ನನಸಾಗದ ಸಿಎಂ 2ನೇ ಬಾರಿ ಡಿಸಿಎಂ

ತುಮಕೂರು: ಕಾಂಗ್ರೆಸ್​ ಪಕ್ಷದ ಶಿಸ್ತಿನ ಸಿಪಾಯಿ, ಸಜ್ಜನ ರಾಜಕಾರಣಿ ಡಾ.ಜಿ.ಪರಮೇಶ್ವರ್​ಗೆ ಮತ್ತೊಮ್ಮೆ ಉಪಮುಖ್ಯಮಂತ್ರಿ ಸ್ಥಾನ ಒಲಿದುಬಂದಿದೆ. ಮುಖ್ಯಮಂತ್ರಿ ಪಟ್ಟದ ಕನಸು ಕೈಗೂಡದಿದ್ದರೂ ಪಕ್ಷ ನಿಷ್ಠೆ ಪರಂಗೆ ಸರ್ಕಾರದಲ್ಲಿ ಉನ್ನತ ಸ್ಥಾನ ತಂದುಕೊಟ್ಟಿದೆ. ಜೆಡಿಎಸ್​ - ಕಾಂಗ್ರೆಸ್​ ಸಮ್ಮಿಶ್ರ ಸರ್ಕಾರದಲ್ಲಿ 14 ತಿಂಗಳು ಡಿಸಿಎಂ ಹುದ್ದೆ ನಿರ್ವಹಿಸಿದ್ದ ಪರಮೇಶ್ವರ್​ 6 ಬಾರಿ ಸಚಿವರಾಗಿ ಸಮರ್ಥವಾಗಿ ಕಾರ್ಯನಿರ್ವಹಿಸಿದ್ದರು.

ಆಸ್ಟ್ರೆಲಿಯಾದ ಅಡಿಲೇಡ್​ ಕೃಷಿ ವಿವಿಯ ಪಿಎಚ್​ಡಿ ಪದವೀಧರರಾದ ಡಾ.ಜಿ.ಪರಮೇಶ್ವರ್​ ರಾಜಕೀಯ ಪ್ರವೇಶವೇ "ಆಕಸ್ಮಿಕ'. ಶಿಕ್ಷಣ ಭೀಷ್ಮ ದಿವಂಗತ ಡಾ.ಎಚ್​.ಎಂ.ಗಂಗಾಧರಯ್ಯ ಒಡೆತನದ ಸಿದ್ದಾರ್ಥ ಶಿಕ್ಷಣ ಸಂಸ್ಥೆಯ ವೈದ್ಯಕಿಯ ಕಾಲೇಜಿನ ಸಂಸ್ಥಾಪನ ದಿನದ ಕಾರ್ಯಕ್ರಮಕ್ಕೆ 1989ರಲ್ಲಿ ಆಗಮಿಸಿದ್ದ ಅಂದಿನ ಪ್ರಧಾನಿ ರಾಜೀವ್​ಗಾಂಧಿ ಕಣ್ಣಿಗೆ ಬಿದ್ದಿದ್ದ ಪರಮೇಶ್ವರ್​ರನ್ನು ರಾಜಕೀಯಕ್ಕೆ ಬರುವಂತೆ ಆಹ್ವಾನಿಸಿದ್ದರು. ರಾಜೀವ್​ ನೀಲಿಗಣ್ಣಿನ ಹುಡಗನೆನಿಸಿದ್ದರು. ಕೃಷಿ, ಶಿಕ್ಷಣ ಕ್ಷೇತ್ರದಲ್ಲಿ ಉನ್ನತ ಸಾಧನೆ ಮಾಡಬೇಕೆಂಬ ಕನಸು ಕಾಣುತ್ತಿದ್ದ ಯವಕ ರಾಜಕೀಯ ಕ್ಷೇತ್ರದಲ್ಲಿ "ಕೃಷಿ'ಗಿಳಿದರು.

1989ರಲ್ಲಿ ರಾಜಕೀಯ ಇನ್ನಿಂಗ್ಸ್​: ದಿವಂಗತ ಪ್ರಧಾನಿ ರಾಜೀವ್​ಗಾಂಧಿ ನೀಲಿಕಣ್ಣಿನ ಹುಡುಗ ಜಿ.ಪರಮೇಶ್ವರ್​ 1989ರಲ್ಲಿ ಮಧುಗಿರಿ ಮೀಸಲು ಕ್ಷೇತ್ರದಿಂದ ಮೊದಲ ಬಾರಿ ಸ್ಪರ್ಧಿಸಿ ಶಕ್ತಿಸೌಧ ಪ್ರವೇಶಿಸಿದರು. ಆ ನಂತರ ಅವರು ರಾಜಕಾರಣದಲ್ಲಿ ಹಿಂದಿರುಗಿ ನೋಡಿದ್ದೇ ಇಲ್ಲ.

1999 ಹಾಗೂ 2004ರಲ್ಲಿ ಮಧುಗಿರಿಯಿಂದಲೇ ಮರು ಆಯ್ಕೆಯಾದ ಪರಮೇಶ್ವರ್​ ಕ್ಷೇತ್ರ ಮರುವಿಂಗಡಣೆ ಬಳಿಕ 2008ರಲ್ಲಿ ಕೊರಟಗೆರೆ ಕ್ಷೇತ್ರದತ್ತ ಮುಖಮಾಡಿ ಮತ್ತೆ ವಿಧಾನಸಭೆ ಪ್ರವೇಶಿಸಿದರು. 2010ರಲ್ಲಿ ಪಕ್ಷದ ಸಾರಥ್ಯ ವಹಿಸಿದ ಪರಮೇಶ್ವರ್​ 2013ರಲ್ಲಿ ಪಕ್ಷವನ್ನು ಅಧಿಕಾರಕ್ಕೆ ತರುವಲ್ಲಿ ಪ್ರಮುಖಪಾತ್ರವಹಿಸಿದರಾದರೂ ಹಿತಶತೃಗಳಿಂದ ಸ್ವಕ್ಷೇತ್ರದಲ್ಲಿ ಸೋಲುಕಂಡರು. ಅಂದು ಪರಮೇಶ್ವರ್​ ಸಿಎಂ ಹುದ್ದೆ ಕನಸು ಭಗ್ನಗೊಂಡಿತ್ತು. ಆನಂತರ 2014ರಲ್ಲಿ ಎಂಎಲ್ಸಿ ಆಗಿ ವರ್ಷದ ಬಳಿಕ ಸಿದ್ದರಾಮಯ್ಯ ಸಂಪುಟ ಸೇರ್ಪಡೆಗೊಂಡರು. ಗೃಹಸಚಿವ ಸ್ಥಾನ ಹೊಣೆಹೊತ್ತುಕೊಂಡರು.

2018ರಲ್ಲಿ ಮತ್ತೆ ರಾಜ್ಯದಲ್ಲಿ ಕಾಂಗ್ರೆಸ್​ ಪಕ್ಷವನ್ನು ಅಧಿಕಾರಕ್ಕೆ ತರುವ ಮೂಲಕ ಉನ್ನತ ಹುದ್ದೆಗೇರುವ ಕನಸು ಪರಮೇಶ್ವರದ್ದಾಗಿತ್ತು. ಆದರೆ, ಈ ಬಾರಿ ಪರಂ ಗೆದ್ದರು ಪಕ್ಷ ಬಹುಮತ ಪಡೆಯುವಲ್ಲಿ ಎಡವಿತು. ಅಂದು ಜೆಡಿಎಸ್​-ಕಾಂಗ್ರೆಸ್​ ಸಮ್ಮಿಶ್ರ ಸರ್ಕಾರ ಅಸ್ತಿತ್ವಕ್ಕೆ ಬಂದು ಡಿಸಿಎಂ ಸ್ಥಾನಕ್ಕೇರಿದರು. ಆ ಮೂಲಕ ಜಿಲ್ಲೆಗೆ ದೊಡ್ಡ ಹುದ್ದೆ ಒಲಿಯಿತು. 2023ರಲ್ಲಿ ಮತ್ತೆ ಕಾಂಗ್ರೆಸ್​ ಸರ್ಕಾರ ಅಧಿಕಾರಕ್ಕೆ ಬಂದಾಗ ಸಿದ್ದರಾಮಯ್ಯ ಸಂಪುಟದಲ್ಲಿ ಗೃಹ ಸಚಿವರಾದರು. ಇದೀಗ ಡಿ.ಕೆ.ಶಿವಕುಮಾರ್​ ಸರ್ಕಾರದಲ್ಲಿ ಮತ್ತೆ ಉಪಮುಖ್ಯಮಂತ್ರಿ ಸ್ಥಾನ ಒಲಿದು ಬಂದಿದೆ ಪಕ್ಷನಿಷ್ಠ ಪರಂಗೆ.