ಪ್ರಶಸ್ತಿ ಸುತ್ತಿಗೆ ಜ್ಯೋತ್ಸ್ನಾ, ರಿಯಾನ್ಷ್ ಲಗ್ಗೆ

ತುಮಕೂರು: ಅಗ್ರಶ್ರೇಯಾಂಕಿತ ರಿಯಾನ್ಷ ರಿಶಿಕ್​ ಸಾಯಿ ಯಗಂಟಿ ಹಾಗೂ ಜ್ಯೋತ್ಸ್ನಾ ವಿನೋದ್​ ಯೋನೆಕ್ಸ್​ ಸನ್​ರೈಸ್​ ರಾಜ್ಯ ಕಿರಿಯರ Ranking ಬ್ಯಾಡ್ಮಿಂಟನ್​ ಟೂರ್ನಿ 11 ವಯೋಮಾನದೊಳಗಿನ ಬಾಲಕ, ಬಾಲಕಿಯರ ವಿಭಾಗದ ಸಿಂಗಲ್ಸ್​ನಲ್ಲಿ ಪ್ರಶಸ್ತಿ ಸುತ್ತಿಗೆ ಲಗ್ಗೆಯಿಟ್ಟಿದ್ದಾರೆ.

ನಗರದ ತುಮಕೂರು ಬ್ಯಾಡ್ಮಿಂಟನ್​ ಅಕಾಡೆಮಿ (ಟಿಬಿಎ)ಯಲ್ಲಿ ನಡೆಯುತ್ತಿರುವ 11 ಹಾಗೂ 13 ವಯೋಮಾನದೊಳಗಿನ ಬ್ಯಾಡ್ಮಿಂಟನ್​ ಟೂರ್ನಿಯ ಬಾಲಕರ ವಿಭಾಗದ 11 ವಯೋಮಾನದ ಉಪಾಂತ್ಯದಲ್ಲಿ ರಿಯಾನ್ಷ 15-12, 15-10 ರಿಂದ ಜಿ.ರಿಶ್ವಂತ್​ರನ್ನು ಮಣಿಸಿ ಫೈನಲ್ ಪ್ರವೇಶಿಸಿದರು. ಮತ್ತೊಂದು ಸೆಮಿಫೈನಲ್​ನಲ್ಲಿ 4ನೇ ಶ್ರೇಯಾಂಕದ ಪಿ.ಲಿತಿನ್​ 15-10, 15-9 ರಿಂದ ಸಾತ್ವಿಕ್​ ಶ್ರೀಧರ್​ ರೆಡ್ಡಿ ವಿರುದ್ಧ ಜಯಗಳಿಸಿ ಪ್ರಶಸ್ತಿ ಸುತ್ತಿಗೆ ಪ್ರವೇಶಿಸಿದರು.

ಬಾಲಕಿಯರ ವಿಭಾಗದಲ್ಲಿ ಜ್ಯೋತ್ಸ್ನಾ ವಿನೋದ್​ 13-15 ರಿಂದ ಮೊದಲ ಸೆಟ್​ ಹಿನ್ನೆಡೆ ಬಳಿಕ ಚೇತರಿಸಿಕೊಂಡು 15-7, 15-5 ರಿಂದ ಅರುಶಿ ವೈಣವಿ ವಿರುದ್ಧ ಜಯಗಳಿಸಿ ಫೈನಲ್​ಗೆ ಲಗ್ಗೆಯಿಟ್ಟರು. ಮತ್ತೊಂದು ಉಪಾಂತ್ಯದಲ್ಲಿ ಯುವಿಕಾ ತಮಯ್ಯ 15-8, 15-3 ರಿಂದ ಮೇದ ಜೇತ್ರಿ ವಿರುದ್ಧ ಸುಲಭ ಜಯಗಳಿಸಿ ಪ್ರಶಸ್ತಿ ಸುತ್ತಿಗೆ ಪ್ರವೇಶಿಸಿದರು.

ವೈಭವ್​, ಸಿಹಿ ಪ್ರಶಸ್ತಿ ಸುತ್ತಿಗೆ: 13 ವಯೋಮಾನದೊಳಗಿನ ಬಾಲಕರ ವಿಭಾಗದ ಸೆಮಿಫೈನಲ್ ಅಗ್ರಶ್ರೇಯಾಂಕಿತ ವೈಭವ್​ ರಾವ್​ 15-11, 15-3 ರಿಂದ ಅರ್ಜುನ್​ ಅರಳ್​ಗುಂಡಗಿ ವಿರುದ್ಧ ನೇರ ಸೆಟ್​ಗಳ ಜಯಗಳಿಸಿ ಫೈನಲ್​ಗೆ ಅರ್ಹತೆ ಪಡೆದರು. ಮತ್ತೊಂದು ಸೆಮಿಫೈನಲ್​ನಲ್ಲಿ ಜ್ಞಾನ ರಿಶಿಕ್​ 15-13, 16-14 ತೀವ್ರ ಪೈಪೋಟಿಯಿಂದ ಕೂಡಿದ್ದ ಪಂದ್ಯದಲ್ಲಿ ದಕ್ಷ ರಘುನಂದ್​ ಅಯ್ಯಂಗರ್​ರನ್ನು ಮಣಿಸಿ ಫೈನಲ್​ ಪ್ರವೇಶಿಸಿದರು.

ಬಾಲಕಿಯರ ವಿಭಾಗದಲ್ಲಿ ತೀವ್ರ ಹಣಾಹಣಿಯಿಂದ ಕೂಡಿದ್ದ ಹೋರಾಟದಲ್ಲಿ ಅಗ್ರಶ್ರೇಯಾಂಕಿತೆ ಸಿಹಿ ಆದರ್ಶ್​ 14-16, 15-13, 15-12 ರಿಂದ ಕೆ.ಹೇಮಶ್ರೀ ವಿರುದ್ಧ ಜಯಗಳಿಸಿ ಪ್ರಶಸ್ತಿ ಸುತ್ತಿಗೆ ದಾಂಗುಡಿಯಿಟ್ಟರು. ಮತ್ತೊಂದು ಸೆಮಿಸ್​ನಲ್ಲಿ ಶಾನ್ವಿ 15-13, 15-11 ರಿಂದ ಸ್ತುತಿ ಎಸ್​.ಶೆಟ್ಟಿರನ್ನು ಮಣಿಸಿ ಅಂತಿಮ ಹಂತಕ್ಕೆ ಪ್ರವೇಶಿಸಿದರು.