ಕಾರಿನಲ್ಲಿ ಸ್ಫೋಟಗೊಂಡಿದ್ದ ಕಚ್ಚಾ ಬಾಂಬ್​ ಮೂಲ ಪತ್ತೆ

ಮೃತ ಆರೋಪಿ ನಾಗೇಂದ್ರನ ಸ್ವಂತ ಊರು ಉತ್ತರ ಕನ್ನಡ ಜಿಲ್ಲೆ ಅಂಕೋಲಾ ತಾಲೂಕು ಹೆಬ್ಬೂಲ್​ ರಾಜಾನಗುಳಿ ಗ್ರಾಮದಲ್ಲಿರುವ ಮನೆಯನ್ನು ಮತ್ತು ಸಂತ್ರಸ್ತೆ ರಮ್ಯಾ ಸ್ವಂತ ಗ್ರಾಮವಾದ ಅಗಸೂರು ಗ್ರಾಮಕ್ಕೆ ಪೊಲೀಸರು ಭೇಟಿ ನೀಡಿ ತಪಾಸಣೆ ನಡೆಸಿದ್ದಾರೆ.

ನಾಗೇಂದ್ರ ಬೆಂಗಳೂರಿನಲ್ಲಿ ವಾಸವಾಗಿದ್ದ ಪಿ.ಜಿ.ಸೆಂಟರ್​ ಬಳಿ ಮತ್ತು ಪಿರ್ಯಾದಿ ವಾಸವಾಗಿದ್ದ ಸಿದ್ದಾಪುರ ಸ್ಥಳಗಳಲ್ಲಿ ಆರೋಪಿ ನಾಗೇಂದ್ರ ಓಡಾಡಿದ್ದ ಮಾಹಿತಿ ಸಂಗ್ರಹಿಸಿ, ಸ್ಥಳಿಯ ಬಾತ್ಮೀದಾರರಿಂದ ಮತ್ತು ವೈಜ್ಞಾನಿಕ ವಿಧಾನದಿಂದ ತನಿಖೆ ಕೈಗೊಳ್ಳಲಾಗಿದೆ.

ಆರೋಪಿ ನಾಗೇಂದ್ರ ಹೊನ್ನಾವರ ತಾಲೂಕು ಚಂದಾವರ ಗ್ರಾಮದ ಜಾರ್ಜ್​ ನಿಕ್ಲೋವ್​ ಫರ್ನಾಂಡೀಸ್​(64) ಎಂಬುವನ ಬಳಿ ಕಚ್ಚಾ ಬಾಂಬ್​ ಖರೀದಿಸಿರುವುದನ್ನು ಪತ್ತೆ ಮಾಡಲಾಗಿದೆ.

ಜಾರ್ಜ್​ ನಿಕ್ಲೋವ್​ ಫರ್ನಾಂಡೀಸ್​ ಆರೋಪಿ ನಾಗೇಂದ್ರನಿಗೆ ಅಲ್ಲದೇ ಸ್ಥಳಿಯವಾಗಿ ಸಂದೀಪ್​ಗೌಡ , ನಾರಾಯಣ ಡೊಲ್ಲುಗೌಡ ಮತ್ತು ನಾಗರಾಜು ಡೊಲ್ಲುಗೌಡ ರವರುಗಳಿಗೂ ಸಹ ಕಚ್ಛಾ ಬಾಂಬ್​ಗಳನ್ನು ಕೊಟ್ಟಿರುವುದು ತನಿಖೆಯಿಂದ ಪತ್ತೆಯಾಗಿದೆ, ಈ ಸಂಬಂಧ ಅಂಕೋಲಾ ಪೊಲೀಸ್​ ಠಾಣೆಯಲ್ಲಿ ಪ್ರತ್ಯೇಕ ಪ್ರಕರಣ ದಾಖಲಾಗಿದೆ.

ಆರೋಪಿ ಜಾರ್ಜ ನಿಕ್ಲೋವ್​ ಫರ್ನಾಂಡೀಸ್​ ರವರನ್ನು ವಿಚಾರಣೆ ಮಾಡುವ ಸಮಯದಲ್ಲಿ ಅವರಿಗೆ ಅನಾರೋಗ್ಯ ಉಂಟಾಗಿದ್ದರಿಂದ ಅವರನ್ನು ಅಂಕೋಲಾ ಪೊಲೀಸರು ಕುಮಟಾ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಿ ಹೆಚ್ಚಿನ ಚಿಕಿತ್ಸೆಗಾಗಿ ಕಾರಾವಾರ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಆರೋಪಿ ಜಾರ್ಜ ನಿಕ್ಲೋವ್​ ಫರ್ನಾಂಡೀಸ್​ ಸ್ಥಳಿಯವಾಗಿ ಮೀನುಗಾರಿಕೆ ಉದ್ದೇಶಕ್ಕಾಗಿ ಕಚ್ಛಾ ಬಾಂಬ್​ ತಯಾರು ಮಾಡಿ ಮಾರಾಟ ಮಾಡಿರುವುದಾಗಿ ತಿಳಿಸಿದ್ದು ಈತನು ಆಸ್ಪತ್ರೆಯಿಂದ ಬಿಡುಗಡೆಯಾದ ನಂತರ ಹೆಚ್ಚಿನ ತನಿಖೆ ನಡೆಯಲಿದೆ.