ವಿದ್ಯುತ್​ ತಿದ್ದುಪಡಿ ಕಾಯ್ದೆ ಹಿಂಪಡೆಯಲು ಆಗ್ರಹ

ನಗರದ ಜಿಲ್ಲಾಧಿಕಾರಿ ಕಚೇರಿ ಮುಂಭಾಗ ಗುರುವಾರ ರೈತ ಸಂಘದ ನೇತೃತ್ವದಲ್ಲಿ ನೂರಾರು ರೈತರು, ವಿದ್ಯುತ್ ಗುತ್ತಿಗೆದಾರರ ಸಂಘ, ವಿದ್ಯುತ್ ಬಕೆದಾರರ ಸಂಘದ ಪದಾಧಿಕಾರಿಗಳು ಪ್ರತಿಭಟನೆಯಲ್ಲಿ ಪಾಲ್ಗೊಂಡು ಸರ್ಕಾರದ ಕ್ರಮವನ್ನು ವಿರೋಧಿಸಿದ್ದಲ್ಲೆ ವಿದ್ಯುತ್​ ಖಾಸಗೀಕರಣ ಹುನ್ನಾರ ಕೈಬಿಡುವಂತೆ ಘೋಷಣೆಗಳನ್ನು ಕೂಗಿದರು.

ಪ್ರತಿಭಟನಾನಿರತರನ್ನು ಉದ್ದೇಶಿಸಿ ಮಾತನಾಡಿದ ರೈತ ಸಂಘದ ಜಿಲ್ಲಾಧ್ಯಕ್ಷ ಎ.ಗೋವಿಂದರಾಜು, ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಜನರ ಹಿತವನ್ನು ಮರೆತು ಲಾಂತರ ಕೋಟಿ ರೂ., ಬೆಲೆ ಬಾಳುವ ವಿದ್ಯುತ್​ ಇಲಾಖೆಯನ್ನು ಖಾಸಗೀಕರಣ ಮಾಡಲು ಹೊರಟಿದೆ. ಇದರಿಂದ ರೈತರು ವಿದ್ಯುತ್​ ಬಿಲ್​ ಕಟ್ಟಲಾಗದೆ ಆತ್ಮಹತ್ಯೆಯ ದಾರಿ ತುಳಿಯಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಲಿದೆ. ಅಲ್ಲದೆ ಮನೆ ಬಳಕೆಯ ವಿದ್ಯುತ್​ಗೆ ಮನಬಂದಂತೆ ಬೆಲೆ ಹೆಚ್ಚಳ ಮಾಡಿ,ಶೋಷಣೆಗೆ ಒಳಪಡಿಸುವ ನಿದರ್ಶನಗಳು ನಮ್ಮ ಕಣ್ಮುಂದೆ ಇವೆ. ಹಾಗಾಗಿ, ಸರ್ಕಾರ ವಿದ್ಯುತ್​ ನಿರ್ವಹಣೆಯನ್ನು ಖಾಸಗಿಯವರಿಗೆ ವಹಿಸುವ ಕ್ರಮದಿಂದ ಹಿಂದೆ ಸರಿಯಬೇಕು. ಇಲ್ಲದಿದ್ದಲ್ಲಿ ಇಡೀ ರಾಜ್ಯದ ರೈತರು ಬೀದಿಗಿಳಿದು ಹೋರಾಟ ಮಾಡಬೇಕಾಗುತ್ತದೆ ಎಂದು ಎಚ್ಚರಿಸಿದರು.

ಈ ಹಿಂದೆ ಸಾವಿರ ದಿನಕ್ಕು ಹೆಚ್ಚು ಕಾಲ ರೈತರ ಹೋರಾಟಕ್ಕೆ ಮಣಿದ ಕೇಂದ್ರ ಸರ್ಕಾರ 2019ರಲ್ಲಿ ಜಾರಿಗೆ ತರಲು ಹೊರಟಿದ್ದ ರೈತ ವಿರೋಧಿ ಕಾಯ್ದೆಗಳನ್ನು ಕೈಬಿಟ್ಟಿತ್ತು. ಆದರೆ, ವಿದ್ಯುತ್​ ಖಾಸಗಿ ಕಾಯ್ದೆ ಹಿಂಪಡೆದಿರಲಿಲ್ಲ. ಮತ್ತೆ ಸಂಸತ್ತಿನಲ್ಲಿ ವಿದ್ಯುತ್​ ಖಾಸಗೀಕರಣ ತಿದ್ದುಪಡಿ ಕಾಯ್ದೆ ಮಂಡಿಸುವ ಮೂಲಕ ಜನರಿಗೆ ಬರೆ ಎಳೆಯಲು ಹೊರಟಿದೆ. ಕೃಷಿ ಬಂಡವಾಳ ಹೆಚ್ಚಾಗಿ ರೈತರು ಪರದಾಡುತ್ತಿರುವ ಕಾಲದಲ್ಲಿ ಐಪಿ ಸೆಟ್​ಗಳಿಗೆ ಸ್ಮಾರ್ಟ್​ ಮೀಟರ್​ ಅಳವಡಿಸಿ ಮತ್ತಷ್ಟು ಹೊರೆಹೊರಿಸಿ ಕೃಷಿಯಿಂದ ವಿಮುಖಾಗಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಲಿದೆ. ಹಾಗಾಗಿ ಸರ್ಕಾರ ಕೂಡಲೇ ಸಂಸತ್ತಿನಲ್ಲಿ ಮಂಡಿಸಿರುವ ಬಿಲ್​ ಹಿಂಪಡೆಯಬೇಕು. ಹಾಗೆಯೇ 19 ಜಿಲ್ಲೆಗಳಲ್ಲಿರುವ ಚೆಸ್ಕಾಂ ನಿರ್ವಹಣೆಯನ್ನು ಟಾಟಾ ಪವರ್​ ಕಂಪನಿಗೆ ವಹಿಸಲು ಮುಂದಾಗಿರುವುದರಿಂದ ಹಿಂದೆ ಸರಿಯುವಂತೆ ಒತ್ತಾಯಿಸಿದರು.

ರೈತ ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಜಿ.ಸಿ.ಶಂಕರಪ್ಪ ಮಾತನಾಡಿ, ಸರ್ಕಾರ ರಾಜ್ಯದ ಜನರ ತೆರಿಗೆ ಹಣದಲ್ಲಿ ಸುಮಾರು 5.50 ಲಕ್ಷ ಕೋಟಿ ರೂ.,ಗಳ ಮೌಲ್ಯ ಆಸ್ತಿ ಹೊಂದಿರುವ ವಿದ್ಯುತ್​ ಇಲಾಖೆಯನ್ನು ಕಟ್ಟಿದೆ. ಹಗಲಿರುಳು ಬೆವರು ಸುರಿಸಿ, ಚಳಿ, ಮಳೆ ಎನ್ನದೆ ನಿರ್ವಹಣೆ ಮಾಡಿ ರೈತರಿಗೆ, ಜನರಿಗೆ ಸೇವೆ ಒದಗಿಸುತ್ತಿದ್ದಾರೆ. ಈಗ ಸರ್ಕಾರ ಮೈಸೂರು ಸೇರಿದಂತೆ 19 ಜಿಲ್ಲೆಗಳಲ್ಲಿರುವ ಚೆಸ್ಕಾಂ ನಿರ್ವಹಣೆಯನ್ನು ಟಾಟಾ ಪವರ್​ ಲಿಮಿಟೆಡ್​ಗೆ ನೀಡಲು ಮುಂದಾಗಿದೆ. ಇದಕ್ಕೆ ಎಂದಿಗೂ ರೈತ ಸಂ ಅವಕಾಶ ನೀಡುವುದಿಲ್ಲ. ಒಮ್ಮೆ ಖಾಸಗಿಯವರ ನಿರ್ವಹಣೆಗೆ ಹೋದರೆ ವಿದ್ಯುತ ದರ ಹೆಚ್ಚಳದ ಜತೆಗೆ, ರೈತರ ಪಂಪ್​ ಸೆಟ್​ಗಳಿಗೆ ಸ್ಮಾರ್ಟ್​ ಮೀಟರ್​ ಅಳವಡಿಸಿ, ದುಪ್ಪಟ್ಟು ದರ ವಿಧಿಸುವುದು ಖಂಡಿತ. ಅಲ್ಲದೆ, ಸರ್ಕಾರದ ವಿವಿಧ ಉಚಿತ ಯೋಜನೆಗಳು ನೆಲಕಚ್ಚಲಿವೆ ಎಂದರು.

ವಿದ್ಯುತ್​ ಗುತ್ತಿಗೆದಾರರ ಸಂಘದ ಜಿಲ್ಲಾಧ್ಯಕ್ಷ ಶ್ರೀನಿವಾಸ್​ ಮಾತನಾಡಿ, ರಾಜ್ಯದಲ್ಲಿ 32 ಸಾವಿರ ವಿದ್ಯುತ್​ ಗುತ್ತಿಗೆದಾರರು ಬಳಕೆದಾರರ ಅಗತ್ಯಕ್ಕೆ ಅನುಗುಣವಾಗಿ ಸೇವೆ ಒದಗಿಸುತ್ತಾ ಬಂದಿದ್ದಾರೆ. ಒಂದು ವೇಳೆ ಖಾಸಗಿಯರ ನಿರ್ವಹಣೆಗೆ ವಹಿಸಿದರೆ 32 ಸಾವಿರ ಕುಟುಂಬಗಳು ಬೀದಿಗೆ ಬೀಳಲಿವೆ. ಹಾಗೆಯೇ ವಿದ್ಯುತ್​ ಇಲಾಖೆಯಲ್ಲಿ ಕೆಲ ಮಾಡುವ ನೌಕರರು ಸಹ ಅತಿ ಕಡಿಮೆ ವೇತನಕ್ಕೆ ಖಾಸಗಿಯರ ಬಳಿ ಗುಲಾಮಂತೆ ಕೆಲ ಮಾಡಬೇಕಾಗುತ್ತದೆ. ಹಾಗಾಗಿ, ವಿದ್ಯುತ್​ ಖಾಸಗೀಕರಣಕ್ಕೆ ಸರ್ಕಾರ ಎಂದಿಗೂ ಅವಕಾಶ ನೀಡಬಾರದು ಎಂದು ಒತ್ತಾಯಿಸಿದರು.

ಈ ಸಂಬಂಧ ಮನವಿಯನ್ನು ಜಿಲ್ಲಾಧಿಕಾರಿ ಶುಭಕಲ್ಯಾಣ್​ ಮೂಲಕ ರಾಜ್ಯ ಸರ್ಕಾರಕ್ಕೆ ಸಲ್ಲಿಸಲಾಯಿತು.

ಪ್ರತಿಭಟನೆಯಲ್ಲಿ ತುಮಕೂರು ತಾಲೂಕು ಅಧ್ಯಕ್ಷ ಚಿಕ್ಕಬೋರೇಗೌಡ, ಪ್ರಧಾನ ಕಾರ್ಯದರ್ಶಿ ತಿಮ್ಮೇಗೌಡ, ದೊಡ್ಡ ಮಲ್ಲಯ್ಯ, ಎಚ್​.ಸಿ.ನಾಗೇಶ್​, ಈಶ್ವರಯ್ಯ, ಭಾನುಪ್ರಕಾಶ್​, ರಂಗಸ್ವಾಮಯ್ಯ, ಕೆ.ಎಚ್​.ರಂಗಯ್ಯ, ಉದಯಕುಮಾರ್​ ನಂದಿಹಳ್ಳಿ, ಕೊರಟಗೆರೆ ಶಬ್ಬೀರ್​ ಪಾಷ, ಗುಬ್ಬಿ ಲೋಕೇಶ್​ ಸೇರಿದಂತೆ ಹಲವರು ಪಾಲ್ಗೊಂಡಿದ್ದರು.