ಕರ್ನಾಟಕ ಖೋ ಖೋ ಚಾಂಪಿಯನ್​

ತುಮಕೂರು ವಿವಿ ಅಂಗಳದಲ್ಲಿ ಖೋ ಖೋ ಇಂಡಿಯಾ ವತಿಯಿಂದ ಕರ್ನಾಟಕ ಅಮೆಚೂರು ಖೋ ಖೋ ಸಂಸ್ಥೆ ಸಹಯೋಗದಲ್ಲಿ ಆಯೋಜಿಸಿದ್ದ ಹಿರಿಯರ ರಾಷ್ಟ್ರೀಯ ಖೋ ಖೋ ಚಾಂಪಿಯನ್​ಶಿಪ್​ನಲ್ಲಿ ಮಂಗಳವಾರ ಪ್ರಶಸ್ತಿ ಸುತ್ತಿನ ಅಂತಿಮ ಹಣಾಹಣಿಯಲ್ಲಿ ಕರ್ನಾಟಕ ತಂಡವು ರೋಚಕ ಗೆಲುವು ಸಾಧಿಸಿ ಪ್ರಥಮ ಆವೃತ್ತಿಯ ಚಾಂಪಿಯನ್​ ಪ್ರಶಸ್ತಿ ಮುಡಿಗೇರಿಸಿಕೊಂಡಿತು.

ಸಂಜೆ ನಡೆದ ಫೈನಲ್ ಪಂದ್ಯದಲ್ಲಿ ಆತಿಥೇಯ ಕರ್ನಾಟಕ ತಂಡವು 14-13 ಅಂಕಗಳ ತೀವ್ರ ಜಿದ್ದಾಜಿದ್ದಿನಿಂದ ಕೂಡಿದ್ದ ಹೋರಾಟದಲ್ಲಿ ತಮಿಳುನಾಡು ವಿರುದ್ಧ ವಿರೋಚಿತ ಗೆಲುವು ಸಾಧಿಸಿ ಪ್ರಥಮ ಬಹುಮಾನ ಗೆದ್ದುಕೊಂಡಿತು. ಕರ್ನಾಟಕ ಪರ ಮೌನೇಶ್​ (2 ನಿ, 30 ಸೆ., ಹಾಗೂ 5 ಅಂಕ) ಅದ್ಭುತ ಪ್ರದರ್ಶನ ತೋರಿ ತಂಡದ ಗೆಲುವಿನಲ್ಲಿ ಪ್ರಮುಖ ಭೂಮಿಕೆ ನಿಭಾಯಿಸಿದರು. ಶಿವಪ್ಪ ಸಹ ಉತ್ತಮ ನಿರ್ವಹಣೆ ತೋರಿ ತಂಡದ ಗೆಲುವಿಗೆ ಸಹಕಾರಿಯಾಗಿ ನಿಂತರು. ತಮಿಳುನಾಡು ತಂಡದ ಪರ ಆರ್​.ಶಿವ ಎರಡು ವಿಭಾಗದಲ್ಲಿ ಉತ್ತಮ ಪ್ರದರ್ಶನ ನೀಡಿದರು.

ತಮಿಳುನಾಡಿಗೆ ಪ್ರಶಸ್ತಿ: ಇದಕ್ಕು ಮುನ್ನ ಮಹಿಳೆಯರ ಫೈನಲ್​ ಪಂದ್ಯದಲ್ಲಿ ತಮಿಳುನಾಡು ತಂಡವು 8-6 ಅಂಕಗಳಿಂದ ಪಂಜಾಬ್​ ವಿರುದ್ಧ ಜಯಗಳಿಸಿ ಪ್ರಶಸ್ತಿಗೆ ಮುತ್ತಿಕ್ಕಿತು. ತಮಿಳುನಾಡ ಪರ ಪದ್ಮ ಮೊದಲ ಇನ್ನಿಂಗ್ಸ್​ನಲ್ಲಿ 3 ನಿಮಿಷ, 2ನೇ ಇನ್ನಿಂಗ್ಸ್​ನಲ್ಲಿ 2 ನಿ., 50 ಸೆಕೆಂಡ್​ ಆಡಿ, 1 ಅಂಕಗಳಿಸಿದರು. ಮುಹಿಲರಸಿ (3 ನಿಮಿಷ , 1.40 ನಿ., ಹಾಗೂ 2 ಅಂಕ) ಉತ್ತಮ ನಿರ್ವಹಣೆ ತೋರಿ ತಂಡದ ಗೆಲುವಿಗೆ ಕೊಡುಗೆ ನೀಡಿದರು.