ಒಂಟಿ ವೃದ್ಧೆ ಕೊಲೆ, 24 ಗಂಟೆಯಲ್ಲಿ ಆರೋಪಿ ಸೆರೆ

ತುಮಕೂರು: ಒಂಟಿ ವೃದ್ಧೆ ಕೊಲೆಗೈದು ಚಿನ್ನಾಭರಣ ದರೋಡೆ ಪ್ರಕರಣಕ್ಕೆ ಸಂಬಂಧಿಸಿದಂತೆ 24 ಗಂಟೆಯೊಳಗೆ ಹುಲಿಯೂರುದುರ್ಗ ಪೊಲೀಸರು ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಕುಣಿಗಲ್​ ತಾಲೂಕಿನ ಹುಲಿಯೂರುದುರ್ಗ ಹೋಬಳಿ ಉಜ್ಜನಿ ಗ್ರಾಮದ ಗ್ರಾಪಂ ಮಾಜಿ ಅಧ್ಯಕ್ಷ ಮುತ್ತರಾಜ್​ (51) ಕೃತ್ಯ ಎಸಗಿದ್ದು ಸಾಲಗಾರರ ಕಾಟಕ್ಕೆ ವೃದ್ಧೆಯನ್ನು ಕೊಂದು ಚಿನ್ನಾಭರಣ ದೋಚಿದ್ದ ಎನ್ನಲಾಗಿದೆ. ಟನೆ ನಡೆದ 24 ಗಂಟೆಯೊಳಗೆ ಆರೋಪಿ ಮುತ್ತರಾಜ್​ನನ್ನು ಬಂಧಿಸಿ 4 ಚಿನ್ನದ ಬಳೆ, ಒಂದು ಜತೆ ಓಲೆ, ಮಾಂಗಲ್ಯ ಸರವನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಜಿಲ್ಲಾ ಪೊಲೀಸ್​ ಅಧೀಕ್ಷಕ ಕೆ.ವಿ.ಅಶೋಕ್​ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

ವೃದ್ಧೆ ಕೊಲೆ ಪ್ರಕರಣ: ಉಜ್ಜನಿ ಗ್ರಾಮದ ನಾಗಮ್ಮ ಎಂಬುವರನ್ನು ಸೋಮವಾರ ರಾತ್ರಿ ಉಸಿರುಗಟ್ಟಿಸಿ ಕೊಲೆಗೈದು ಚಿನ್ನಾಭರಣ ದೋಚಲಾಗಿತ್ತು. ಈ ಸಂಬಂಧ ಕೊಲೆ ಪ್ರಕರಣ ಬೆನ್ನತ್ತಿದ ಅಮೃತೂರು ಪೊಲೀಸರು ಬೋರೇಗೌಡನಕೊಪ್ಪಲಿನ ಗ್ರಾಪಂ ಮಾಜಿ ಅಧ್ಯಕ್ಷ ಮುತ್ತರಾಜ್​ನನ್ನು ಬಂಧಿಸಿ ವಿಚಾರಣೆಗೊಳಪಡಿಸಿದಾಗ ಕೊಲೆ ಪ್ರಕರಣ ಬಯಲಾಗಿದೆ. ನಾಗಮ್ಮನಿಂದ ಸಾಲ ಪಡೆದಿದ್ದು, ಅದನ್ನು ವಾಪಸ್​ ಕೊಡುವಂತೆ ಪದೇ ಪದೇ ಕೇಳುತ್ತಿದ್ದರಿಂದ ಮುತ್ತುರಾಜ್​ ಕೊಲೆಗೈದು ಚಿನ್ನಾಭರಣ ದೋಚಿದ್ದಾನೆ. ಮನೆಯಲ್ಲಿ ಆಕೆ ಒಂಟಿಯಾಗಿದ್ದಾಗ ಸೋಮವಾರ ರಾತ್ರಿ ವೇಳೆ ಹತ್ಯೆಗೈದು ಆಕೆಯ ಮೈಮೇಲಿದ್ದ ಚಿನ್ನದ ಮಾಂಗಲ್ಯ ಸರ, ಒಂದು ಜತೆ ಓಲೆ, 4 ಬಳೆಗಳನ್ನು ದೋಚಿದ್ದ.

ಎಸ್​ಪಿ ಕೆ.ವಿ.ಅಶೋಕ್​ ಮಾರ್ಗದರ್ಶನದಲ್ಲಿ ಎಎಸ್​ಪಿಗಳಾದ ಸಿ.ಗೋಪಾಲ್​, ಎಂ.ಎಲ್​. ಪುರುಷೋತ್ತಮ್​ ನೇತೃತ್ವದಲ್ಲಿ ಡಿವೈಎಸ್​ಪಿ ಓಂ ಪ್ರಕಾಶ್​ ಅವರನ್ನೊಳಗೊಂಡ ತಂಡ ಪ್ರಕರಣವನ್ನು ಬೇಧಿಸಿದ್ದು ತನಿಖೆ ಮುಂದುವರೆಸಿದೆ.