ಮಹಿಳಾ ಟೆನ್ನಿಸ್​ ಪಂದ್ಯಾವಳಿಗೂ ವಂತಿಕೆ ಕೊಡಲು ಗ್ರಾಪಂಗೆ ಒತ್ತಡ!

15ನೇ ಹಣಕಾಸು ನಿಧಿಯನ್ನು ಪಡೆಯಲಾಗದ ಈಗಾಗಲೇ ಆರ್ಥಿಕ ಸಂಕಷ್ಟದಲ್ಲಿರುವ ಗ್ರಾಪಂಗಳು ಪಂದ್ಯಾವಳಿಗೆ ಗರಿಷ್ಟ ಮೊತ್ತವನ್ನು ನೀಡಿ, ಪ್ರಾಯೋಜಕತ್ವ ಪಡೆಯಬೇಕು ಎಂದು ಖುದ್ದು ಜಿಲ್ಲಾಧಿಕಾರಿ ಶುಭಕಲ್ಯಾಣ್​ ಇಲಾಖೆಗಳ ಜಿಲ್ಲಾ ಅಧಿಕಾರಿಗಳು ಹಾಗೂ ಎಲ್ಲಾ ಗ್ರಾಪಂ ಅಭಿವೃದ್ಧಿ ಅಧಿಕಾರಿಗಳಿಗೆ ನೇರವಾಗಿ ಪತ್ರಬರೆದಿರುವುದು ಜಿಲ್ಲೆಯೆಲ್ಲೆಡೆ ಆಕ್ರೋಶಕ್ಕೆ ಕಾರಣವಾಗಿದೆ.

ತುಮಕೂರು ಜಿಲ್ಲಾಡಳಿತ ಗ್ರಾಪಂಗಳಿಂದ ಹಣ ವಸೂಲಿ ಮಾಡುವುದನ್ನು ಅಭ್ಯಾಸ ಮಾಡಿಕೊಂಡಿದೆ. ಈ ಹಿಂದೆಯೂ ತುಮಕೂರು ದಸರಾ, ವಿವಿಧ ಸಂ, ಸಂಸ್ಥೆಗಳ ರಾಜ್ಯ ಸಮ್ಮೇಳನಕ್ಕೂ ಅನಧಿಕೃತವಾಗಿ ಹಣ ವಸೂಲಿ ಮಾಡಿಕೊಂಡಿದೆ. ಈಗ ಮತ್ತೊಂದು ಕ್ರೀಡಾಕೂಟಕ್ಕೆ ಕಡ್ಡಾಯವಾಗಿ ಹಣ ನೀಡಲೇಬೇಕು ಎಂದು ಒತ್ತಾಯಿಸುತ್ತಿರುವ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಹಣ ಹೊಂದಿಸಲು ಅನ್ಯಮಾರ್ಗ ಹಿಡಿಯಲಾರಂಭಿಸಿದ್ದಾರೆ.

ತುಮಕೂರು ಓಪನ್​ ಅಂತರಾಷ್ಟ್ರೀಯ ಮಹಿಳಾ ಟೆನೀಸ್​ ಕ್ರೀಡಾಂಗಣದಲ್ಲಿ ವಿಶ್ವ ರ್ಯಾಂಕಿಂಗ್​ನ್ನ 60 ಮಹಿಳಾ ಕ್ರೀಡಾಪಟುಗಳು ಭಾಗವಹಿಸುತ್ತಿದ್ದು ತುಮಕೂರು ಜಿಲ್ಲೆಗೆ ಹೆಮ್ಮೆಯ ವಿಷಯವಾಗಿ ಎಂದು ಪತ್ರದಲ್ಲಿ ಪ್ರಸ್ತಾಪಿಸಿರುವ ಜಿಲ್ಲಾಧಿಕಾರಿ ಶುಭಕಲ್ಯಾಣ್​, ಈ ಕ್ರೀಡಾಕೂಟದಿಂದ ಜಿಲ್ಲೆಯ ಜನತೆ ಉತ್ತಮವಾದ ಟೆನ್ನಿಸ್​ ಪಂದ್ಯಾವಳಿ ವೀಕ್ಷಿಸಬಹುದಾಗಿದೆ ಎಂದು "ಬ್ಯಾಂಕ್​ ಖಾತೆ'ಯನ್ನು ನೀಡಿ ಗರಿಷ್ಟ ಮೊತ್ತವನ್ನು ಭರಿಸಲು ಕೋರಿರುವ ಪತ್ರ ಪಿಡಿಒಗಳ ನೆಮ್ಮದಿ ಕಡೆಸಿದೆ.

ಜಿಲ್ಲೆಯಲ್ಲಿ 330 ಗ್ರಾಪಂಗಳಿಂದ ಪ್ರತಿಯೊಂದರಿಂದಲೂ ತಲಾ 5000ರೂ. ಕಡ್ಡಾಯವಾಗಿ ನೀಡಬೇಕು ಎಂದು ಆದೇಶಿಸಲಾಗಿದ್ದು ಪಿಡಿಒಗಳ ಆಕ್ರೋಶಕ್ಕೆ ಕಾರಣವಾಗಿದೆ. ಜಿಲ್ಲೆಯ ಮುಖ್ಯಸ್ಥರೇ ಪದೇಪದೇ ವಂತಿಕೆಗೆ ಒತ್ತಾಯಿಸುವುದರಿಂದ ಸಂಕಷ್ಟದಲ್ಲಿ ಆಡಳಿತ ನಡೆಸುವಂತಾಗಿದೆ ಗ್ರಾಪಂ ವ್ಯಾಪ್ತಿಯ ಹೊರಗೆ ನಡೆಯುವ ಕ್ರೀಡಾಕೂಟಕ್ಕೆ ವಂತಿಕೆ ನೀಡಲು ಕಾಯ್ದೆಯಲ್ಲಿ ಅವಕಾಶವಿಲ್ಲದಿದ್ದರೂ ಹಣ ನೀಡಬೇಕು ಎಂಬ ಒತ್ತಾಯ ಪರೋಕ್ಷವಾಗಿ ಭ್ರಷ್ಟಾಚಾರಕ್ಕೆ ಕುಮ್ಮಕ್ಕು ನೀಡಿದಂತಾಗುತ್ತಿದೆ.

ಗ್ರಾಪಂಗಳು ಆಯಾ ಕ್ಷೇತ್ರ ವ್ಯಪ್ತಿಯ ಹೊರಗಿನ ಸಭೆ, ಸಮಾರಂಭಗಳಿಗೆ ಬೇಕಾಬಿಟ್ಟಿಯಾಗಿ ಹಣಕಾಸು ನೆರವು ಒದಗಿಸಲು ಕಾನೂನಿನಲ್ಲಿ ಅವಕಾಶವಿಲ್ಲದಿದ್ದರೂ ಕಾನೂನು ಮೀರಿ ಗ್ರಾಪಂ ಅಧಿಕಾರಿಗಳು ಜಿಲ್ಲಾಧಿಕಾರಿ ಸೂಚಿಸಿರುವ ಖಾತೆಗೆ ಹಣ ವರ್ಗಾವಣೆ ಮಾಡುತ್ತಿರುವುದು ಜಿಲ್ಲೆಯ ಜನರನ್ನು ಕೆರಳಿಸಿದೆ.

ಇಂತಹ ಕಾರ್ಯಕ್ರಮಗಳಿಗೆ ಹಣಕಾಸು ನೆರವು ಒದಗಿಸುವ ಬಗ್ಗೆ ಕರ್ನಾಟಕ ಗ್ರಾಮ ಸ್ವರಾಜ್​ ಮತ್ತು ಪಂಚಾಯತ್​ ರಾಜ್​ ಅಧಿನಿಯಮ&ಸೆಕ್ಷನ್​ 58(3)ರಲ್ಲಿ ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ. ಗ್ರಾಪಂ ತನ್ನ ಸಭೆಯಲ್ಲಿ ಅಂಗೀಕರಿಸಿದ ಮತ್ತುತನ್ನ ಸದಸ್ಯರ ಒಟ್ಟು ಸಂಖ್ಯೆಯಮೂರನೇ&ಎರಡರಷ್ಟು ಸದಸ್ಯರು ಸಮರ್ಥಿಸಿದ ರ್ನಿಣಯದಿಂದ ಹಣಕಾಸು ನೆರವು ನೀಡಲು ಅವಕಾಶವಿದ್ದು ಜನಪ್ರತಿನಿಧಿಗಳಿಲ್ಲದ ಗ್ರಾಪಂ ಆಡಳಿತವನ್ನು ದುರುಪಯೋಗ ಮಾಡಿಕೊಳ್ಳಲಾಗುತ್ತಿದೆ.

ಜಿಲ್ಲೆಯ ಒಳಗಡೆ ಯಾವುದೇ ವಸ್ತು ಪ್ರದರ್ಶನ, ಸಮ್ಮೇಳನ ಅಥವಾ ವಿಚಾರ ಸಂಕಿರಣಗಳಿಗೆ ಮಾತ್ರ ವಂತಿಕೆ ನೀಡಲು ಕಾಯ್ದೆಯಲ್ಲಿ ಅವಕಾಶವಿದೆ ಆದರೆ, ಜಿಲ್ಲಾಧಿಕಾರಿ ಸೂಚಿಸಿರುವ ಕ್ರೀಡಾಕೂಟಕ್ಕೆ ವಂತಿಕೆ ನೀಡಲು ಅವಕಾಶವೇ ಇಲ್ಲ. ನೋಂದಾಯಿತ ವೈದ್ಯಕಿಯ, ಶೈಕ್ಷಣಿಕ ಅಥವಾ ಧಮಾರ್ಥ ಸಂಸ್ಥೆಗಳಿಗೆ ಅಥವಾ ಸಾರ್ವಜನಿಕ ಉಪಯುಕ್ತತೆಯ ಸಂಸ್ಥೆಗಳಿಗಷ್ಟೇ ವಂತಿಕೆ ನೀಡಲು ಅವಕಾಶವಿದ್ದು, ಪಟ್ಟಣ ಪ್ರದೇಶದ ಶ್ರೀಮಂತರಷ್ಟೇ ಆಡುವ ಟೆನ್ನಿಸ್​ ಕ್ರೀಡಾಕೂಟಕ್ಕೆ ವಂತಿಕೆ ನೀಡಲು ಗ್ರಾಪಂಗೆ ಅವಕಾಶವಿಲ್ಲ.