ಲೋಕಾ ಬಲೆಗೆ ವೈದ್ಯೆ

ಮಂಗಳಮ್ಮ ಎಂಬುವರ ಕಣ್ಣಿನ ಪೊರೆ ಚಿಕಿತ್ಸೆ ಬಳಿಕ ಲೆನ್ಸ್​ ಹಾಕಲು 6 ಸಾವಿರ ಲಂಚ ಪಡೆಯುವಾಗ ಸೋಮವಾರ ಮಧ್ಯಾಹ್ನ 12.30ರಲ್ಲಿ ಜಿಲ್ಲಾ ಆಸ್ಪತ್ರೆ ಕಣ್ಣಿನ ತಜ್ಞೆ ವೈದ್ಯೆ ಡಾ.ಸವಿತಾ ಹಾಗೂ ಸಹಾಯಕರಾದ ಹೊರಗುತ್ತಿಗೆ ನೌಕರ ಮನೋಜ್​ರನ್ನು ಲೋಕಾಯುಕ್ತ ಪೊಲೀಸ್​ ನಿರೀಕ್ಷಕ ಟಿ.ರಾಜು ನೇತೃತ್ವದ ತಂಡ ಬಂಧಿಸಿ, ತನಿಖಾ ಪ್ರಕ್ರಿಯೆ ಕೈಗೊಂಡಿದೆ.

ಗುತ್ತಿಗೆ ನೌಕರನ ಮೂಲಕ ಲಂಚ: ಜಿಲ್ಲಾ ಆಸ್ಪತ್ರೆಯ ಕಣ್ಣಿನ ವೈದ್ಯೆ ಡಾ.ಸವಿತಾ ನೇರವಾಗಿ ಲಂಚ ಸ್ವೀಕರಿಸಿದೆ ತಮ್ಮ ಸಹಾಯಕ ಗುತ್ತಿಗೆ ನೌಕರ ಮನೋಜ್​ ಮೂಲಕ ಪಡೆಯುವಾಗ ಲೋಕಾ ಪೊಲೀಸರ ಬಲೆ ಬೀಸಿದ್ದಾರೆ. ಮನೋಜ್​ನನ್ನು ಬಂಧಿಸಿ ಬಳಿಕ ಸವಿತಾರನ್ನು ವಶಕ್ಕೆ ಪಡೆದು ವಿಚಾರಣೆಗೊಳಪಡಿಸಿ ಬಂಧನ ಪ್ರಕ್ರಿಯೆ ಪೂರ್ಣಗೊಳಿಸಲಾಯಿತು.

ಲೋಕಾಯುಕ್ತ ಪೊಲೀಸ್​ ಅಧೀಕ್ಷಕ ಎ.ವಿ.ಲಕ್ಷಿ$್ಮನಾರಾಯಣ ಅವರು ಕಲಂ & 7 (ಎ) ಭ್ರಷ್ಟಾಚಾರ ಪ್ರತಿಬಂಧ ಕಾಯ್ದೆ &1988 (ತಿದ್ದುಪಡಿ-2018)ರಂತೆ ಪ್ರಕರಣ ದಾಖಲಿಸಿಕೊಂಡು ತನಿಖೆಗೆ ಟಿ.ರಾಜು ನೇತೃತ್ವದ ತಂಡ ರಚಿಸಿದ್ದರು.

ಲಂಚಕ್ಕೆ ಬೇಡಿಕೆ: ನಗರದ ಉಪ್ಪಾರಹಳ್ಳಿ ನಿವಾಸಿ ಆಟೋ ಚಾಲಕ ಅವಿನಾಶ್​ ಎಂಬುವರು ಜಿಲ್ಲಾ ಆಸ್ಪತ್ರೆಯಲ್ಲಿ ತಾಯಿ ಮಂಗಳಮ್ಮರ ಕಣ್ಣಿನ ಪೊರೆ ಚಿಕಿತ್ಸೆಗೆ ತೆರಳಿದ್ದಾಗ ವೈದ್ಯ ಡಾ.ಸವಿತಾ ಚಿಕಿತ್ಸೆ ಬಳಿಕ ಲೆನ್ಸ್​ ಅಳವಡಿಸಲು 6 ಸಾವಿರ ಲಂಚಕ್ಕೆ ಬೇಡಿಕೆಯಿಟ್ಟಿದ್ದರು. ಜಿಲ್ಲಾ ಆಸ್ಪತ್ರೆಯಲ್ಲಿ ಉಚಿತವಾಗಿ ಶಸ್ತ್ರಚಿಕಿತ್ಸೆ ಮಾಡುತ್ತಾರೆ ಎಂದಾಗ ಬೆಂಗಳೂರಿನ ಮಿಂಟೋ ಆಸ್ಪತ್ರೆಗೆ ಕರೆದೊಯ್ಯುವಂತೆ ಹೇಳಿದ್ದು, ಇಲ್ಲಾದರೆ 6 ಸಾವಿರ ಕೊಟ್ಟರೆ ಶಸ್ತ್ರಚಿಕಿತ್ಸೆ ಮಾಡಿ ಲೆನ್ಸ್​ ಹಾಕುವುದಾಗಿ ತಿಳಿಸಿದ್ದರು. ಇದರಿಂದ ಬೇಸರಗೊಂಡ ಅವಿನಾಶ್​ ಲೋಕಾಯುಕ್ತ ಕಚೇರಿ ಬಾಗಿಲುತಟ್ಟಿದ್ದರು.