ಇಒ ಮನೆ ದರೋಡೆಕೋರನ ಬಂಧನ

ನಟೋರಿಯಸ್​ ಕಳ್ಳ ಫಹೀಮ್​ ಅಲಿಯಾಸ್​ ಎಟಿಎಂ ಹೀಮ್​ ಇಸ್ಲಾಮುದ್ದೀನ್​ (38)ನನ್ನು ಪ್ರಯಾಗ್​ ರಾಜ್​ ಜೈಲಿನಿಂದ ಬಾಡಿವಾರೆಂಟ್​ ಮೇಲೆ ಕರೆತಂದು ಡಿಸೆಂಬರ್​ 30, 2023ರಲ್ಲಿ ನಗರದ ಗೋಕುಲ ಬಡಾವಣೆಯ ಬಾಡಿಗೆ ಮನೆಯಲ್ಲಿ ವಾಸವಿದ್ದ ತಾಪಂ ಇಒ ಎನ್​.ಮಂಜುನಾಥ್​ ಮನೆ ಬೀಗ ಹೊಡೆದು 401 ಗ್ರಾಂ ತೂಕದ 55 ಲಕ್ಷ ಮೌಲ್ಯದ ಚಿನ್ನಾಭರಣ ದೋಚಿದ್ದ ಪ್ರಕರಣವನ್ನು ಭೇಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಮನೆ ಬೀಗ ಹಾಕಿಕೊಂಡು ಕೆಲಸದ ನಿಮಿತ್ತ ಮಂಜುನಾಥ್​ ತೆರಳಿದ್ದಾಗ ಈ ಟನೆ ನಡೆದಿತ್ತು. ಈ ಸಂದರ್ಭದಲ್ಲಿ ಮಗಳ ಮದುವೆ ಕಾರ್ಯವಿತ್ತು. ಜಯನಗರ ಠಾಣೆಯಲ್ಲಿ ಮನೆಗಳ್ಳತನ ಪ್ರಕರಣ ದಾಖಲಾಗಿತ್ತು.

ಉತ್ತರ ಪ್ರದೇಶದ ಮುರದಾಬಾದ್​ ಜಿಲ್ಲೆಯ ಉಮರಿ ಕಲಾಗ್ರಾಮದ ಆರೋಪಿ ಫಹೀಮ್​ ಬಳಿಯಿಂದ 150 ಗ್ರಾಂ 220 ಮಿಲಿ ತೂಕದ ಚಿನ್ನದ ಗಟ್ಟಿ, 50 ಗ್ರಾಂ 130 ಮಿಲಿ ತೂಕದ ಚಿನ್ನದ ಕೈ ಕಡಗ ಹಾಗೂ 200 ಗ್ರಾಂ 770 ಮಿಲಿ ತೂಕದ ಬಿಸ್ಕತ್​ ಆಕಾರದ ಚಿನ್ನದ ಗಟ್ಟಿ ಒಟ್ಟು 401 ಗ್ರಾಂ 12 ಮಿಲಿ ತೂಕದ ಅಂದಾಜು 55 ಲಕ್ಷ ಮೌಲ್ಯದ ಚಿನ್ನಾಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ತುಮಕೂರು ನಗರ ಡಿವೈಎಸ್ಪಿ ಕೆ.ಆರ್​.ಚಂದ್ರಶೇಖರ್​ ನೇತೃತ್ವದ ತಿಲಕ್​ಪಾರ್ಕ್​ ಸಿಪಿಐ, ಎನ್​.ಕೆ.ನದಾಫ್, ಜಯನಗರ ಠಾಣೆ ಪಿಎಸ್​ಐ ಎನ್​. ಮೋಹನ್​ ಒಳಗೊಂಡ ತಂಡ ಈ ಪ್ರಕರಣ ಪತ್ತೆಹಚ್ಚಿದ್ದು ಜಿಲ್ಲಾ ಪೊಲೀಸ್​ ಅಧೀಕ್ಷಕ ಕೆ.ವಿ.ಅಶೋಕ್​ ಅಭಿನಂದಿಸಿ, ಪ್ರಶಂಸನಾ ಪತ್ರ ನೀಡಿದರು.