ಮೊಬೈಲ್​ ಆ್ಯಪ್​ ಮೂಲಕ ರಸಗೊಬ್ಬರ ಖರೀದಿ

ರೈತರು ತಾವಿರುವ ಸ್ಥಳದಿಂದಲೇ "ಫ್ರೇಮ್​ವರ್ಕ್​ ಫಾರ್​ ಫರ್ಟಿಲೈಸರ್​ ಸೇಲ್​' ಮೊಬೈಲ್​ ಆ್ಯಪ್​ ಮೂಲಕ ರಸಗೊಬ್ಬರ ಕಾಯ್ದಿರಿಸುವ ವಿನೂತನ ವ್ಯವಸ್ಥೆಯನ್ನು ಕೇಂದ್ರ ಸರ್ಕಾರ ಆಯ್ದ ರಾಜ್ಯಗಳ ಪೈಕಿ ಕರ್ನಾಟಕದಲ್ಲಿ ಪ್ರಾಯೋಗಿಕ ಜಾರಿಗೆ ಮುಂದಾಗಿದೆ.

ರಸಗೊಬ್ಬರ ಖರೀದಿ ಪ್ರಕ್ರಿಯೆ ಸರಳವಾಗಿಸಲು ಕೇಂದ್ರ ಸರ್ಕಾರ "ಫರ್ಟಿಲೈಸರ್ಸ್​ ಸೇಲ್ಸ್​ ಅಪ್ಲಿಕೇಫಿನ್​ ಸಿಸ್ಟಮ್​' ಎಂಬ ವಿನೂತನ ವ್ಯವಸ್ಥೆ ಜಾರಿಗೊಳಿಸಿ, "ಫ್ರೇಮ್​ವರ್ಕ್​ ಫಾರ್​ ಫರ್ಟಿಲೈಸರ್​ ಸೇಲ್​' ಎಂಬ ಮೊಬೈಲ್​ ಆ್ಯಪ್​ ಬಿಡುಗಡೆ ಮಾಡಿದೆ. ಪ್ರಸಕ್ತ ಮುಂಗಾರು ಹಂಗಾಮಿನಲ್ಲಿ ದೇಶದ ಎಲ್ಲ ರಾಜ್ಯಗಳಲ್ಲಿ ಪ್ರಾಯೋಗಿಕವಾಗಿ ಈ ವ್ಯವಸ್ಥೆ ಅನುಷ್ಠಾನಗೊಳಿಸುತ್ತಿದೆ.

ಜೂನ್​ 17ರಂದು ಮೊಬೈಲ್​ ಆ್ಯಪ್​ ಬಳಕೆಗೆ ಅಧಿಕೃತ ಚಾಲನೆ ದೊರೆಯಲಿದ್ದು ರೈತರು ತಮ್ಮೆಲ್ಲ ಕೆಲಸ ಬಿಟ್ಟು ರಸಗೊಬ್ಬರಕ್ಕಾಗಿ ಅಂಗಡಿಗಳ ಮುಂದೆ ಸರತಿ ಸಾಲಿನಲ್ಲಿ ನಿಂತು ಗಂಟೆಗಟ್ಟಲೆ ಕಾಯುವ ಅವಶ್ಯಕತೆ ಮುಂದಿರುವುದಿಲ್ಲ. ಮೊಬೈಲ್​ ಆ್ಯಪ್​ ಮೂಲಕ ರೈತರು ಹತ್ತಿರದ ಗೊಬ್ಬರದ ಅಂಗಡಿಗೆ ಬುಕ್​ ಮಾಡಿದಾಗ ಮೊಬೈಲ್​ ಆ್ಯಪ್​ನಲ್ಲಿ ಕ್ಯೂ ಆರ್​ ಕೋಡ್​ ಸೃಜನೆಯಾಗಲಿದ್ದು ಈ ಕೋಡ್​ ಬಳಸಿ ಗೊಬ್ಬರ ಖರೀದಿಸಬಹುದು.

ರೈತ ಬಯಸಿದ 3 ದಿನದೊಳಗೆ ಗೊಬ್ಬರ ಖರೀದಿಸಬಹುದು, ಇದರಿಂದ ರೈತರಿಗೆ ದೊರೆಯುವ ಗೊಬ್ಬರ ಅನ್ಯರ ಪಾಲಾಗುವುದಿಲ್ಲ. ಕೈಗಾರಿಕೆ ಉದ್ದೇಶ ಸೇರಿ ಯೂರಿಯಾ ಮತ್ತಿತರ ಗೊಬ್ಬರಗಳ ದುರ್ಬಳಕೆ, ಕಾಳಸಂತೆ ಮಾರಾಟಕ್ಕೆ ಈ ವ್ಯವಸ್ಥೆ ಕಡಿವಾಣ ಹಾಕುವ ಉದ್ದೇಶ ಹೊಂದಲಾಗಿದೆ. ರೈತರು ಕಾಮನ್​ ಸರ್ವಿಸ್​ ಸೆಂಟರ್​(ಸಿಎಸ್​ಸಿ) ಮೂಲಕ ರಸಗೊಬ್ಬರ ಕಾಯ್ದಿರಿಸಬಹುದು. ರಸಗೊಬ್ಬರ ಅಂಗಡಿ ಮಾಲೀಕರು ಸಹ ಸ್ವಯಂಪ್ರೇರಿತವಾಗಿ ರಸಗೊಬ್ಬರಗಳನ್ನು ಮೊಬೈಲ್​ ಆ್ಯಪ್​ ಮೂಲಕ ಬುಕ್​ ಮಾಡಲು ಸಹಕರಿಸಬೇಕು.

ದೇಶಾದ್ಯಂತ ಗೊಬ್ಬರಕ್ಕೆ ಇರುವ ಬೇಡಿಕೆ ಈ ವ್ಯವಸ್ಥೆಯಡಿ ಸರ್ಕಾರಗಳ ಗಮನಕ್ಕೆ ಬರಲು ಈ ಮೊಬೈಲ್​ ಆ್ಯಪ್​ ಸಹಕಾರಿಯಾಗಲಿದೆ. ಇದರಿಂದ ಯೋಜಿತ ಬೇಡಿಕೆಯನ್ವಯ ದೇಶಾದ್ಯಂತ ಗೊಬ್ಬರದ ಸುಸ್ಥಿರ ಪೂರೈಕೆ ಸಾಧ್ಯವಾಗಲಿದೆ. ಆಹಾರ ಭದ್ರತೆಗೂ ಇದು ನೆರವಾಗಲಿದೆ. ಗೊಬ್ಬರದ ಬೇಡಿಕೆಗೆ ಅನುಗುಣವಾಗಿ ದಾಸ್ತಾನು ಮಾಡಿಕೊಳ್ಳಲು ಅನುವಾಗಲಿದೆ. ಪ್ರತಿ ವಹಿವಾಟು ಡಿಜಿಟಲೀಕರಣ ರೂಪದಲ್ಲಿದ್ದು, ಪಾರದರ್ಶಕತೆ ಮತ್ತು ಮಾರಾಟದ ನಿಖರ ಲೆಕ್ಕ ಸಿಗಲಿದೆ. ಅರ್ಹ ರೈತರ ಮಾಹಿತಿ ಇರುವುದರಿಂದ ಅನಗತ್ಯ ವಿವಾದಗಳಿಗೆ ಕಡಿವಾಣ ಹಾಕುವ ನಿರೀೆಯಿದೆ.