ಜಸ್ಟಿನಾಗೆ ತುಮಕೂರು ಓಪನ್

ತುಮಕೂರು: ಲಿಥುವೇನಿಯಾದ ಅಗ್ರಶ್ರೇಯಾಂಕಿತೆ ಜಸ್ಟಿನಾ ಮಿಕುಲ್​ಸ್ಕೆಟ್​ "ತುಮಕೂರು ಓಪನ್​' ಸಿಂಗಲ್ಸ್​ ಕಿರೀಟ ಮುಡಿಗೇರಿಸಿಕೊಂಡರು. ಇದು ಜಸ್ಟಿನಾಗೆ 8ನೇ ಸಿಂಗಲ್ಸ್​ ಪ್ರಶಸ್ತಿಯಾಗಿದೆ.

ಭುಜದ ಗಾಯದ ನೋವಿನಿಂದ ಬಳಲುತ್ತಿದ್ದ ಪೋಲೆಂಡ್​ನ ಎರಡನೇ ಶ್ರೇಯಾಂಕಿತೆ ಜುಝಾನ್ನಾ ಪಾವ್ಲಿಕೋವ್ಸ್ಕಾ ಗಾಯದಿಂದಾಗಿ ಪ್ರಶಸ್ತಿ ಸುತ್ತಿನಲ್ಲಿ ಕಣದಿಂದ ನಿವೃತ್ತಿ ಹೊಂದಿದ ಹಿನ್ನೆಲೆ ಜಸ್ಟಿನಾ ಐಟಿಎಫ್​ ವಿಶ್ವ ಮಹಿಳಾ ಟೆನಿಸ್​ ಚಾಂಪಿಯನ್​ಶಿಪ್​ (ಡಬ್ಲೂ35 ಟೂರ್ನಿ) ಸಿಂಗಲ್ಸ್​ ಪ್ರಶಸ್ತಿಯನ್ನು ಸುಲಭವಾಗಿ ಗೆದ್ದುಕೊಂಡರು.

ನಗರದ ವಿವಿ ಆವರಣದ ಜಿಲ್ಲಾ ಟೆನಿಸ್​ ಕ್ರೀಡಾಂಗಣದಲ್ಲಿ ಭಾನುವಾರ ಸಿಂಗಲ್ಸ್​ಫೈನಲ್​ನಲ್ಲಿ

ಜಸ್ಟಿನಾ ವಿರುದ್ಧ ಭುಜದ ಗಾಯದ ನೋವಿನಲ್ಲೇ ಆಡಲಿಳಿದ ಜುಝಾನ್ನಾಗೆ ಪ್ರೇಕ್ಷಕರಿಂದ ದೊಡ್ಡ ಕರತಾಡನದ ಸ್ವಾಗತ ದೊರೆಯಿತು. ಆರಂಭಿಕ ಸೆಟ್​ನಲ್ಲಿ 1-0ಯಲ್ಲಿದ್ದಾಗ ಮೊದಲ ಗೇಮ್​ ಬಳಿಕ ನೋವು ಉಲ್ಬಣಗೊಂಡು ಜುಝಾನ್ನಾ ಆಡಲು ಸಾಧ್ಯವಾಗದೆ ಹೋರಾಟದಿಂದ ಹಿಂದೆ ಸರಿದರು. ಪ್ರಶಸ್ತಿ ಸುತ್ತಿನ ಸೆಣಸಾಟ ಕಣ್ತುಂಬಿಕೊಳ್ಳಲು ಉತ್ತಮ ಸಂಖ್ಯೆಯಲ್ಲಿ ಬಂದಿದ್ದ ಪ್ರೇಕ್ಷಕರಿಗೆ ತೀವ್ರ ನಿರಾಸೆಯಾಯಿತು.

ಜುಝಾನ್ನಾ ಶನಿವಾರ ಸಂಜೆ ಡಬಲ್ಸ್​ ಫೈನಲ್ ನಲ್ಲಿ ಹೋರಾಟದಿಂದ ಹಿಂದೆ ಸರಿದಿದ್ದರು.

ಈ ಪ್ರಶಸ್ತಿಯು ಜಸ್ಟಿನಾಗೆ ಒಲಿದ 8ನೇ ಐಟಿಎಫ್​​ ಸಿಂಗಲ್ಸ್​ ಪ್ರಶಸ್ತಿಯಾಗಿದೆ. ಅಂತಾರಾಷ್ಟ್ರೀಯ ಸರ್ಕೂಟ್​ನಲ್ಲಿ ಪ್ರಭಾವಶಾಲಿ ಋತುವಿಗೆ ತುಮಕೂರು ಓಪನ್​ ಜಸ್ಟಿನಾ ಪಾಲಿಗೆ ಮತ್ತೊಂದು ಮೈಲಿಗಲ್ಲು. ಟ್ರೋಫಿ ಜತೆಗೆ ಲಿಥುವೇನಿಯಾದ ಜಸ್ಟಿನಾ 4,860 ಯುಎಸ್​ ಡಾಲರ್​ ಜೇಬಿಗೆ ಇಳಿಸಿಕೊಂಡರು. ಮತ್ತು 35 ಮೌಲ್ಯಯುತ ಡಬ್ಲೂಟಿಎ ಶ್ರೇಯಾಂಕ ಅಂಕಗಳನ್ನು ತಮ್ಮದಾಗಿಸಿಕೊಂಡರು.

ರನ್ನರ್​ ಅಪ್​ ಪಾವ್ಲಿಕೋವ್ಸ್ಕಾ ಟ್ರೋಫಿ ಜತೆಗೆ 2,637 ಯುಎಸ್​ ಡಾಲರ್​ ಪಡೆದರು. ರನ್ನರ್​ ಅಪ್​ ಶ್ರೇಯದಿಂದ 23 ಡಬ್ಲೂಟಿಎ ಅಂಕಗಳನ್ನು ಗಳಿಸಿದರು.

ಬಹಮಾನ ವಿತರಣೆ: ತುಮಕೂರು ಓಪನ್​ ಟ್ರೋಫಿ ಹಾಗೂ ಚೆಕ್​ ಅನ್ನು ಗೃಹ ಸಚಿವ ಡಾ.ಜಿ.ಪರಮೇಶ್ವರ ಹಾಗೂ ಸಿದ್ದಾರ್ಥ ಅಕಾಡೆಮಿ ಆ್​ ಹೈಯರ್​ ಎಜುಕೇಶನ್​ ಟ್ರಸ್ಟಿ ಕನ್ನಿಕಾಪರಮೇಶ್ವರಿ ವಿತರಿಸಿದರು. ಎಐಟಿಎ ಮತ್ತು ಕೆಎಸ್​ಎಲ್​ಟಿಎ ಗೌರವ ಜಂಟಿ ಕಾರ್ಯದರ್ಶಿ ಸುನಿಲ್​ ಯಜಮಾನ್​, ಜಿಲ್ಲಾಧಿಕಾರಿ ಶುಭಕಲ್ಯಾಣ್​, ಜಿಲ್ಲಾ ಪೊಲೀಸ್​ ಅಧೀಕ್ಷಕ ಕೆ.ವಿ.ಅಶೋಕ್​, ಜಿಪಂ ಸಿಇಒ ಬಿ.ವಿ.ಅಶ್ವಿಜ, ಪಾಲಿಕೆ ಆಯುಕ್ತೆ ಬಿ.ಶುಭ, ತಹಸೀಲ್ದಾರ್​ ರಾಜೇಶ್ವರಿ, ಜಿಲ್ಲಾ ಟೆನಿಸ್​ ಅಸೋಸಿಯೇಷನ್​ ಅಧ್ಯಕ್ಷ ಜಿ.ಆರ್​. ಅಮರನಾಥ್​, ಸುಪ್ರೀತ ಕಡವಿಗೆರೆ, ಕ್ರೀಡಾ ಮತ್ತು ಯುವ ಸಬಲೀಕರಣ ಇಲಾಖೆ ಸಹಾಯಕ ನಿರ್ದೇಶಕ ರೋಹಿತ್​ ಗಂಗಾಧರ್​ ಉಪಸ್ಥಿತರಿದ್ದರು.