ಸಮಾಜದಲ್ಲಿ ಶಾಂತಿ ನೆಮ್ಮದಿ ಉಳಿಯಲಿ

ತಾಲೂಕಿನ ಗೋಡೆಕೆರೆ ಚರಪಟ್ಟಾಧ್ಯಕ್ಷ ಶ್ರೀ ಮೃತ್ಯುಂಜಯ ಸ್ವಾಮೀಜಿ ಅವರ ಗುರುವಂದನಾ ಸಮಾರಂಭದಲ್ಲಿ ಸಾನ್ನಿಧ್ಯ ವಹಿಸಿ ಮಾತನಾಡಿದ ಅವರು, ಸಮಾಜದಲ್ಲಿ ಸಾಕ್ಷರತೆ ಅಭಿವೃದ್ಧಿಯಲ್ಲಿ ಮಠಮಾನ್ಯಗಳು ಪ್ರಮುಖ ಪಾತ್ರವಹಿಸಿದೆ. ಸ್ವಾತಂತ್ರ$್ಯ ನಂತರ ರಚನೆಯಾದ ಸಂವಿಧಾನಕ್ಕಿಂತ ಮೊದಲು ಬಸವಾದಿ ಶರಣರು ಅಸಮಾನತೆ ಮತ್ತು ಶೋಷಣೆಯನ್ನು ಖಂಡಿಸಿ ಆರೋಗ್ಯಕರ ಸಮಾಜ ನಿಮಾರ್ಣಕ್ಕೆ ಶ್ರಮಿಸಿದ್ದಾರೆ. ಅಲ್ಲಮಪ್ರಭು ಅವರ ಮಾರ್ಗದರ್ಶನದಲ್ಲಿ ಸಿದ್ಧರಾಮರು ನಡೆದರು. ಗೋಡೆಕೆರೆ ಕ್ಷೇತ್ರ ಸಿದ್ಧರಾಮರ ತಪಸ್ಸಿನ ಶಕ್ತಿಸ್ಥಳವಾಗಿದ್ದು, ಇಲ್ಲಿ ಚರಪಟ್ಟಾಧ್ಯಕ್ಷರಾದ ಮೃತ್ಯುಂಜಯ ಸ್ವಾಮೀಜಿಗಳು ಶರಣರ ತತ್ವ ಆದರ್ಶಗಳನ್ನು ರೂಢಿಸಿಕೊಂಡು ಕಾಯಕಯೋಗಿಯಾಗಿ ಸಮಾಜಕ್ಕೆ ಸೇವೆ ಸಲ್ಲಿಸುತ್ತಿದ್ದಾರೆ ಎಂದು ಬಣ್ಣಿಸಿದರು.

ಬಸವಣ್ಣರವರನ್ನ ಅನುಸರಿಸಿ ಮಠ ಮಾನ್ಯಗಳು ದಾಸೋಹ ಮತ್ತು ಧರ್ಮ ಚಿಂತನೆಗಳನ್ನ ನಡೆಸಿ ಹುಟ್ಟಿದ ಮನುಷ್ಯ ಮಾನವೀಯ ಮೌಲ್ಯಗಳನ್ನ ಬೆಳಿಸಿಕೊಂಡು ಸಮಾಜದಲ್ಲಿ ಶಾಂತಿ ನೆಮ್ಮದಿ ಉಳಿಯುವಂತಾಗಬೇಕು ಎಂದರು.

ಗೃಹಸಚಿವ ಡಾ.ಜಿ.ಪರಮೇಶ್ವರ ಶ್ರೀಮಠದ ಪರಿಚಯ ಪುಸ್ತಕ ಬಿಡುಗಡೆಗೊಳಿಸಿ ಮಾತನಾಡಿ, ಸಮಾಜದಲ್ಲಿ ಧಾರ್ಮಿಕ ಚಿಂತನೆಗಳು ಕಡಿಮೆ ಆಗಿರುವುದರಿಂದ ಮಾನವೀಯ ಮೌಲ್ಯಗಳು ನಶಿಸುತ್ತಿದೆ. ಸಮಾಜವನ್ನು ತಿದ್ದುವ ಶಕ್ತಿ ರಾಜಕಾರಿಣಿಗಳಿಗೆ ಇವುದಿಲ್ಲ. ಬದಲಾಗಿ ಮಠಾಧೀಶರಿಗೆ ಆ ಶಕ್ತಿ ಇದೆ. ವಿಜ್ಞಾನ ಬೆಳೆದಿದೆ. ಒಂದು ಕ್ಷಣಕ್ಕೆ ಧ್ವಂಸ ಮಾಡುವ ಶಕ್ತಿಯನ್ನು ವಿಜ್ಞಾನ ನೀಡುತ್ತದೆ. ಆದರೆ ವಿಜ್ಞಾನದಿಂದ ಲಾಭದಷ್ಟು ನಷ್ಟವೂ ಇದೆ. ಜ್ಞಾನದ ಸಂಪತ್ತು ಶಾಶ್ವತ ಫಲ ಕೊಡುತ್ತದೆ. ಅದನ್ನು ಗುರುವಿನಿಂದ ಸಂಸ್ಕಾರದ ರೂಪದಲ್ಲೆ ಪಡೆಯಬೇಕು. ದುಡಿಮೆಗೆ ನಿಜವಾಗಿಯು ಫಲವಿದೆ ಎಂಬುದನ್ನು 850 ವರ್ಷದ ಕಾಲದಲ್ಲಿ ಶರಣರು ಪ್ರತಿಪಾದಿಸಿದ್ದಾರೆ ಎಂದರು.

ಗೋಡೇಕೆರೆ ಸಿದ್ಧರಾಮೇಶ್ವರಸ್ವಾಮಿ ದೇವಾಲಯ ಮುಜರಾಯಿಗೆ ಸೇರಿದೆ. ಈಗಾಗಲೇ ರಾಜಗೋಪುರ ನಿಮಾರ್ಣಕ್ಕೆ 4 ಕೋಟಿ ಅನುದಾನ ಸರ್ಕಾರದಿಂದ ಸೇರಿದೆ. ಆದರೂ ಪರಿಪೂರ್ಣತೆಗಾಗಿ ಶ್ರೀಗಳು ಇನ್ನೂ 5 ಕೋಟಿ ಅನುದಾನ ಹಾಗೂ ಕಮಿಟಿ ರಚಿಸುವ ಬಗ್ಗೆ ಮನವಿ ಸಲ್ಲಿಸಿದ್ದಾರೆ. ಈ ನಿಟ್ಟಿನಲ್ಲಿ ನಾನು ಸರ್ಕಾರಕ್ಕೆ ಶಿಫಾರಸು ಮಾಡಿ ಹಣವನ್ನ ಮಂಜೂರು ಮಾಡಿಸುತ್ತೇನೆ ಎಂದು ಭರವಸೆ ನೀಡಿದರು.

ಗುರುವಂದನೆ ಸ್ವೀಕರಿಸಿ ಮಾತನಾಡಿದ ಶ್ರೀ ಮೃತ್ಯುಂಜಯ ದೇಶೀಕೇಂದ್ರ ಸ್ವಾಮೀಜಿ, ನಮಗೆ ಅನಾರೋಗ್ಯ ಉಂಟಾಗಿ ಜಿವಕ್ಕೆ ಕುತ್ತುಬಂದಿತ್ತು. ಮತ್ತೊಮ್ಮೆ ಕಿಡೆಗೇಡಿಯೋಬ್ಬ ನನ್ನನ್ನು ಕೊಲ್ಲಲು ಬಂದಿದ್ದ. ಆದರೆ ಸಿದ್ಧರಾಮರ ಶಕ್ತಿಯಿಂದ ಎರಡು ಬಾರಿ ಸಾವಿನಿಂದ ಪಾರಾಗಿದ್ದೇನೆ. ಇನ್ನು ಒಂದು ಕಂಟಕ ಇದೆ ಎಂದು ತಿಳಿದು ಬಂದಿದೆ. ಅದನ್ನು ಗೆದ್ದರೆ 105 ವರ್ಷ ಬದುಕುತ್ತೇನೆ ಎಂದ ಅವರು, ಬೆಳಗೊಂಬದಲ್ಲಿ ಅನ್ನದಾಸೋಹ ಪ್ರಾರಂಭಿಸುವ ಉದ್ದೇಶದಿಂದ 9 ಕೋಟಿ ಆಸ್ತಿಯನ್ನು ನನ್ನ ಹೆಸರಿಗೆ ಬರೆದಿದ್ದಾರೆ. ಅಲ್ಲಿ ನಿತ್ಯದಾಸೋಹವನ್ನು ಪ್ರಾರಂಭಿಸುತ್ತೇವೆ. ಸಿದ್ಧರಾಮರ ಭಕ್ತರು ಶ್ರೀಮಂತರು ಇದ್ದಾರೆ. ಕ್ಷೇತ್ರದಲ್ಲಿ 109 ಅಡಿ ಎತ್ತರದ ಗೋಪುರ ಪೂರ್ಣತೆಗೆ ಇನ್ನೂ 5 ಕೊಟಿ ರೂ. ಬೇಕಾಗಿದೆ. ಭಕ್ತರು ಕಾಣಿಕೆ ನೀಡಲು ಮಾಂದಾಗಿದ್ದಾರೆ. ಸುಮಾರು 2 ಕೋಟಿ ಹಣ ಭಕ್ತರಿಂದ ಬರುವ ಭರವಸೆ ಇದೆ. ಗುರುವಂದನಾ ಕಾರ್ಯಕ್ರಮಕ್ಕೆ ಭಕ್ತರೆ ಖರ್ಚು ಮಾಡಿ ಸೇವೆ ಸಲ್ಲಿಸಿದ್ದಾರೆ. ಇದು ಗುರು ಪರಂಪರೆಯಲ್ಲೊಂದು. ಇತಿಹಾಸವನ್ನು ಸೃಷ್ಟಿ ಮಾಡಿದೆ ಎಂದರು.

ಶಾಸಕ ಸಿ.ಬಿ.ಸುರೇಶ್​ ಬಾಬು ಮಾತನಾಡಿ, ದಾಸೋಹ ಮತ್ತು ವಿದ್ಯಾಭ್ಯಾಸಕ್ಕೆ ಶ್ರೀಮಠ ಹೆಚ್ಚು ಒತ್ತು ನೀಡಿದೆ. ಶ್ರೀಗಳು ತಮ್ಮ ಶ್ರಮದಲ್ಲಿ ಕೆಲಸ ಮಾಡುವ ಜತೆಗೆ ಭಕ್ತರ ಮನೆಗಳಿಗೆ ತೆರಳಿ ಇಷ್ಟಲಿಂಗ ಪೂಜೆ ನಡೆಸುತ್ತಿದ್ದಾರೆ. ಸಿದ್ಧರಾಮರ ತಪೋ ಕ್ಷೇತ್ರದಲ್ಲಿ ಮಹಿಮೆ ಇದೆ. ಕ್ಷೇತ್ರದ ಎರಡು ಮಠಗಳ ಅಭಿವೃದ್ಧಿಗೆ ನನ್ನ ಪಾಮಾಣಿಕ ಸೇವೆಯನ್ನು ಸಲ್ಲಿಸುತ್ತೇನೆ ಎಂದರು.

ಕರಡಿ ಮಠದ ಶ್ರೀ ಶಿವಶಂಕರ ಶಿವಯೋಗಿ ಸ್ವಾಮೀಜಿ ಪ್ರಾಸ್ಥಾವಿಕ ನುಡಿಗಳನ್ನಾಡಿದರು. ಕೆರೆಗೋಡಿ ರಂಗಾಪುರದ ಶ್ರೀ ಗುರುಪದೇಶೀಕೇಂದ್ರ ಸ್ವಾಮೀಜಿ, ತುಮಕೂರು ಶಾಸಕ ಜ್ಯೋತಿ ಗಣೇಶ್​, ತುಮಕೂರು ಗ್ರಾಮಂತರ ಶಾಸಕ ಸುರೇಶ್​ ಗೌಡ, ತಮ್ಮಡಿಹಳ್ಳಿ ವಿರಕ್ತ ಮಠದ ಅಭಿನವ ಡಾ.ಮಲ್ಲಿಕಾರ್ಜುನ ದೇಶೀಕೇಂದ್ರ ಸ್ವಾಮೀಜಿ, ಗುಬ್ಬಿ ಕ್ಷೇತ್ರದ ಬಿಜೆಪಿ ಮುಖಂಡ ದಿಲೀಪ್​ ಮಾತನಾಡಿದರು.