇಳಿದರು.

ದೇವರಾಜ ಅರಸು ಸಣ್ಣ ಸಣ್ಣ ಸಮುದಾಯದವರನ್ನು ಗುರುತಿಸಿ ವಿಧಾನಸಭೆ ಆಯ್ಕೆ ಆಗುವಂತೆ ಮಾಡಿದರು. ವೀರಪ್ಪ ಮೊಯ್ಲಿ ಅವರದ್ದು ಸಣ್ಣ ಸಮಾಜ. ಕಾರ್ಕಳದಲ್ಲಿ ಅವರ ಜನಸಂಖ್ಯೆ ನೂರಕ್ಕೂ ಮೀರುವುದಿಲ್ಲ. ಅವರಿಗೆ ವಿಧಾನಸಭೆ ಕನಸು ಕಾಣಲೂ ಸಾಧ್ಯವಿರಲಿಲ್ಲ. ಆದರೂ ಕಾರ್ಕಳದಿಂದ ಶಾಸನಸಭೆ ಪ್ರವೇಶಿಸುತ್ತಾರೆ. ಅದಕ್ಕೆ ಕಾರಣ ಡಾ.ಬಿ.ಆರ್​. ಅಂಬೇಡ್ಕರ್​ ಅವರು ಕೊಟ್ಟ ಸಂವಿಧಾನ. ಅದನ್ನು ಕಾರ್ಯಗತಗೊಳಿಸಿದವರು ಅರಸು ಎಂದರು.

ಗೋಪಾಲಕೃಷ್ಣ ಗೌಡರ ಹಾಗೂ ಎಸ್​. ನಿಜಲಿಂಗಪ್ಪನವರ ಕಾಲದ ಪ್ರಜಾಪ್ರಭುತ್ವಕ್ಕೂ ಇಂದಿನ ರಾಜಕಾರಣಿಗಳ ಆಟಕ್ಕೂ ಅಜಗಜಾಂತರ ವ್ಯತ್ಯಾಸವಿದೆ. ಅಂದು ವಿರೋಧ ಪಕ್ಷಗಳು ಸರ್ಕಾರಕ್ಕೆ ಚಾಟಿ ಬೀಸಿ ತಪು$್ಪಗಳನ್ನು ತಿದ್ದುತ್ತಿದ್ದವು. ಆದರೆ, ರಾಜಕಾರಣ ಬದಲಾಗಿದೆ. ರಾಜಕೀಯ ಪಕ್ಷಗಳ ನಾಯಕರೆಲ್ಲರೂ ಒಳಗೆ ಅನ್ಯೋನ್ಯತೆಯಿಂದ ಇದ್ದು ಹೊರಗೆ ಕೇವಲ ರಾಜಕೀಯ ಬದ್ಧವೈರಿಗಳಂತೆ ನಟಿಸುತ್ತಿದ್ದಾರೆ. ಉಳ್ಳವರ ಮನೆಗೆ ಹೋಗಿ ಬರುವಾಗ ಅವರ ಮನೆಯ ಧೂಳು ಕೂಡ ನಮ್ಮ ಅಂಗಾಲಿಗೆ ಅಂಟಿಕೊಳ್ಳಬಾರದೆಂಬ ಎಚ್ಚರ ಇರಬೇಕೆಂದು ನಂಬಿದ್ದವರು ಅರಸು ಎಂದು ತಿಳಿಸಿದರು.

ತುಮಕೂರು ವಿವಿ ಕುಲಪತಿ ಪ್ರೊ. ಎಂ. ವೆಂಕಟೇಶ್ವರಲು ಮಾತನಾಡಿ, ಯುವ ಜನಾಂಗ ಮತ್ತು ವಿದ್ಯಾರ್ಥಿಗಳು ತಮ್ಮಲ್ಲಿ ಅತ್ಯುತ್ತಮ ನಾಯಕತ್ವ ಗುಣಗಳನ್ನು ಬೆಳೆಸಿಕೊಳ್ಳಬೇಕು. ನಿಮ್ಮ ಸಾಧನೆ ಕೇವಲ ಸ್ಥಳಿಯ ಮಟ್ಟಕ್ಕೆ ಸೀಮಿತವಾಗದೆ, ದೇಶದ ಮೂಲೆ ಮೂಲೆಯಲ್ಲೂ ನಿಮ್ಮ ಹೆಸರು ಧ್ವನಿಸುವಂತಾಗಬೇಕು. ಹುಟ್ಟು ಮತ್ತು ಸಾವಿನ ನಡುವಿನ ಅವಧಿಯಲ್ಲಿ ನಮ್ಮ ಜೀವನದ ನಿಜವಾದ ಮೌಲ್ಯವನ್ನು ನಾವು ಅರಿತುಕೊಳ್ಳಬೇಕು. ಪ್ರತಿಯೊಬ್ಬರ ಜೀವನಕ್ಕೂ ಪ್ರಾಮಾಣಿಕತೆ ಎಂಬುದು ಅಗತ್ಯ ಎಂದರು.

ಪರೀಕ್ಷಾಂಗ ಕುಲಸಚಿವರಾದ ಪ್ರೊ. ಹೆಚ್​. ಎಸ್​. ಮೋಹನ ಅವರು ಜನಮುಖಿ ಅರಸು ಕೃತಿಯ ಪರಿಚಯ ಮಾಡಿದರು. ಡಿ. ದೇವರಾಜ ಅರಸು ಅಧ್ಯಯನ ಪೀಠದ ಸಂಯೋಜಕ ಡಾ. ಗುಂಡೇಗೌಡಅವರು ಪ್ರಾಸ್ತಾವಿಕ ನುಡಿಗಳನ್ನಾಡಿ, ಸ್ವಾಗತಿಸಿದರು. ಹಿರಿಯ ಪ್ರಾಧ್ಯಾಪಕ ಪ್ರೊ. ಬಿ ಕರಿಯಣ್ಣ ವಂದಿಸಿದರು.

ಫೋಟೊ ಕ್ಯಾಪ್ಷನ್​ :