ಆತಿಥೇಯ ಕರ್ನಾಟಕ ಶುಭಾರಂಭ

ತುಮಕೂರು ವಿಶ್ವವಿದ್ಯಾಲಯದ ಮಣ್ಣಿನ ಅಂಕಣದಲ್ಲಿ ಖೋ ಖೋ ಇಂಡಿಯಾ ವತಿಯಿಂದ ಆಯೋಜಿಸಿರುವ ಪುರುಷರ ಹಾಗೂ ಮಹಿಳೆಯರ ರಾಷ್ಟ್ರೀಯ ಖೋ ಖೋ ಚಾಂಪಿಯನ್​ಷಿಪ್​ ಪಂದ್ಯಾವಳಿಯ ಲೀಗ್​ ಗುಂಪಿನ ಆರಂಭಿಕ ಪಂದ್ಯದಲ್ಲಿ ಆತಿಥೇಯ ಕರ್ನಾಟಕ, ಒರಿಸ್ಸಾ, ಚಂಡೀಘಡ, ಪಂಜಾಬ್​ ತಂಡಗಳು ಪುರುಷರ ವಿಭಾಗದಲ್ಲಿ ಶುಭಾರಂಭ ಮಾಡಿದರು.

ಕರ್ನಾಟಕ ತಂಡವು 11-06 ಅಂಕಗಳ ಅಂತರದಿಂದ ಉತ್ತರಾಖಂಡ್​ದ ವಿರುದ್ಧ ಜಯಗಳಿಸಿತು. ಕರ್ನಾಟಕ ಪರ ಮೌನೇಶ್​, ಆಕಾಶ್​ ಉತ್ತಮ ಆಟದ ಪ್ರದರ್ಶನ ನೀಡಿದರು. ಮಲ್ಲಿಕಾರ್ಜುನ್​ 3 ಔಟ್​ಗಳನ್ನು ಪಡೆದರು. ಉತ್ತರಾಖಂಡ್​ದ ಪರ ವನಿಷ್​ ಕುಮಾರ್​ 4 ಔಟ್​ಗಳನ್ನು ಪಡೆದರು.

ಇನ್ನುಳಿದಂತೆ ಒರಿಸ್ಸಾ ತಂಡ 17-14 ರಿಂದ ಹರ್ಯಾಣ ವಿರುದ್ಧ , ಚಂಡೀಘಡ 20-12 ರಿಂದ ಮಧ್ಯಭಾರತ್​, ಪಂಜಾಬ್​ ತಂಡ 17-15 ರಿಂದ ಚತ್ತೀಸ್​ಘಡದ ವಿರುದ್ಧ ಜಯಗಳಿಸಿ ಶುಭಾರಂಭ ಮಾಡಿದವು.

ಮಹಿಳೆಯರ ವಿಭಾಗದಲ್ಲಿ ಪಂಜಾಬ್​ ತಂಡ 15-02 ಅಂಕಗಳ ಅಂತರದಿಂದ ದೆಹಲಿ ವಿರುದ್ಧ ಭರ್ಜರಿ ಜಯದಾಖಲಿಸಿತು. ಹಿಮಾಚಲ ತಂಡ 15-12 ರಿಂದ ಮಧ್ಯಭಾರತ್​ ವಿರುದ್ಧ, ಚಂಡೀಘಡದ 13-07 ಅಂಕಗಳಿಂದ ಪಾಂಡಿಚೇರಿ ವಿರುದ್ಧ, ಮಹಾರಾಷ್ಟ್ರ ತಂಡ 11-03 ಅಂತರದಿಂದ ತೆಲಾಂಗಣ ವಿರುದ್ಧ ಜಯಗಳಿಸಿ ತಮ್ಮ ಗುಂಪಿನಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿವೆ.

ಭಾನುವಾರವು ಲೀಗ್​ ಪಂದ್ಯಗಳು ನಡೆಯಲಿದ್ದು 8 ಗುಂಪುಗಳಲ್ಲಿ ಅಗ್ರಸ್ಥಾನ ಪಡೆಯುವ ತಂಡಗಳು ನಂತರ ನಾಕೌಟ್​ ಮಾದರಿ ಪ್ರವೇಶ ಪಡೆಯಲಿವೆ.