ರೀಲ್ಸ್​ ಮಾಡಲು ಹೋಗಿ ಬೆಟ್ಟದಿಂದ ಜಾರಿಬಿದ್ದ ಉಪನ್ಯಾಸಕ !

ತಾಲೂಕಿನ ದೇವರಾಯದುರ್ಗ ಬೆಟ್ಟದಲ್ಲಿ ಭಾನುವಾರ ಬೆಳಗ್ಗೆ ಈ ಘಟನೆ ನಡೆದಿದೆ. 40 ಅಡಿ ಆಳಕ್ಕೆ ಬಿದ್ದು ಗಾಯಗೊಂಡಿದ್ದ ಉಪನ್ಯಾಸಕ ಶಿವಪ್ರಸಾದ್​ರನ್ನು ಸ್ಥಳೀಯರು, ಪ್ರವಾಸಿಗರು ರಕ್ಷಿಸಿದ್ದಾರೆ.

ತುಮಕೂರು ತಾಲೂಕು ಬುಗಡನಹಳ್ಳಿ ಬಳಿಯ ಬಳ್ಳಾಪುರ ಮೂಲದ ಶಿವಪ್ರಸಾದ್​ ಅರಸೀಕೆರೆ ಬಿಜಿಎಸ್​ ಪಿಯು ಕಾಲೇಜಿನಲ್ಲಿ ಉಪನ್ಯಾಸಕನಾಗಿದ್ದು ಭಾನುವಾರ ರಜೆ ಇದ್ದದ್ದರಿಂದ ದೇವರಾಯದುರ್ಗಕ್ಕೆ ಸ್ನೇಹಿತನೊಂದಿಗೆ ಸುಯೋರ್ದಯ ಕಣ್ತುಂಬಿಕೊಳ್ಳಲು ಬಂದಿದ್ದರು.

ಈ ವೇಳೆ ದೇವಾಲಯ ಹಿಂಭಾಗದ ಬಂಡೆ ತುದಿಯಲ್ಲಿ ನಿಂತು ಬೆಂಗಳೂರಿನ ಕೆಲವು ಟೆಕ್ಕಿಗಳಿಗೆ ದೇವರಾಯದುರ್ಗದ ಸೊಬಗನ್ನು ಇಂಗ್ಲೀಷ್​ನಲ್ಲಿ ವಿವರಿಸುತ್ತಾ ಮೊಬೈಲ್​ನಲ್ಲಿ ಸೆಲ್ಫಿ ವಿಡಿಯೋ ಮಾಡಿಕೊಳ್ಳುತ್ತಿದ್ದ ವೇಳೆ ಕಾಲು ಜಾರಿ ಬಿದ್ದಿದ್ದಾರೆ. 40 ಅಡಿಯಷ್ಟು ಆಳ ಇದ್ದು ಕೆಳಭಾಗದಲ್ಲಿ ಮರಗಳು, ಬೃಹತ್​ ಪೊದೆ ಇದ್ದು ಅದೃಷ್ಟವಶಾತ್​ ಯಾವುದೇ ತೀವ್ರತರವಾದ ಪೆಟ್ಟಾಗಲಿ, ಕೈಕಾಲು ಮುರಿದಿರಲಿಲ್ಲ.

ಸ್ಥಳೀಯರ ನೆರವು: ಸ್ಥಳೀಯರು, ಪ್ರವಾಸಿಗರು ತಕ್ಷಣವೇ ಕೆಳಗಿಳಿದು ಶಿವಪ್ರಸಾದ್​ರನ್ನು ರಸಿದ್ದು ಈ ವೇಳೆ ತೀವ್ರ ಗಾಬರಿಗೊಳಗಾಗಿದ್ದರು. ತಲೆಗೆ, ಮೈಕೈಗೆ ಸಣ್ಣಪುಟ್ಟ ಗಾಯಗಳಾಗಿದ್ದು ಸಾವರಿಸಿಕೊಂಡು ಎದ್ದು ಶಿವಪ್ರಸಾದ್​ ಸ್ಥಳೀಯರ ನೆರವಿನೊಂದಿಗೆ ನಡೆದುಕೊಂಡು ಮೇಲೆ ಬಂದರು. ನಂತರ ಆ್ಯಂಬುಲೆನ್ಸ್​ನಲ್ಲಿ ಆಸ್ಪತ್ರೆಗೆ ಕರೆತರಲಾಯಿತು.

ಕೈಕಾಲು, ಮೈಗೆ ತರಚಿದ ಗಾಯಗಳಾಗಿವೆ. ತಲೆಗು ಪೆಟ್ಟುಬಿದ್ದಿದ್ದು ಹೊಲಿಗೆ ಹಾಕಲಾಗಿದೆ. ಸಿದ್ದಗಂಗಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗಿದ್ದು ಚೇತರಿಸಿಕೊಂಡಿರುವ ಶಿವಪ್ರಸಾದ್​ ಆಘಾತದಿಂದ ಹೊರಬಂದಿದ್ದಾರೆ.