ಸರ್ಕಾರಿ ಶಾಲೆಗೂ ಬಂತು ಡಿಮ್ಯಾಂಡ್

ತುಮಕೂರು: ಲಕ್ಷ ಲಕ್ಷ ಡೋನೆಶನ್​ ಪಡೆಯುವ ಯಾವ ಶಾಲೆಗಿಂತ ಕಡಿಮೆ ಇಲ್ಲ ಈ ಸರ್ಕಾರಿ ಶಾಲೆ. ತುಮಕೂರಿನ ಶಿರಾಗೇಟ್​ನ ಉತ್ತರ ಬಡಾವಣೆಯ ಒಂಭತ್ತು ದಶಕಗಳ ಸರ್ಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಗೆ ಇಂಜಿನಿಯರಿಂಗ್​, ಮೆಡಿಕಲ್​ ಕಾಲೇಜುಗಳನ್ನು ಮೀರಿಸುವಂತೆ ಹೈಟೆಕ್​ ಸ್ಪರ್ಶ ನೀಡಲಾಗಿದೆ. ಅಜಾಕ್ಸ್​ ಇಂಜಿನಿಯರಿಂಗ್​ ಚಾರಿಟಬಲ್​ ಟ್ರಸ್ಟ್​ ವತಿಯಿಂದ ಕಾಪೋರ್ರೇಟ್​ ಸಾಮಾಜಿಕ ಹೊಣೆಗಾರಿಕೆ (ಸಿಎಸ್​ಆರ್​) ಅಡಿ 16 ಕೋಟಿ. ರೂ., ವೆಚ್ಚದಲ್ಲಿ ಪುನರ್​ ನಿರ್ಮಾಣಗೊಂಡಿರುವ ಈ ಶಾಲೆ ದಾಖಲಾತಿಗೆ ಡಿಮ್ಯಾಂಡ್​ ಸೃಷ್ಟಿಯಾಗಿದೆ.

1 ರಿಂದ 9ನೇ ತರಗತಿವರೆಗೆ ಬರೋಬ್ಬರಿ 1 ಸಾವಿರ ಮಕ್ಕಳಿದ್ದು ಇನ್ನೂ ಶಾಲೆ ದಾಖಲಾತಾಗಿದೆ ಬೇಡಿಕೆ ಇದೆ. ಶಿಕ್ಷಕರ ಕೊರತೆ ಉಂಟಾಗುವ ಕಾರಣಕ್ಕೆ ಸದ್ಯಕ್ಕೆ ಮಕ್ಕಳ ದಾಖಲೆಗೆ ಬ್ರೇಕ್​ ಹಾಕಲಾಗಿದೆ. ಕರ್ನಾಟಕ ಪಬ್ಲಿಕ್​ ಶಾಲೆ(ಕೆಪಿಎಸ್​)ಯಾಗಿ ಉನ್ನತಿಕರಿಸಲಾಗಿದ್ದು ಕನ್ನಡ ಮತ್ತು ಇಂಗ್ಲೀಷ್​ ಮಾಧ್ಯಮ ಒಳಗೊಂಡಿರುವ ಈ ಶಾಲೆಗೆ 15 ಕಿ.ಮೀ., ದೂರದಿಂದ ಮಕ್ಕಳು ಕಲಿಯಲು ಬರುತ್ತಿರುವುದು ಒಳ್ಳೆಯ ಬೆಳವಣಿಗೆ ಎನಿಸಿದೆ.

ಸ್ವಾತಂತ್ರ್ಯಪೂರ್ವ ಶಾಲೆ: ನಗರದ ಶಿರಾಗೇಟ್​ ಉತ್ತರಬಡಾವಣೆಯಲ್ಲಿ 1939ರಲ್ಲಿ ಶಾಲೆ ಆರಂಭವಾಗಿದ್ದು ಇತ್ತೀಚಿನವರೆಗೆ 1 ರಿಂದ 7ನೇ ತರಗತಿವರೆಗೆ 280 ಮಕ್ಕಳು ಕಲಿಯುತ್ತಿದ್ದರು. ಸುತ್ತಮುತ್ತ ಕಾನ್ವೆಂಟ್​ ಶಾಲೆಗಳ ಹಾವಳಿಯಿಂದ ವರ್ಷದಿಂದ ವರ್ಷಕ್ಕೆ ಮಕ್ಕಳ ಸಂಖ್ಯೆ ಇಳಿಮುಖವಾಗಿತ್ತು. ಇಂತಹ ಸಂದರ್ಭದಲ್ಲಿ ಹಳೇ ವಿದ್ಯಾರ್ಥಿಗಳ ಸಂ ಈ ಶಾಲೆಯನ್ನು ದತ್ತು ತೆಗೆದುಕೊಂಡು ಸರ್ಕಾರಿ ಶಾಲೆ ಉಳಿಸುವ ಸಂಕಲ್ಪ ತೊಟ್ಟಿತು.

5ವರ್ಷಗಳ ಹಿಂದೆ ಎಲ್​ಕೆಜಿ, ಯುಕೆಜಿ ಪ್ರಾರಂಭಿಸಿ ಬಡಮಕ್ಕಳು ಇಂಗ್ಲೀಷ್​ ಮಾಧ್ಯಮದಲ್ಲಿ ಕಲಿಯುವ ಅವಕಾಶವನ್ನು ಕಲ್ಪಿಸಿತು. ಆದರೆ, ಶಿಥಿಲಗೊಂಡಿದ್ದ ಶಾಲೆಯತ್ತ ಪೋಷಕರು ಮುಖಮಾಡಲು ಹಿಂದೇಟು ಹಾಕುತ್ತಿದ್ದರು. ಇದನ್ನು ಮನಗೊಂಡ ಹಳೇ ವಿದ್ಯಾರ್ಥಿ ಸಂದ ಸರ್ಕಾರದ ನೆರವು ಪಡೆಯಲು ಮುಂದಾಯಿತಾದರೂ ಅದು ಕೈಗೂಡಲಿಲ್ಲ. ಈ ಹಿಂದೆ ವಿವೇಕ ಯೋಜನೆ ಅಡಿ 4 ಕೊಠಡಿಗಳ ನಿರ್ಮಾಣಕ್ಕೆ ಮಾತ್ರ ಅನುದಾನ ಸಿಕ್ಕಿತು. ಅಷ್ಟರಲ್ಲಿ ಚಿಕ್ಕಬಳ್ಳಾಪುರದ ಅಜಾಕ್ಸ್​ ಇಂಜಿನಿಯರಿಂಗ್​ ಚಾರಿಟಬಲ್​ ಟ್ರಸ್ಟ್​ ತನ್ನ ಸಿಎಸ್​ಆರ್​ ನಿಧಿಯಡಿ ಶಾಲೆ ಪುನರ್​ ನಿರ್ಮಾಣಕ್ಕೆ ನೆರವು ಕೊಡುವುದಾಗಿ ಮುಂದೆ ಬಂತು. ಈಗ ಶಾಲೆ ಚಿತ್ರಣ ಸಂಪೂರ್ಣವಾಗಿ ಬದಲಾಗಿದೆ. ಕಾನ್ವೆಂಟ್​ ಶಾಲಾ-ಕಾಲೇಜನ್ನೇ ಬದಿಗಿರಿಸುವಂತೆ ಸರ್ಕಾರಿ ಶಾಲೆ ತಲೆಎತ್ತಿ ನಿಂತಿದೆ.

16 ಕೋಟಿ 52 ಕೊಠಡಿಗಳು: ಕರ್ನಾಟಕ ಪಬ್ಲಿಕ್​ ಸ್ಕೂಲ್​ ಉನ್ನತಿಕರಣಗೊಂಡ ಹಿನ್ನೆಲೆ ಎಲ್​ಕೆಜಿ ಯಿಂದ ಪಿಯುಸಿವರೆಗೆ ಗಮನದಲ್ಲಿಟ್ಟುಕೊಂಡು ಅಜಾಕ್ಸ್​ ಇಂಜಿನಿಯರಿಂಗ್​ ಚಾರಿಟಬಲ್​ ಟ್ರಸ್ಟ್​ 16 ಕೋಟಿ ರೂ., ವೆಚ್ಚದಲ್ಲಿ ಈ ಶಾಲೆ ಪುನರ್​ ನಿರ್ಮಾಣಕ್ಕೆ ಯೋಜನೆ ರೂಪಿಸಿತು. ಕಳೆದ ವರ್ಷ ಜೂನಲ್ಲಿ ಶಾಲೆ ನಿರ್ಮಾಣಕ್ಕೆ ಶಂಕುಸ್ಥಾಪನೆ ನೆರವೇರಿಸಿದ್ದು 11 ತಿಂಗಳಲ್ಲಿ ಕಟ್ಟಡ ನಿರ್ಮಾಣ ಕಾರ್ಯ ಪೂರ್ಣಗೊಂಡಿದೆ. ನೆಲ ಅಂತಸ್ತು ಹಾಗೂ ಎರಡೂ ಮಹಡಿಗಳಲ್ಲಿ 52 ಕೊಠಡಿಗಳು ನಿರ್ಮಿಸಿದ್ದು ಕಲಿಕಾಕೊಠಡಿಗಳು, ಕಂಪ್ಯೂಟರ್​ ಲ್ಯಾಬ್​, ಭೌತಶಾಸ್ತ್ರ, ರಸಾಯನಶಾಸ್ತ್ರ ಪ್ರಯೋಗಾಲಯಗಳು, ಗ್ರಂಥಾಲಯ ಅಲ್ಲದೆ, ಸ್ಮಾರ್ಟ್​ ಕ್ಲಾಸ್​ಗಳನ್ನು ಸಹ ನಿರ್ಮಿಸಲಾಗಿದೆ. ಪ್ರತಿ ಮಹಡಿಯಲ್ಲಿ ಹೆಣ್ಣ ಹಾಗೂ ಗಂಡು ಮಕ್ಕಳಿಗೆ ಪ್ರತ್ಯೇಕ ಹೈಟೆಕ್​ ಶೌಚಾಗೃಹಗಳನ್ನು ಸಹ ನಿರ್ಮಿಸಲಾಗಿದೆ. ಸದ್ಯಕ್ಕೆ ನೆಲ ಹಾಗೂ ಮೊದಲ ಮಹಡಿ ಕೊಠಡಿಗಳು ಬಳಕೆಗೆ ಪೂರ್ಣವಾಗಿ ಸಿದ್ಧವಾಗಿದ್ದು ಎಲ್​ಕೆಜಿಯಿಂದ 9ನೇ ತರಗತಿಗಳನ್ನು ನಡೆಸಲಾಗುತ್ತಿದೆ. ಮುಂದಿನ ವರ್ಷ ಪಿಯುಸಿ ಆರಂಭವಾಗಲಿದೆ.