ತುಮಕೂರು

39 ಶಾಲೆಗಳಲ್ಲಿ ಎನ್​ಎಸ್​ಕ್ಯೂಎಫ್​ ಆಧಾರಿತ ವೃತ್ತಿ ಶಿಕ್ಷಣ

ತುಮಕೂರು ಬಿಇಒ ಕಚೇರಿ
ತುಮಕೂರು ಬಿಇಒ ಕಚೇರಿ
ಡಾ.ಶ್ರೀಹರ್ಷ ಸೋರಲಮಾವು
Published on: 

ಪ್ರಮುಖ ಮುಖ್ಯಾಂಶಗಳು

  • ತೃತೀಯ ಭಾಷೆ ಬದಲಿಗೆ ಎಐ ಕಲಿಕೆಗೆ ಅವಕಾಶ
  • ಎನ್​ಎಸ್​ಕ್ಯೂಎಫ್​ ಬೋಧನೆಗೆ ಶಿಕ್ಷಕರ ಕೊರತೆ

ತುಮಕೂರು: ರಾಜ್ಯದ 1801ಸರ್ಕಾರಿ ಪ್ರೌಢಶಾಲೆಗಳಲ್ಲಿ ತೃತೀಯ ಭಾಷೆಯ ಕಲಿಕೆಯ ಬದಲಾಗಿ ಎಐ(ಆರ್ಟಿಫಿಶಲ್​ ಇಂಟಲಿಜೆನ್ಸ್​) ಕಲಿಸಲು ಸರ್ಕಾರ ಮುಂದಾಗಿದೆ. ತುಮಕೂರು ಶೈಕ್ಷಣಿಕ ಜಿಲ್ಲೆಯ 15 ಹಾಗೂ ಮಧುಗಿರಿ ಜಿಲ್ಲೆಯ 24 ಶಾಲೆಗಳಲ್ಲಿಯೂ ಪ್ರಸಕ್ತ ಶೈಕ್ಷಣಿಕ ವರ್ಷದಿಂದಲೇ ಎಐ ಕಲಿಕೆ ಆರಂಭಿಸಲಾಗಿದೆ.

ಯೋಜನಾ ಕೇಂದ್ರ ಶಿಕ್ಷಣ ಮಂತ್ರಾಲಯದ ಅನುಮೋದನಾ ಮಂಡಲಿ ಅನುಮೋದನೆಯಂತೆಯೇ 2014&15ನೇ ಶೈಕ್ಷಣಿಕ ವರ್ಷದಿಂದಲೇ ರಾಜ್ಯದಲ್ಲಿ 9ನೇ ತರಗತಿಯಿಂದಲೇ ತೃತೀಯ ಭಾಷೆಯ ಬದಲಾಗಿ ರಾಷ್ಟ್ರೀಯ ಕೌಶಲ ಅರ್ಹತಾ ಶಿಕ್ಷಣ ಆಯ್ಕೆ ಮಾಡಿಕೊಳ್ಳಲು ಅವಕಾಶವಿದ್ದು ಈ ಪಟ್ಟಿಗೆ ಎಐ ಕೂಡ ಸೇರ್ಪಡೆ ಮಾಡಿಕೊಳ್ಳಾಗಿದೆ.
ವಿದ್ಯಾರ್ಥಿಗಳಿಗೆ ಶಾಲಾ ಹಂತದಲ್ಲಿಯೇ ವೃತ್ತಿಪರ ಕೌಶಲ ಪ್ರಾಯೋಗಿಕ ಜ್ಞಾನ ಒದಗಿಸಿ ಭವಿಷ್ಯದ ನ್ನತ ಶಿಕ್ಷಣ, ಕೌಶಲ್ಯಾಭಿವೃದ್ಧಿ ಹಾಗೂ ವೃತ್ತಿ ಜೀವನಕ್ಕೆ ಅಗತ್ಯವಾದ ಸಾಮರ್ಥ್ಯಗಳನ್ನು ಬೆಳೆಸುವಲ್ಲಿ ಎನ್​ಎಸ್​ಕ್ಯೂಎ್​ ಆಧಾರಿತ ವೃತ್ತಿ ಶಿಕ್ಷಣ ಮಹತ್ವದ ಪಾತ್ರ ವಹಿಸುತ್ತಿದೆ. ಆದರೆ, ವಿಷಯ ಬೋಧನೆಗೆ ಕೌಶಲವಿರುವ ಶಿಕ್ಷಕರ ಕೊರತೆಯಿದ್ದು ಎಲ್ಲೆಡೆಯೂ ಅತಿಥಿ ಶಿಕ್ಷಕರಿಗೆ ಮೊರೆಹೋಗಲಾಗಿದೆ.
ಪ್ರಸ್ತುತ ಶಿಕ್ಷಣ ವ್ಯವಸ್ಥೆಯಲ್ಲಿ ವಿದ್ಯಾರ್ಥಿಗಳಿಗೆ ಸಾಂಪ್ರದಾಯಿಕ ಶೈಕ್ಷಣಿಕ ಸ್ಥಾನದ ಜತೆಗೆ ಭವಿಷ್ಯದ ಶಿಕ್ಷಣ, ಉದ್ಯೋಗ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಿಗೆ ಅಗತ್ಯವಿರುವ ಡಿಜಿಟಲ್​ ಸಾಕ್ಷರತೆ ತಾರ್ಕಿಕ ಚಿಂತನೆ ಸಮಸ್ಯೆ ಪರಿಹಾರ, ಸೃಜನಶೀಲತೆ, ಕೋಡಿಂಗ್​, ಕಂಪ್ಯೂಟರ್​ ಚಿಂತನ ಕೌಶಲ್ಯಾಧಾರಿತ ವಿವಿಧ ಕೌಶಲ್ಯಾಧಾರಿತ ವಿಷಯ, ಮಾಡ್ಯೂಲ್​ ಪರಿಚಯಿಸುವ ಕ್ರಮಗಳನ್ನು ಸರ್ಕಾರ ಕೈಗೊಂಡಿದೆ.
ವಿದ್ಯಾರ್ಥಿಗಳ ಭಾಷಾ ಸಾಮರ್ಥ್ಯ ಹಾಗೂ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಅಗತ್ಯವಿರುವ ಮೂಲಭೂತ ಶೈಕ್ಷಣಿಕ ಸಾಮರ್ಥ್ಯಗಳಿಗೆ ಯಾವುದೇ ರೀತಿಯ ಹಿನ್ನಡೆಯಾಗದಂತೆ ಕೈಗೊಳ್ಳುವ ಭರವಸೆಯನ್ನು ಶಿಕ್ಷಣ ಇಲಾಖೆ ನೀಡಿದೆ. ಎನ್​ಎಸ್​ಕ್ಯೂಎ್​ ಆಧಾರಿತ ವೃತ್ತಿ ಶಿಕ್ಷಣ ಇರುವ ಶಾಲೆಗಳ ವಿದ್ಯಾರ್ಥಿಗಳು ಪ್ರಥಮ ಮತ್ತು ದ್ವೀತಿಯ ಭಾಷೆಗಳನ್ನು ಕಡ್ಡಾಯವಾಗಿ ಅಭ್ಯಾಸ ಮಾಡಬೇಕಿದೆ.
ವಿದ್ಯಾರ್ಥಿಗಳಲ್ಲಿ ಭವಿಷ್ಯದ ತಂತ್ರಜ್ಞಾನ ಕೌಶಲಾಧಾರಿತ ಮತ್ತು ಸಾಮರ್ಥ್ಯಗಳನ್ನು ಬೆಳಸುವ ಉದ್ದೇಶದಿಂದ ಸಮಸ್ಯೆ ಪರಿಹಾರ, ತಾರ್ಕಿಕ ಚಿಂತನೆ, ಡಿಜಿಟಲ್​ ಸಾಕ್ಷರತ ಸೃಜನಶೀಲತೆ ಮತ್ತು ಸಂವಹನ ಕೌಶಲಗಳನ್ನು ಅಭಿವೃದ್ಧಿಪಡಿಸಲು ಶಿಕ್ಷಣ ಇಲಾಖೆ ಕ್ರಮವಹಿಸಿದೆ.
ವೃತ್ತಿ ಶಿಕ್ಷಣ ವಿದ್ಯಾರ್ಥಿಗಳ ಸಾಮಾನ್ಯ ಶೈಕ್ಷಣಿಕ ಕಲಿಕೆಗೆ ಪೂರಕವಾಗುವಂತೆ ಯಾವುದೇ ವಿಷಯಕ್ಕೆ ಧಕ್ಕೆ ಆಗದಂತೆ ಅನುಷ್ಠಾನಗೊಳಿಸಲಾಗಿದೆ. ವಿದ್ಯಾರ್ಥಿಗಳು ಭವಿಷ್ಯದಲ್ಲಿ ವಿವಿಧ ಸ್ಪರ್ಧಾತ್ಮಕ ಪರೀಕ್ಷೆಗಳು ಹಾಗೂ ಉನ್ನತ ಶಿಕ್ಷಣಕ್ಕೆ ಅಗತ್ಯವಿರುವ ಮೂಲಭೂತ ಭಾಷಾ ಶೈಕ್ಷಣಿಕ ಸಾಮರ್ಥ್ಯಗಳನ್ನು ಮುಂದುವರಿಸಿಕೊಂಡು ಹೋಗುವಂತೆ ಪಠ್ಯಕ್ರಮ ಮತ್ತು ಹಂತದ ಶೈಕ್ಷಣಿಕ ಚಟುವಟಿಕೆಗಳನ್ನು ರೂಪಿಸಲಾಗಿದೆ.
ಭಾಷಾ ಶಿಕ್ಷಣದ ಮಹತ್ವಕ್ಕೆ ಪೆಟ್ಟು!?
ತೃತೀಯ ಭಾಷೆಯ ಬದಲಾಗಿ ಎನ್​ಎಸ್​ಕ್ಯೂಎ್​ ಆಧಾರಿತ ವೃತ್ತಿ ಶಿಕ್ಷಣ ಬಹುತೇಕ ಶಾಲೆಗಳಲ್ಲಿ 9ನೇ ತರಗತಿಯಿಂದಲೇ ಆರಂಭವಾಗಿರುವ ಹಿನ್ನೆಲೆಯಲ್ಲಿ ಸರ್ಕಾರದ ಈ ನಿರ್ಧಾರ ಭಾಷಾ ಶಿಕ್ಷಣದ ಮಹತ್ವವನ್ನು ಕಡಿಮೆ ಮಾಡುವ ಅಥವಾ ಯಾವುದೇ ಭಾಷೆಯ ಮಹತ್ವ ರ್ನಿಲಸುವ ಸಾಧ್ಯತೆಯಿದೆ ಎಂದು ಕೆಲವು ಶಿಕ್ಷಣ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.
ಆದರೆ, ಸರ್ಕಾರ ವಿದ್ಯಾರ್ಥಿಗಳ ಭಾಷಾ ಹಾಗೂ ಮೂಲ ಶೈಕ್ಷಣಿಕ ಸಾಮರ್ಥ್ಯಗಳನ್ನು ಕಾಪಾಡಿಕೊಂಡು, ಅದರೊಂದಿಗೆ ಭವಿಷ್ಯದ ತಂತ್ರಜ್ಞಾನ, ಉನ್ನತ ಶಿಕ್ಷಣ ಮತ್ತು ಉದ್ಯೋಗ ಕ್ಷೇತ್ರಗಳಿಗೆ ಅಗತ್ಯವಿರುವ ಕೌಶಲಗಳನ್ನು ಒದಗಿಸುವುದು ಇದರ ಉದ್ದೇಶವಾಗಿದೆ ಎಂದು ಸ್ಪಷ್ಟಪಡಿಸಿದೆ.
2026-&27ನೇ ಶೈಕ್ಷಣಿಕ ವರ್ಷದಿಂದ 9ನೇ ತರಗತಿ ವಿದ್ಯಾರ್ಥಿಗಳಿಗೆ ಭವಿಷ್ಯದ ತಂತ್ರಜ್ಞಾನ ಮತ್ತು ಕೌಶಲ್ಯಾಧಾರಿತ ಸಾಮರ್ಥ್ಯಗಳನ್ನು ಬೆಳೆಸುವ ಉದ್ದೇಶದಿಂದ ಆರ್ಟಿಫಿಶಿಯಲ್​ ಇಂಟಲಿಜೆನ್ಸ್​ ಮತ್ತು ಕೌಶಲ ಶಿಕ್ಷಣ(ಎಐ) ವಿಷಯವನ್ನು ರಾಜ್ಯದ 1801 ಸರ್ಕಾರಿ ಶಾಲೆಗಳಲ್ಲಿ ಅನುಷ್ಟಾನಗೊಳಿಸಲಾಗಿದ್ದು ತುಮಕೂರು ಜಿಲ್ಲೆಯ 39 ಶಾಲೆಗಳಲ್ಲಿಯೂ ಆರಂಭಿಸಲಾಗಿದೆ. ದ್ವೀತಿಯ ಪಿಯು ವಿದ್ಯಾರ್ಥಿಗಳಿಗೂ ಎಐ ಆಯ್ಕೆ ಮಾಡಿಕೊಳ್ಳಲು ಅವಕಾಶ ನೀಡಲಾಗಿದೆ.
ಕೇಂದ್ರ ಶಿಕ್ಷಣ ಮಂತ್ರಾಲಯದ ರಾಷ್ಟ್ರೀಯ ಕೌಶಲ ಅರ್ಹತಾ ಮಾರ್ಗಸೂಚಿಗಳಂತೆ ರಾಜ್ಯದಲ್ಲಿ ಎನ್​ಎಸ್​ಕ್ಯೂಎ್​ ವೃತ್ತಿ ಶಿಕ್ಷಣ ಅನುಷ್ಠಾನಗೊಳಿಸಲಾಗಿದ್ದು ಅನುಮೋದನೆಗೊಂಡ ಆಯ್ದ ಶಾಲೆಗಳಲ್ಲಿ ಈಗಾಗಲೇ ಬೋಧಿಸಲಾಗುತ್ತಿದೆ. ಕೌಶಲ ಶಿಕ್ಷಣದಲ್ಲಿ ಎಐ ಬೋಧಿಸಲು ಸಂಬಂಧಿಸಿದಂತೆ ರಾಜ್ಯದ ಕೌಶಲ ಶಿಕ್ಷಣ ಕಾರ್ಯಕ್ರಮ, ಅನುಮೋದಿತ ಕೇಂದ್ರ ಶಿಕ್ಷಣ ಮಂತ್ರಾಲಯದ ಸಮಗ್ರ ಶಿಕ್ಷಣ ಯೋಜನಾ ಅನುಮೋದನಾ ಮಂಡಳಿ ನಡಾವಳಿ ಅನ್ವಯ ಮಾರ್ಗಸೂಚಿ ಹೊರಡಿಸಲಾಗಿದೆ.
ಎಸ್​.ಮಧುಬಂಗಾರಪ್ಪ
ಶಿಕ್ಷಣ ಸಚಿವ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net